網民號召台慶熄電視 陳百祥:收視2點我死咗佢!

早前揚言無綫台慶當日如果收視得返2,3點就跪住返屋企嘅陳百祥(阿叻),今日出席活動有更爆嘅言論,佢話:「我就呼籲大家開電視,如果大家鍾意正能量,鍾意睇娛樂開心嘅呢,就唔該開電視機。」

佢繼續:「我成日覺得,香港係福地,只要大家開開心心,正能量就嚟啦,想開心呢台慶就開電視,睇下個收視上定落囉。如果2、3點我就梗唔信啦…唔止跪返去,死咗佢添。(玩得再大啲?)再大啲,橫掂都係啦,唔死都冇用啦,表演得2、3點。」

問到網民號召800個收視用戶熄電視,佢話:「試下囉,今日望你哋幫忙囉,正能量嘅報紙就寫,開開心心當送飯,支持我開電視,睇佢叫到人熄機定開機囉。」

又講到該fb page針對佢個人,阿叻話:「仲好,睇下你針唔針對到囉,我唔係好識中文,我淨係記得魯迅話:『橫眉冷對千夫指』…但我唔知點解呢句…」

講到網民話集合力量對付,佢話:「集合就得嘅咩?理佢瞓街啦,關我咩事,我嘅本份只係叫人開開心心睇我表演,佢哋能夠做到乜咪做囉。」又話:「個800人傻o架?網民叫佢就做啦?咁我哋所有嘅公安唔使做啦,網民日日都話推翻政府,日日都話特首唔好,咁咪日日都要落台?如果個網係咁有力,佢哋得咗啦,你估佢哋馬雲呀馬化騰呀?」

又提到網民搵返佢啲負面新聞出嚟,好似之前喺大陸比人告非法集資幾十億,佢話:「咁我做咗傻仔,我冇話我好聰明,做生意有蝕有賺,我25歲都破產啦,何況50歲投資錯誤有咩特別?次次賺我就係李嘉誠啦!」


阿叻呢返言論,已經喺網上瘋傳啦。

「TVB一台獨大佢想嘅咩?」 阿叻: 依家想趕絕我呀?

今日陳百祥(阿叻)出席活動時揚言,TVB台慶收視得2點就「死咗佢」,玩到咁激,其實段訪問雖然佢笑笑口咁講,但言語間「好多骨」兼有火氣o架,講到網民開fb page針對熄電視同佢個人,佢繼續話:

「我就係娛樂人,我就唔涉政治,我淨係鍾意大家多啲正能量,佢哋(指網民)日日得閒無事去示威或者熄機,我哋日日叫人開機,我就啱啱相反,淨係你講得呀?我唔講得呀?我唔可以講正能量嘢咩?一定要跟你講負能量嘢咩?日日望人仆街嘅?我就日日望周邊嘅人發達﹗」

阿叻似乎唔係好知王維基冇牌成件事係點喎,淨係覺得香港人得怨氣,佢話:「大佬邊有人望人閉翳o架?呢個咩年代嚟呀?我哋嘅年代睇人發達就努力去追你,依家唔係嘅,你發達就望你趴街。喂,TVB一台獨大佢想嘅咩?佢都想有對手,佢夠想多啲人競爭,成個Group都大啲,依家唔係TVB叫政府唔發牌比人,佢歡迎發牌0架嘛,只要大家公平競爭,其實可以推到2015大家投牌,呢樣嘢係好公開o架嘛,我哋想香港好,全部正能量,你哋就望香港仆街。你睇人哋新加坡,唔好理和唔和諧,人哋每日喺度升值,人哋個個有屋住,個個有飯開,你哋日日望個個冇飯開,我都未見過叻同好嘅行業(指TVB)係受咁多人攻擊嘅,完全將個社會嘅氣氛掉轉晒。邊個Artist好呢,你就想佢唔好留喺香港,趕走成龍呀,張曼玉,依家想趕我呀?趕我唔絕嘅!我最慘上無高堂下無子女,收視我都未驚過!你咪熄咗佢囉,如果你熄到2點咪死咗佢囉!」

其實TVB總經理李寶安表示過過去年15年免費電視收入一直冇增加,如果政府將免費牌照增加至5個,就揚言可能有電視台倒閉,咁嘅言論,叫做歡迎競爭?

另外,阿叻噚晚喺一個活動上同王維基同場,問佢有冇同維基打招呼,阿叻就寸爆話:「我時運高,乜都見唔到。」,又話王維基唔係時運低,只係運未到。


噚日同今日秀姑都同阿叻齊齊出席活動。