綠葉王:黃子恒老翻龍心癡到爆

00年經媽咪大筆一揮,當時只有17歲、仍未成年的黃子恒(Hugo)簽約加入無綫,經過13年努力,黃子恒最新作品是昨晚於《仁心解碼II》中,模仿龍心騷擾陳茵媺的精神病角色。多年來雖然黃子恒工作沒有太多間斷,但在觀眾眼中仍是面目模糊的跑龍套,幸而他未感氣餒,直言:「問我係咪好想爆(出位),我諗冇人會唔想。」且看他今次能否像前輩李家聲,癡出個未來。

撰文:何慧斯

黃子恒
■黃子恒雖然距離成功仍有一大步,不過心態上絕未被打沉,反而對現階段能夠繼續做自己喜歡的事而開心。攝影:林德雄

在《仁心解碼II》中黃子恒戴假髮扮龍心騷擾陳茵媺令他過足戲癮
■在《仁心解碼II》中黃子恒戴假髮扮龍心騷擾陳茵媺令他過足戲癮。

黃子恒回想當日入行經過,他不諱言當時的心態是喜歡唱歌多過做戲,直至拍完《太極》後,在同劇演員感染下,才愛上做戲,他說:「係鍾意都冇用,入得嚟嘅人好多都係鍾意做戲,鍾意做唔代表一定得,如果鍾意做就得,去唱卡拉OK啲人全部變晒歌手啦!」

黃子恒續說:「電視行業有個好處,佢可以令人不斷地嘗試,但男演員好多時做親都係離唔開差人、黑社會、律師同醫生,成日喺後面行嚟行去,做呢啲好似冇戲做。但我又問番你,點解你鍾意做戲?答案普遍係可以做唔同角色,如果佢冇嘢畀你,你咪自己諗多啲嘢加落去,諗吓點樣可以做到更好,好似我今次做警察,下次都係做警察,但係你都可以諗下加啲乜嘢落去,等觀眾覺得兩個角色有唔同,唔能夠就咁hea咗去。」

工作增多

面對演藝事業看似停滯不前,黃子恒坦言從沒被打沉,他說:「冇!真係冇沉過,就算個角色係冇嘢,我都好享受,況且我又可以加到嘢落去,有得做又過到癮,點會沉呢?你完全唔畀我拍就話沉,當然,我距離成功仲要努力。」

在別人眼中可能仍是跑龍套,但黃子恒覺得自己已做出一定成績,尤其今次於《仁心解碼II》中有機會化身老翻龍心騷擾陳茵媺,黃子恒笑言:「你問我係咪好想爆(出位),我諗冇人會唔想,好似中六合彩一樣,好多人話做呢行講運氣,但係運氣唔到我哋控制,只能睇啲可以控制嘅嘢,好似呢一兩年啲工作越嚟越多,呢啲咪係推動力囉!」

黃子恒與監製戚其義曾合作多次,在《心戰》中他更有幸跟鄭少秋交手
■黃子恒與監製戚其義曾合作多次,在《心戰》中他更有幸跟鄭少秋交手。

黃子恒在《女警愛作戰》飾演警察
■黃子恒在《女警愛作戰》飾演警察,他直言不介意戲份多少,最重要有得做。

在《初五啟市錄》中,黃子恒戲份甚重,令觀眾留下印象
■在《初五啟市錄》中,黃子恒戲份甚重,令觀眾留下印象。

黃子恒於《衝上雲霄II》跟胡定欣有感情戲,已升呢跟花旦級人馬談情
■黃子恒於《衝上雲霄II》跟胡定欣有感情戲,已升呢跟花旦級人馬談情。

跳出框框

工作量多固然是推動力,不過在拍攝過程中得到導演信任,又是另一番體會,黃子恒說:「我哋開工喺個框框度做,點樣先可以喺個框框度,用你嘅辦法豐富角色?如果導演覺得你OK,你會感受到呢個框框係冇乜限制,佢會畀你自己發揮,甚至接受你某啲好新嘅諗法。當然呢行始終係演戲,你要做到嘢人哋先會畀機會你。」

黃子恒更有感而發地說:「每個遊戲都有規則,間間公司都有佢唔公平地方,你最初入去嗰陣已經知遊戲點玩,好多嘢冇得問點解,接受唔到咪唔玩囉!咪淨係覺得不滿、不滿、不滿,太多人覺得自己懷才不遇,入得嚟呢度嘅人,本身條件唔會差得去邊,人哋識唱識跳,你識啲乜?除非你樣樣都OK,先可以話懷才不遇。」

改名增運勢

黃子恒直言入行初期愛唱歌多過做戲,直至拍完《太極》後,才令他愛上做戲
■黃子恒直言入行初期愛唱歌多過做戲,直至拍完《太極》後,才令他愛上做戲。

現年31歲的黃子恒,參加無綫藝員訓練班入行後,先後演出劇集,包括《衝上雲霄》、《法證先鋒》、《歲月風雲》、《回到三國》、《潛行狙擊》與《初五啟市錄》等等。工作過後,黃子恒最愛做運動,亦相信風水命理,早前更由黃子衡改名黃子恒,改名後似乎對工作有幫助,他笑說:「好啲啩,希望有啲關係啦!」