艾威抗爭到底 給特首的公開信

「你問我驚唔驚?有嘢係值得驚,不過驚都要做啦!」

「會唔會因此而退縮?係唔可以!」

入行超過30年,曾演出逾百套劇的綠葉王艾威,當日為尋求新突破離開無綫轉投港視,未等到劇集播映,便先上演一場電視革命!艾威看似走上一條不歸路,但至少在這一刻,他無憾無悔。

撰文:何慧斯

艾威
■艾威為公義發聲,不想人生留有遺憾。
攝影:陳志嵐

艾威
■入行逾30年,艾威曾在《獵鷹》中跟劉德華合作。電視圖片

訪問當日,艾威選擇在鯉魚門進行,每當經過海鮮檔,不少檔主和途人為他打氣,細談箇中原因,他說:「政府提出話驚市場容納唔到競爭者,我諗起鯉魚門,呢個地方食肆係幾間海鮮檔供應畀一間酒樓,每一個海鮮檔你都會戥佢擔心,咁多貨,點樣先可以賣得晒?但係咪政府要顧及營商者可唔可以生存到嘅時候,去判斷發唔發牌畀佢,咁鯉魚門呢度好多人咪不獲發牌?事實上市場會自行調整,適者生存,香港呢個社會不嬲都係用呢個原則、方式去生存。」

艾威
■綠葉王艾威(右一)演過百部無綫劇,絕對有資格批評前公司的內政。
《荃加福祿壽探案》劇照

敢言不後悔

當日毅然轉新公司,目的是希望尋求新突破,現在似乎實現了當日願望,艾威說:「呢次真係非常大嘅突破,前排有間大學嘅學生,喺政總同我做咗個訪問,佢問我點解咁勇敢肯企出嚟,無論發言又好,行動都好,係需要好大勇氣;你問我驚唔驚?喺呢個時候係驚唔到咁多,當你細心去諗,其實有嘢係值得驚,但係會唔會因此而退縮呢?係唔可以!」

艾威續說:「好多人教後輩出嚟做嘢唔好怕蝕底,我企出嚟講嘢,係有朋友勸過我,話我好蝕底,甚至乎初初跳槽,講咗啲關於TVB嘅內政事,係蝕底咗喎,點解咁蝕底嘅事都會做呀?其實又好自相矛盾,呢頭教人唔好怕蝕底,轉頭有人出嚟做咗啲嘢,你又勸人哋話咁蝕底嘅嘢你都做?」連日來艾威接受不同傳媒機構的訪問,當中包括港聞、時事節目及娛樂,他不禁笑說:「呢世仔未試過做過咁多訪問,未試過講咁多嘢,如果因為劇集收視好而做就好,o依家寧願唔做,唔想有呢啲事發生!」

雖然有不少人認為這條爭取發牌路是不歸路,不過艾威直言不會後悔,亦不想令人生有一點遺憾,他說:「o依家唔顧慮得咁多,呢件事冇得收聲,我對任何嘢都會向最好嗰點望,亦都作最壞打算,你問我,我唔覺得會有發牌嘅機會,唔係話出咗聲一定會有機會,而係必須出聲。最壞打算咪轉行,俾人打一身、坐監,或者有啲估唔到嘅嘢發生喺你身上,你問我係會驚?係咪因為咁就唔企出嚟?點解唔驚,但如果我唔企出嚟,應該為件事出一分力嘅時候而唔出一分力,我應該會遺憾。」

面對朋友和昔日同事的冷嘲熱諷,艾威說:「有啲人話你可以選擇唔做,離開咗公司唔應該講呢啲嘢,我又想問如果唔係因為有人企出嚟講,將個事實反映出嚟,今時今日TVB會唔會公開同大家講,我哋計劃將員工嘅福利提升?計劃將工作時間縮短?呢啲全部係有人講,佢哋聽到之後改善,而又同大家公佈嘅嘢。如果冇人講咗出嚟,TVB會唔會咁做?撫心自問一吓喇!」


■艾威以鯉魚門海鮮檔比喻免費電視牌照,汰弱留強,是商業社會定律。

怕人治禍港

艾威再說:「各為其主唔緊要,呢個我都係體諒,中國人有句說話叫知所進退,所謂知所進退係唔應該將自己嘅個人利益擺喺第一位,當然你問我個人利益有冇,呢個係一定會有,一為神功二為弟子,正如我當初跳槽,我唔係咁偉大,我為自己尋求突破,然後發現大家都好畀心機做好呢樣嘢。之不過攞番呢件事嚟睇,你會發現原來冇嘢係唔會發生,o依家好似變咗同政府對抗,真係好奇怪,呢啲真係冇可能發生喺民主咗咁多年嘅地方,無可否認,o依家係變緊,由法治變成人治。」

給特首的公開信


■艾威(右)在爭取發牌事件站在最前線,他盡力做無怨無悔。資料圖片

訪問結束前,艾威表示希望向特首發出一封公開信,內容如下:

特首梁振英先生:
請停一停,諗一諗,向自己的內心問一問,現時你所求得到的到底是甚麼,甚麼能給你最大滿足感,財富?相信絕對不是。權力?你已經擁有。能藉政務證明自己的才智?閣下之過人才智早已被認同。為人民服務?現正是大好時機。目前香港發生建制與民情相抵觸情況,雖說國有國法,必須遵守,但以閣下之才智及權力,若能與廣大市民理念一致,絕對能以一人之力,扭轉形勢,且合乎法規之內,到最後全城歡呼,或全城痛哭,閣下絕對能左右大局。請不要令賞識你的人失望(也包括小弟,小弟當日雖入息微薄,但也斗膽下重注與劉青雲打賭一支07 Lafite看看誰能做特首,我買你贏),請不要令你的子女有一個與民為敵的父親。
艾威