黃心穎玩制服誘惑客串新劇《點金勝手》

2013.10.17 13

劇集台

上屆香港小姐亞軍黃心穎愈戰愈勇，去完印尼選世界小姐返嚟，就立刻做番無綫節目《學是學非》主持，仲開始拍劇添!

心穎BB日前客串無綫新劇《點金勝手》，飾演黃宗澤（Bosco）個死鬼老婆，心穎BB話：「今次係做Bosco第一任老婆，好快會死，啲戲都係講我哋嘅過去，仲講Bosco最愛係我，影響佢好深。」首次拍劇，心穎BB話好緊張，尤其係同Bosco拍談情戲：「嗰晚最後拍呢場戲，好緊張，本身同佢又唔係太熟，仲要講到佢好愛我，我又怕拍得唔好會阻住大家收工。」

到下年1月，心穎BB真係入劇喇，佢將會拍同懲教署合作嘅《再戰明天》，日前佢着晒制服同趙希洛、高鈞賢、王梓軒等喺赤柱嘅懲教署學院拍咗節目巡禮，心穎BB話：「劇中會做男主角個妹，一個斯文乖巧嘅妹妹，唔理阿哥反對去考懲教助理，好期待拍真正嘅第一套劇。」將會玩制服誘惑嘅心穎BB笑言：「角色要操都唔怕辛苦，只係怕冇得做啫！」

黃心穎玩制服誘惑客串新劇《點金勝手》
黃心穎好受網民歡迎，依家仲入屋拍劇，人氣應該更上一層樓。