關鍵時刻來臨。今晚，無綫《萬千星輝賀台慶》在民怨聲中播映，網民因免費電視發牌風暴而怒火沸騰，發起熄機賀台慶，而阿叻陳百祥的囂張妄言無非火上加油，曲線拉低台慶收視。當然，大家絕對有選擇權，大可繼續收睇林峯的「高」難度表演、欣賞阿叻拖女上演的花式足球，以及博抽中價值33萬元的Audi房車；大家亦可轉睇亞視，為昏睡已久的弱台燃點希望、到大球場為香港足球隊打氣、又可上網緬懷無綫台慶的經典時刻。免費電視牌照的命運、無綫的命運、阿叻膝頭的命運，都掌握在你手。撰文：李全
■無綫《萬千星輝賀台慶》今晚舉行，今晚熄不熄機，你可以作主的。
【睇台慶】台慶有乜睇
亮燈儀式
每年台慶指定動作之一，行政主席梁乃鵬在出爐港姐冠軍陳凱琳陪同下主持亮燈儀式。
歌舞序幕
由無綫新成立的星夢唱片歌手擔正大旗，包括鍾嘉欣、鄭俊弘、許廷鏗和王君馨等獻唱。
大玩魔術
在「金鑽魔法陣」中，魔術師甄澤權、李行齊聯同陳豪、黎耀祥、胡杏兒和陳展鵬等表演魔術。
花式足球
陳百祥帶領呂慧儀、葉翠翠、龔嘉欣、張嘉兒、林夏薇和沈震軒等玩各樣花式足球。
老表大婚
王祖藍、張繼聰、王菀之、黃光亮和朱咪咪等《老表．你好嘢！》班底合演搞笑歌舞劇「老表．你大婚」。
一祥激戰
搞笑能手阮兆祥聯同吳業坤、陳志健、魏焌皓、吳雲甫等猛男，以身體拍打當作表演。
空中狂舞
「懸浮舞動派」環節中，林峯、徐子珊率領李亞男、岑麗香、袁偉豪等十男十女小生花旦表演空中舞。
校長領唱
譚詠麟在「樂壇校長party time」中，與後輩謝安琪、G.E.M.和林欣彤等逾三十位歌手組合jam歌。
抽獎時刻
在表演環節中有四大遊戲，觀眾和藝員透過遊戲分別奪得現金、洋房、鑽飾、名車等共700多萬獎金獎品。
切蛋糕
每年台慶指定動作之二，由董事利孝和夫人主持切蛋糕及祝酒儀式。
【唔睇台慶】十大好節目
睇台慶
冇人話要睇電視，可上網重溫當年無綫台慶經典片段，睇肥肥踩雞蛋、發仔吞火、楊盼盼徒手爬繩。
睇波
誰說只有TVB先有波睇？大球場都有啦！屆時香港足球隊在亞洲盃外圍賽迎戰烏茲別克，出線生死戰！
睇亞視
雖然明知亞視無力回天，依舊播出《星動亞洲》、《詠春傳奇》等節目，但今晚破例轉台睇亞視，做埋筆記吖笨！
睇CCTV
睇清楚，唔係CCTVB，係CCTV，即閉路電視呀，雖然畫面單調平淡，但可窺看到人生百態。
睇《警界線》
一男子因素累港視胎死腹中，惟有上網狂煲《警界線》。係，已經睇咗第一集七七四十九次，但還是要繼續睇。
睇DVD
拿出陳年舊DVD《賭俠大戰拉斯維加斯》重溫，就是要睇阿叻俾萬梓良捉走，跪地監生食米奇老鼠屎一幕。
睇Tommy仔
Tommy仔曾是阿叻旗下藝人，但此Tommy仔是大鬧差館的野豬。眼見牠被差人又麻醉槍又盾牌侍候，真是陰功豬。
睇《殭屍》
Juno套《殭屍》票房破1,600萬，閣下也貢獻了60元，但聽Juno說拍攝了鬼魂入鏡，你再入場便是捕捉那半秒鬼畫面。
守候TVB
以爭上頭炷香的心態捕在TVB門口，即TVBuddy公仔下面，霸頭位等睇阿叻兌現他的跪回家承諾。
自由活動
做乜都好，就係唔睇無綫台慶，仲要勸埋三姑六婆姨媽姑姐一齊罷睇無綫，原因不作解釋。
阿叻囂張：驚有40點收視
【電視風雲之今晚8點熄機】今晚熄機，是為了終有一日可再開機。免費電視發牌觸發民怨，網民今晚發起「萬千熄機賀台慶」挑戰電視霸權。無綫藝人陳百祥（阿叻）昨再火上加油說：「我好驚40點（收視），如果40點，佢哋會好冇面囉！」不過，昨傳有廣告大客決定臨時抽走廣告、網民亦準備紙紮電視踩場抗議。阿叻說已準備好兩個護膝。能否派上用場，就要視乎觀眾如何使用手上的遙控器。
台慶於今晚8時至10時半於翡翠台播出，陳百祥（阿叻）昨出席《萬千星輝賀台慶》拜神儀式，被問到有否叫朋友開電視時指「唔需要吖，我哋成日都講公平公正，如果有人真係喺網上勸到人熄機，我絕對接受」，他更質疑網民能否動員市民熄機，「做唔做到呀？」
阿叻曾跟網民「對賭」說，若熄機行動能將台慶收視降至兩、三點（即約只剩19萬人收看）就「跪回家」；他昨再挑機說：「我準備兩個護膝，我好鬼驚，我好驚40點（即有約259萬觀眾），真係好驚，如果40點，佢哋會好冇面囉！如果30點已經冇面，我真係好驚，個個夾硬開」。無綫昨收到5宗投訴，不滿阿叻最近言論，對此阿叻瞪着眼睛說「咁少！唔係啩！好冇面」。
五年流失124萬觀眾
阿叻原定今早會在商台《在晴朗的一天出發》跟網民直接對戰，但昨晚商台突然取消訪問。網民今晚則會到電視城外踩場，「同TVB做生忌」，他們晚上七時會到將軍澳的無綫電視城外示威，帶同印有黑白無綫台徽的紙紮電視機和製品，在台慶日高呼「TVB已死」，又會「開壇作法」，大灑雞汁，抗議無綫大賣植入式廣告，並以一對輓聯抗議無綫電視霸權。活動發起人李小姐指，「最想睇阿叻跪返屋企」，希望有1,000名網民到場。
無綫雖一台獨大，但五年內已流失約124萬觀眾。被喻為是全年最強陣容的無綫台慶劇，過去五年至今，最高收視暴跌20點。以09年的《宮心計》為例，最高收視50點，相等約318萬觀眾收看；今年的《On Call36小時2》最高則只有30點，相等約194萬人收看，兩劇最高相差124萬觀眾捧場，平均收視亦相差40萬觀眾。王維基昨出席港大一個閉門講座，被問今晚會否熄電視，他說平時不會這麼早回家睇電視，批評無綫「o依家啲劇好膠，因為最好嘅人我哋納晒」。
十壯士成員、港視前編劇蔡錦源，今晚八時會與葵青街坊，在盛東邨公園用投影機觀看《警界線》第一集。發起該活動的葵青區區議員周偉雄今早亦會派傳單，呼籲街坊熄電視，「請佢哋落街睇好嘢，睇完覺得好正？對唔住，後面冇得你睇，因為港視冇牌」。另一位十壯士成員Ken亦響應熄機，到大球場支持港隊作賽。他建議市民可接駁電腦和電視，觀看網上短片和其他電視節目。
傳廣告商抽起廣告
網民力量已起作用，「主場新聞」昨報道指有廣告大客臨時抽走今晚台慶夜的廣告，「唔想阿叻霸權繼續落去」，又認為熄機行動足以影響廣告商，「如果（台慶收視）跌了5至6點，或者是10點，廣告商下次一定不敢怠慢」。該不願具名的廣告公司，每年投放落無綫的廣告金額以千萬元計，更透露一周前已通知無綫有關決定。無綫企業傳訊部宣傳科副總監曾醒明向本報指未有聽聞。無綫藝員科經理何其穎昨日向藝人發出短訊，呼籲今晚開機。
三代電視人鬧爆TVB
【電視風雲之港劇沒落】一連三日各界鬧爆無綫，怎少得三代電視人。第一代周梁淑怡心痛親生仔淪為坐擁慣性收視的敗家仔；隨後的林奕華認為無綫用慢性毒藥害死電視業。相對屬新一代的《天與地》編劇周旭明，期望市民不只今晚無綫台慶熄電視，更要將戰線延續至電視發牌風雲的「攪屎棍」梁振英。
劇本瞇埋眼寫到
港人變百彈齋主，卻對「膠劇」邊彈邊看，沒辦法，「（因為）觀眾冇得選擇喎」。67年協助創辦無綫的第一代電視人周梁淑怡說，「有時睇見啲電視劇，真係慘不忍睹，點解？冇要求呀……因為佢哋冇任何威脅、冇競爭令到佢哋要驚」。
慣性收視是致命傷
為無綫做過開荒牛，其後輾轉在佳視與亞視打滾，見證電視圈輝煌發展，至今除卻新聞時事外，幾乎禁絕劇集。自由黨主席周梁坦言，「戲劇係講人嘅故事，一樣米養百樣人，成功在於個個角色都有獨特嘅地方，但o依家睇嗰啲（劇集），好似齣齣差唔多，啲劇本好似個個人瞇埋眼都寫到咁」。
她製作過電視劇《狂潮》，又從《民間傳奇》將汪明荃由古代帶到時裝劇《家變》，令女強人洛琳膾炙人口。她重視創作人材，提拔過王晶、甘國亮、許鞍華、杜琪峯、徐克等。
周梁認為最荒謬的是一個聲稱鼓勵創意工業的政府，一手扼殺這方面的發展，「有乜行業好過用電視去體現？呢行可以帶動廣告、設計甚至電影」。周梁認為慣性收視是致命傷，「好似奧運選手，成日要練，因為想贏，如果跑嚟跑去得嗰一個人，仲邊有嗰種挑戰？」
企業老細亦如是。她稱：「啲老闆會諗，冇人嚟同你砌，慳番啲囉，貴嘅嘢唔好做咁多。」觀眾邊罵邊看，不也有責任嗎？周梁嘆句：「觀眾都冇選擇；你叫佢（普羅市民）唔睇，佢唔睇喺屋企做得啲乜啫？」周梁指電視困局是政府造成，「政府有責任做球證，要求電視台做好質同量，同時確保市場有健康競爭，但政府冇做到」。
慢性中毒30多年
香港電視劇集已死，死於慢性中毒30多年，早於15歲已到無綫當編劇的文化人林奕華認為，落砒霜的便是一手湊大他的無綫電視。無綫數十年愚民政策，以單一沉悶節目培養一群不分男女老幼的師奶觀眾；若要重拾香港電視七十年代生氣，只有觀眾敢於向電視台說不。
「上堂時俾班大學生睇《輪流傳》，睇完問點解o依家冇咁好嘅劇、點解當年會腰斷。」林奕華於新作《是《輪流傳》不是《輪流轉》》再讚揚這齣劇，劇本探討當時社會及人性，並有對比、借鏡等文學表現手法，導演演員都上佳。
1980年揭死亡序幕
他說電視七十年代剛起步，沒有規限，在周梁淑怡領導下的知識分子天馬行空，像以電影手法拍攝的譚家明《七女性》、許鞍華《CID》，或已貴為大明星的汪明荃及鄭少秋，可在十多集的《唔駛問阿貴》「集集演唔同角色」，演員觀眾都過足癮。
這些實驗性劇集或介紹電影的《蒙太奇》，毋須像現時般擠到假日，而是在黃金時間播放，「知識分子領導唔係精英化而係要多元化」。
1980年是電視死亡序幕。「《香港八一》新劇種，彩色幻化《無雙譜》……」無綫該年大改革，每晚硬性發展兩線或三線劇，其他類型節目靠邊站；劇集內容重複，初期還有明星效應坐鎮，後來慘不忍睹。
看重收視缺乏視野
「最大問題，係無綫劇要拍畀8至80歲觀眾睇。」他說無綫後來「會計師」主政，收視大過天，節目要簡單才可迎合所有觀眾，結果培養大批師奶觀眾，「師奶可以係一個廿幾歲男大學生」。
他認為英美日劇有本地電視最缺乏的vision（視野），除家喻戶曉的《Breaking Bad》、《Downton Abbey》，他舉例《半澤直樹》男角堺雅人另一套劇《Legal High》，「佢做律師，每集都打輸官司，但喺觀眾眼中佢係打贏嘅，喺人性上」。
他說無綫愚民政策下，觀眾再不滿烹飪節目主持人只懂「哈哈哈」，收視也會升。他說只有觀眾敢於以行動來向電視台說不，電視才有前路：「係需要勇氣，因為我見到部份年輕人，好驚自己同人唔同俾人當怪物。」
觀眾要求被賤視
《天與地》編劇周旭明活像預言家，一早告戒我城正步向死亡。免費電視風暴初起，他料到留守行動會無以為繼、西環操控大局。熄電視日前夕，他預計收視最終微跌，無綫與網民各自表述，繼續一台獨大。他悲觀，但不認輸，呼籲群眾今晚熄過電視後，怒火不要化掉，把矛頭重新指向「攪屎棍」梁振英。
就算今天沒有熄電視行動，周旭明家裏電視都是長關，他大潑冷水，「網民見到跌穿30點，好開心開香檳，咁又點？你懷疑無綫同政府有姦情勾結，但係唔可以熄電視就滿足。要問自己，你仲緊唔緊張自己俾人剝削？定係宣洩咗，以後唔睇TVB，咁就算？」
限制扼殺劇本空間
周旭明在無綫工作十多年，見證25至35歲的觀眾群不斷流失。他們消費力最高，消遣選擇多，加上搵食艱難，加班進修，更少看電視。相反，學生和父母輩觀眾要求較簡單，「當你對住呢啲觀眾，好難想像要多樣化、革新。市場冇競爭，好難要求一台獨大既機構有乜嘢企業道德」。不過，周不認同無綫這種思維，「盈利咁安全，應該有文化承擔責任。無綫10幾年嚟停喺度，令人沮喪」。
別人笑無綫劇集總涉及BBQ結局和多角關係，周旭明說這類橋段容易掌握，能在高層給予的有限時間內完成；吃飯戲空出一邊枱，探病戲空出一邊床，普通屋企大過豪宅，全是為遷就三機拍攝，一天廠景可完成三分一至二分一集戲。單機拍攝雖較具實感，但增加成本和時間。他總結是電視台限制扼殺劇本空間。
「講到尾要真普選」
不過，他說單憑無綫高層之力不足以摧毀一切，前線妥協也導致電視文化墮落，這些節目都由同業製作，包括轉職港視的前無綫員工，「唔可以當自己唔關事。TVB份工近乎政府工，有人貪於逸樂，係無奈做，或者跟住其他人做而唔覺有問題」。
他又說觀眾要求低也造成今日局面，「觀眾放棄，梁振英至會賤視。佢睇死我哋鬼有能力對付佢，我哋要俾佢知事實唔係咁」。
按劇情發展，政府將有更多不公義政策。周旭明叮囑港視員工和其他事件的苦主放下政治潔癖，別只着眼單一議題。奶粉、郊野公園、電視風波一脈相承，全都是同一「攪屎棍」造成，「講到尾，要解決，又係要真普選。」