黃宗澤舞出重圍
一個演而優則唱；一個唱而優則演，黃宗澤（Bosco）與官恩娜 （Ella）在娛樂圈作多方面發展，無論唱歌或拍劇，他們均樂在其中，不想局限於一個身份。目前積極為事業打拚的他們，希望在觀眾心目中塑造一個多才多藝的形象！
人氣小生Bosco入行十年，憑陽光外形，以及接連拍攝多個廣告及電視劇，火速上位，劇接劇的他，近年還轉型當歌手及進軍影壇，工作不斷！對於由公仔箱跳到大銀幕及舞台，Bosco坦言並非易事：「我已經唔再係新人，之前仲畀唱片公司『通緝』追期，其實隻碟已經做晒，但要夾期做宣傳，本來喺農曆新年前後推出，但因為拍劇又拍電影，人又唔喺香港，所以到呢個月先出到！」談到新碟《Bravo》風格，他說：「我畀人陽光感覺，而且大家都知我紮紮跳，所以呢張EP有好多輕快曲風，冇理由叫我做情歌王子，都冇人信啦！我都說服唔到自己唱情歌！」
跳跳紮的Bosco坦言不適合做情歌王子，寧以快歌勁舞會粉絲。
事實上，靚仔兼充滿陽光氣息的Bosco，入行至今緋聞不絕，其「緋聞樹」更長期「開枝散葉」，湊巧與他傳緋聞的女星大部分是選美出身，包括鍾嘉欣、胡杏兒、陳法拉、徐子珊、郭羨妮及朱璇等，可謂艷福不淺，當中傳得最熾熱的首推「正印緋聞女友」胡杏兒。
Bosco「劇接劇」狂搵銀，緋聞亦「女接女」製造話題。
「杏」福冧女王
Bosco雖然否認是「溝女王」，卻默認是「冧女王」，問到冧女秘技時，他說：「風趣幽默，唔好講太多爛Gag，因為太爛會變得冇深度！（絕招呢？）都係買戒指囉！呃唔到人嘅！想當年細個唔識諗，大個咗知道戒指唔可以隨便送，因為戒指係代表女仔心目中一個承諾。（送畀胡杏兒？）冇呀！」Bosco與杏兒的緋聞情侶形象深入民心，雖然兩人沒有公開承認戀情，但外界已認定他倆是一對，杏兒早前舉行音樂會時，Bosco更高調睇足全場及獻花打氣，認真窩心﹗
除了在螢幕上打情罵俏外，二人又經常透過微博互相關注，相當冤氣！對於「宗杏戀」廣為外界接受，Bosco竟顯得手足無措：「乜嘢呀？（正式公開戀情？）諗吓啦！（拍拖有共識？）出汗喇！冇呀！（點樣形容你哋嘅關係？）OK啦！係好朋友，畀條生路行吓啦！」近年多方面發展的Bosco，密密做狂吸金，他透露早前已置業：「係媽咪買嘅！用嚟投資，當儲錢，一向對投資同買樓好留意，染咗『買樓癮』。」
Bosco與杏兒的緋聞傳足5年，話唔係都冇人信！
繼林峯「Let’s Get Wet」後，Bosco亦濕身拍MV。
冇意搶「峯」頭
對於林峯「升呢」勇奪「亞太區最受歡迎香港男歌手」，又在紅館舉行演唱會，Bosco直言恨在紅館開騷：「想呀！但驚囉！起碼要三個月調整，專心綵排、練歌同Keep Fit，唔可以求其，呢刻冇時間，亦未有心情Ready！（咁攞亞太區獎呢？）冇信心！要天時地利人和。」問到如何形容林峯？他說：「佢係風度翩翩嘅公子Feel，同佢OK熟落，但我做唔到嗰啲公子Feel，我都羨慕佢嘅成績！」Bosco和林峯同屬當紮小生，加上齊齊轉型做歌手，正所謂「同行如敵國」，問到會否擔心比較？Bosco說：「冇得比！大家做嘅嘢未必一樣，表面上好似競爭好大，但行嘅路同目標唔同，打個比喻，可能佢係古天樂Feel，我就係張家輝Feel！」
文：German、阿彤
Bosco密密吸金，並笑言有「買樓癮」，恨死不少「80後」。
發電廠畀女圍
擁有迷人電眼的黃宗澤（Bosco），不但拍劇冧盡港女，入行後亦緋聞不絕，當中與緋聞女友胡杏兒最為「長情」！
胡杏兒
05年與杏兒拍攝劇集《我的野蠻奶奶》時傳出緋聞，去年有傳梁靖琪介入，Bosco更被拍得與杏兒同遊沖繩「箍煲」。
月前被踢爆暗撻多倫多華裔小姐倪晨曦，兩人更有不少親密合照，其後Bosco高調澄清，向杏兒大派定心丸。
今年再度與港姐陳茵媺合作新劇《讀心神探》因而傳出緋聞，惟Bosco對緋聞不抗拒，反而直言「預咗」傳緋聞。
官恩娜聲夢情真
現今的藝人不再「安守本分」，不欲局限於一個身份，最理想當然是樣樣精、瓣瓣掂，歌、影、視、播、廣告、配音和舞台劇等無不涉獵，這就為之Perfect（完美）！入行六年的Ella，雖然是歌手出身，但期間拍戲兼拍劇，令歌手身份變得模糊，甚至被遺忘。不過，娛樂圈機遇處處，去年九月，Ella擔任《超級巨聲》嘉賓，並與參賽者合唱《Endless Love》，憑「巨肺」一鳴驚人，連著名音樂人雷頌德亦對其演出擊節讚賞，網民更是有讚冇彈，令Ella的歌唱事業漸見順遂，她說：「《巨聲》之後，工作同唱歌機會多咗，比之前忙好多！（吸金勁？）冇呀！邊有咁多金吸吖？我都係用有限時間去做要做嘅嘢。」
新歌寫夢想
年半沒有推出新碟的Ella，新專輯如箭在弦，她坦言心情緊張，問到是否只許成功不許失敗？她說：「我做人態度隨緣，好怕有規限。逼住要成功嘅話，壓力會好大，依家隨住感覺去做，非常開心同滿足！（同雷頌德合作？）希望將來有機會合作。（送新碟畀佢？）好呀！」她透露新碟有幸與多位從未合作過的音樂人「偷師」，感覺新鮮：「歌曲有自己心聲，好似新歌《珊瑚島》，比喻個女仔流落荒島，受到好多唔同打擊，但仍然好堅強做好自己，相信夢想！」
Ella人靚聲甜，可惜被緋聞及是非拖累星途。
對於夢想，Ella不只着重歌唱方面，在過去的日子她多方面出擊，拍戲、拍劇對她來說並不陌生，但她揚言想有新挑戰︰「想接多啲電影，之前演搞笑為主，想演多啲內心戲嘅電影。」她坦言在娛樂圈打滾6年，經歷不少，亦令她變得成熟，將於下月出書的她，會在新書中分享過往點滴。
Ella與男友感情穩定，但尚未打算結婚。
雖然工作排得密麻麻，但Ella毫無怨言，捱夜當食生菜，並笑言目前三餐溫飽。屢被負面新聞纏身的她雖感無奈，但仍勇敢面對，並揚言︰「唔通拎住個『嬲』字上街咩！」去年初她驚爆「鹹豬手」而鬧得滿城風雨，問到現在會否慎言？她坦言已學乖︰「作為公眾人物應該慎言，顧及其他人感受！（經一事長一智？）依家講嘢之前會深思熟慮！」對於06年的「狼吻事件」，Ella記憶猶新，她認為女孩子應好好保護自己︰「有好多嘢都係意料之外，所以出席活動會一眼關七！」
曾拍攝不少劇集及電影的Ella，演技着實不俗，惟與獎項無緣。
Ella在《超級巨聲》中一鳴驚人，「唱爆咪」片段備受網友熱捧。
結婚唔會瞞
目前與男友感情穩定的Ella，事業愛情兩得意，問到婚期？她笑說︰「冇呀！點瞞你哋呀！（屋企人催婚？）冇提過！自己都想，但依家想專注事業！」她表示與男友各有各忙，但男友從沒詐型，故正享受甜蜜期。在享受的同時，事業剛起步的她表示，會加倍努力贏取別人認同，並稱唱歌要終身學習，不進則退︰「會唱多啲Live！（之前表演好有壓力？）緊張多啲！所以成日去洗手間開聲練歌，畀走廊經過嘅人笑都唔介意！」
經常「開口夾着脷」的Ella，隨着年紀漸長，已學會慎言。
緋聞是非纏身
官恩娜（Ella）入行以來與男明星分外有緣，除了屢傳緋聞外，連是非亦不放過，受盡負面新聞困擾。
緋聞：吳卓羲
於05年拍攝劇集《酒店風雲》時傳戲假情真，Ella曾被拍得出入吳卓羲寓所。
Ella表示與陸恭和在公司老闆介紹下認識，惟Ella只承認與對方是相識已久的朋友，並非男友。
合作劇集《律政新人王II》時傳出不和，陳鍵鋒當時暗寸有人博宣傳，但其後出席活動時狀甚老友。
轉型做「新鮮」人
不少藝人為帶給觀眾新鮮感及挑戰自我，出道一段時間後紛紛轉型。
何韻詩96年參加《新秀》入行，在樂壇獲獎無數，最近她與老友杜汶澤齊齊接拍無綫處境喜劇《女王辦公室》。
07年以歌手身份出道，今年更舉行處女個人演唱會，繼劇集《學警狙擊》後，最近又接拍無綫古裝劇。
訓練班畢業後，一直在無綫拍劇，08年勇奪「我最喜愛的男主角」，簽約英皇後更奪得IFPI「全年最高銷量本地男歌手」。
04年獲港姐冠軍後加入無綫拍劇，年前進軍影壇即勇奪香港電影金像獎「最佳新演員」，09年更以女新人姿態殺入樂壇。