梁洛施年底復出　大片商吼實

梁洛施（ Isabella）前日發聲明宣佈與李澤楷（小小超）分手，據悉她打算年底復出娛樂圈，因她熱愛演戲，如果有適合的電影， Isabella會考慮回港演出。各大電影公司老闆均歡迎她復出拍戲，認為她是有潛質的演員，應該可以在影壇有一番作為。

梁洛施 12歲便踏足娛樂圈發展， 07年才 18歲的她已憑電影《伊莎貝拉》揚威國際榮膺葡萄牙影后，同年 11月，在她事業如日方中之際，因為拍攝荷李活電影《盜墓迷城 3》（ The Mummy： Tomb of the Dragon Emperor）時，透過好友楊紫瓊邂逅了電盈主席李澤楷，翌年兩人戀情曝光，到 09年兩人的愛情結晶長治出生， Isabella從此淡出娛樂圈，但沒有人會想到，去年 7月再度為小小超誕下一對孖仔的她，前日卻突然發聲明宣佈與小小超分手。

現年 22歲的梁洛施已是三子之母，不少電影公司都歡迎她復出拍戲。資料圖片

梁洛施（右） 08年參演荷李活電影《盜墓迷城 3》，之後便退出娛樂圈。劇照

梁洛施主演的《伊莎貝拉》奪得柏林影展最佳電影配樂銀熊獎，梁更獲封葡萄牙影后。資料圖片

「 Isabella好鍾意演戲」

徐克（右）一直覺得梁洛施很有潛質，相信她復出，徐克會再找她拍戲。

當年 Isabella拍完《盜》片後離開影壇，令不少導演感到可惜，因為她是一位可造之材，若不是為了愛情要離開香港，她的星途必然發光發亮，據梁洛施的好友透露：「 Isabella其實係好鍾意演戲，但當初佢為咗愛情甘願放棄一切，遠離家鄉過普通人生活，專心去照顧幾個小朋友，但呢段感情出現變化，唔係以前咁美好時，最終鬧致分手，佢就開始要重新為未來計劃好，我相信遇到合適劇本，而小朋友又定落嚟，佢係會再出嚟拍戲，畢竟佢今年先 22歲，仲有咁長嘅人生路要走，佢都要為自己打算一吓。」

黃百鳴：佢好有潛質

黃百鳴認為若梁洛施復出，應可有一番作為。

對於 Isabella有意在年底復出娛樂圈發展，各大電影公司普遍歡迎，天馬電影公司老闆黃百鳴昨日表示：「家電影圈真係好缺演員，佢退出之前係好有潛質嘅女星，成績係相當好，我相信佢肯再復出拍戲，一定會有可為，如果我公司有啱佢嘅角色，當然樂於搵佢演出。」
寰宇電影公司老闆林小明也表示 Isabella復出影壇發展是一件好事，他昨日在電話中表示：「佢退出之前可以話係優質演員，但經過幾年嘅養尊處優，都要睇吓佢狀態係點，觀眾反應又如何？如果公司有戲啱佢做，我又唔會抗拒用佢，畢竟 Isabella都係一位好戲嘅演員。」
美亞電影公司在 Isabella淡出娛樂圈前，已經有電影想請她拍，可惜當時她已經在加拿大待產，最終沒有接拍，記者昨日問美亞老闆李國興會否再邀 Isabella拍戲？他說：「暫時我仲未諗到公司有乜戲啱佢拍，如果佢真係肯復出，我覺得佢應該可以有一番作為，印象中佢嘅演技都唔錯，復出真係唔愁冇戲拍。」

周凱旋：我唔知咁多

李嘉誠紅顏知己周凱旋（中）昨晚現身福臨門，她不肯就小小超與女友分手發表意見。

另外，作為 Isabella好友的譚耀文，前晚獲悉好友與小小超分手時感到十分意外，身在內地的他昨日表示：「我哋冇聯絡成半年，一向都係佢主動搵我，平日我好少搵佢，不過阿 Bel（梁洛施）好有朋友心，到時到候會打電話嚟。呢一刻我真係唔知講乜，大人感情事，希望唔好影響到小朋友，我認識嘅阿 Bel係好照顧 BB，我好尊重佢哋嘅決定，相信會如聲明所講，佢哋會畀囝囝健康快樂成長。」
譚耀文表示明白現階段 Isabella應該需要空間處理自己的問題，所以不便打擾她，阿譚說：「佢要處理咁多嘢，作為朋友，我呢段時間唔會騷擾佢，佢需要冷靜空間，作為朋友，我隔空支持佢，兩個人相處，真係一個好大嘅學問。緣起緣滅，事過境遷，我祝佢未來可以行一條開心嘅路。」
此外，李嘉誠紅顏知己周凱旋昨晚在灣仔福臨門食飯，約晚上 8時離開，但不見李嘉誠同行，她身邊有一男一女外籍保鑣同行。當記者上前問她對 Isabella和李澤楷分手有何看法，周凱旋只說：「我唔知咁多呢啲。」

楊受成笑騎騎派錢

楊受成（左）前晚未肯回應梁洛施與小小超分手之事，但卻心情甚靚地向泊車員派錢。

梁洛施 08年與經理人英皇因解約問題對簿公堂，前日梁洛施發聲明宣佈與李澤楷分手之際，其前經理人公司老闆楊受成於灣仔福臨門跟太太陸小曼、兒子楊其龍、女兒楊諾思等敍天倫。
楊受成於晚上 9時許離開，對於梁洛施與李澤楷分手，楊受成不肯回應，只笑笑口說：「我唔知道，我唔識睇。」之後他掏出一大叠鈔票，向在場兩名泊車人員派錢，心情甚靚。
另外，陸小曼昨日與英皇藝人洪卓立及湯怡到大欖郊野公園出席慈善步行活動，問到若梁洛施重返娛樂圈，可考慮與她重新簽約？陸小曼只說：「應該專注番今日活動。」

全城熱話
「父母分開唔係好事」

任賢齊

梁洛施曾幾何時成為不少港女的發奮目標，希望找到億萬身家的白馬王子，但如今童話幻滅，難怪不少人大嘆可惜。

任賢齊：覺得好突然同驚訝，父母分開唔係好事，小朋友成長要有完整家庭，家社會形態係咁，最好盡量爭取事業家庭平衡。

楊秀惠：我有睇到聲明話佢兩個會一齊照顧小朋友，呢個係佢哋應負嘅責任，呢件事都可以話畀後生嘅人知，生小朋友同養小動物前要三思，因為要照顧佢哋一生一世。

陳法拉：傳媒一路將角度放喺身家同贍養費上，感情唔止呢啲，小朋友成長過程仲有好多事面對，要保護佢哋。

徐子珊

楊千嬅

徐子珊：本身件事對我嚟講好似童話，但家發展到咁好可惜。自己一直冇諗過係咪嫁入豪門，心頭冇咁高，踏實啲。

黃婉曼：共同撫養係好，畀錢養 BB都要，有三個仔都好開心呀。

許志安：佢哋經過深思熟慮，相信分開係最好嘅解決方法，家佢哋只係角色唔同，相信會保持友好關係。

楊千嬅：佢哋係成年人，有共識先發聲明，人哋家事我唔方便畀意見。

灰姑娘的蛻變

做過富豪女友的 Isabella，同時也是三子之母，但現年才 22歲的她，無論怎樣裝扮，仍是一個散發濃烈稚氣的少女。

梁洛施（ Isabella）替鑽石王老五李澤楷先後生下三名慈菇椗，半隻腳踏入豪門，差點成為香港首富李嘉誠新抱，被喻為港版灰姑娘的她，前晚卻發聲明指與李澤楷已分手，消息十分震撼。
回顧 Isabella過去 10年，由清寒少女變身富豪女友，再進階為千億王國後人的母親，濃縮人生如戲劇一樣多姿多采， Isabella在 01年入行時才 12歲，稚氣未除，但成為李澤楷身邊女友後，忽然富貴的她變得高貴成熟，明顯蓋過真實年齡，現年才 22歲的 Isabella經過這番蛻變，這寶貴一課想必對她愛情觀和人生觀有着深遠影響。　撰文：林妃