廉政公署到2014年就成立40周年，梗係要大事宣傳威水嘢。Emily喺廉署內部八到，佢哋正籌備新一系列嘅《廉政行動》，由於係40周年，呢套片嘅規模會更大，仲會改為有電影感嘅電視電影。。全套一共5集，每集播足1.5小時。不過，廉署今次唔係同港台合作，而係同無綫合作。

擬邀林超賢邱禮濤泰迪羅賓

據聞，廉署已經開始物色幾個勁導演，包括曾經合作過嘅林超賢，仲有邱禮濤、泰迪羅賓，聽講佢哋打算搵近期上映、成為市民熱話嘅《寒戰》導演陸劍青與梁樂民幫手。由於廉署資源有限，今次都係友情搭夠，人工唔係多，希望各位大導演幫手。不過，Emily想知，喺呢輯《廉政行動》入面，會唔會有保安局長呢個角色，如果有，搵葉劉淑儀客串都幾好喎！

今年首10月貪污升4%

另外，廉署消息人士同Emily講，負責監管廉署嘅4個委員會，下個月會出年結，今年首10個月，整體貪污數字比去年同期升4%，當中只有2%需要跟進；涉政府及公營機構貪污數字則上升14%，可跟進有10%。咦，咁係唔係反映政府貪污多咗？消息人士話，好多case都冇得跟進，好難話貪污多咗，但佢哋就擔心，12月初國際反貪嘅非政府組織「透明國際」會發表報告，基於過去一年多咗矚目嘅懷疑貪污案，仲涉及高官同大機構，可能影響香港廉潔程度排名。佢話廉署見唔到有集團式貪污，唔認為香港嘅廉潔差咗。