香港演藝人協會自曾志偉辭任後，會長一位一直懸空。上月改選，志偉屬意黃秋生接班，不過被秘書長陳芷菁以未入會為由，拒於協會門外不准進內，秋生隨即扮暈瞓地，以示不滿，又暗指陳芷菁騎劫協會，雙方互有「往來」。擾攘一輪，秋生決定棄選，並表示其內閣已經解散。會長究竟由邊個接任，頓成疑問。

今午演藝人協會眾成員齊集會址，再舉行投票，結果由成龍當選，擔任演藝人協會會長一職。

成龍亦是演藝人協會創會籌備委員之一，曾任演協第一屆（93年至95）及第二屆（95年至97）副會長，後獲選任第三屆（97年至99）及第四屆（99年至01年）會長；以及第五屆（01年至03年）、第六屆（03年至05年）及第七屆（05年至07年）名譽會長。至於首屆會長則是許冠文。

「民間特首」劉德華下屆出山？ 「好，你俾我諗一諗」

肥媽、唐季禮、苗僑偉及任達華則獲選副會長。司庫由丁羽擔任，陳芷菁續任秘書長一職。

成龍今日缺席，上任會長曾志偉就喺度。被問到是否擔心成龍成日唔喺香港，難以處理會務？佢就話：「其實上一次件事發生後，好多老臣子都好關心，好似阿倫、學友、成龍嗰啲都有扛嚟，好多，大家都關心個會，每人提過不同意見，綜合各方意見覺得，成龍係最適合。因為依家大家都覺得需要一個有份量嘅人出嚟。我都有問過華仔、學友，都覺得可以……因為各有不同意見，但大家都覺得成龍做最啱。雖然成龍成日唔喺香港，但只需要有一個好強嘅團隊幫成龍，係最合嶵適，喺今屆，為下一屆舖路。我有問過華仔嘅，佢話好，你俾我諗一諗。」

志偉謂，希望今屆可以多一啲新人事新作風，但同時亦需要保留有份量之舊人喺度。原來志偉之前亦有致電成龍，並透露成龍當時問：「如果我做會長，邊個做副會長？咁你選咗你話俾我知有咩人啦。」原來佢擔心合作夥伴係唔認識。所以選出副會長後，志偉即致電成龍，表示成龍都好滿意。「今日都好順利，選出嚟嘅名單都係大比數通過。」

志偉感激黃秋生贈意見：希望佢出年再出嚟

今屆選出由成龍擔任如今志偉擔任榮譽會長，佢話可以隨時返來開會，只係冇投票權，所以佢今日都有同會員講，叫大家放心，佢會一直關心個會嘅情況。「今年反為多咗人關心咗，噚日都有三四十入咗會，第一樣最重要嘅係吸納新血。秋生之前同我哋開過會，佢有啲提議好好，佢話最好每家公司都要有一個人，好似所有電視台、電台咁。秋生雖然冇嚟選，但佢俾咗好多寶貴意見。」

咁秋生依家係咪演協會員？志偉笑言要問查番先知：「我諗有啩，唔係上次佢點嚟選呀？」對於秋生曾表示寫咗封信俾志偉，但志偉冇覆，今日佢就澄清謂事後有覆到秋生：「我同佢保持聯絡嘅。最早係我搵佢嘅，我一定要將呢件事做得圓圓滿滿，亦希望佢出年可以再一次出嚟。秋生嘅參與，令大家著重咗好多問題，因為佢係一個好積極嘅人。當時華仔見到秋生選佢都覺得好開心，因為秋生同佢好多理念相似。所以我今次會盡量提多啲，秋生提過嘅意見俾佢哋參考。」