成龍發表「天災論」想有海嘯地震 曾志偉:他表達有問題,只能用功夫表達

成龍又再因失言撞板,事緣成龍同導演到美國宣傳新片時,喺加州受訪時,被問到點睇中美兩國關係,成龍話唔只中美兩國人民要合作,全世界嘅人都要合作,點知成龍跟住就發表「天災論」,佢話:「我不應該這麼說,但有時候,我會想看到部份國家出現災難,像是大海嘯、或者是大地震。」

之後佢急急補充,但越講越錯:「因為災難來臨後,你可以看到全世界,大家立刻湧入這個國家幫忙,我非常的高興。」

成龍嘅言論備受爭議,而圈中人亦有回應成龍「天災論」,G.E.M.就話:「前輩講嘢,後輩唔好咁多意見。」

至於曾志偉今日喺觀塘召開記者會,除咗表明辭去演藝人協會會長一職外,亦回應成龍失言一事,佢話:「成日都係咁嘅人,聽咗啲嘢唔識消化,就發生咁嘅事,佢以為搞多啲天災人禍就唔會打仗,呢個老友我服咗佢,佢心地善良,但表達有問題,只能用功夫表達。」

劉嘉玲喺上海出席連卡佛旗艦店開幕時,講到成龍又失言,佢好驚訝咁話:「佢唔會咁講啩?應該係言語間誤會,心裡面唔會咁諗,冇理由會發生咁嘅事,個個都希望地球健康生活和諧,唔會有乜災難。」

成龍「天災論」

對於被指「幸災樂禍」,身在美國拉斯維加斯的成龍接受長途電話訪問,對於今次被曲解及評擊,他直言已習以為常:「邊度會有人鍾意見到天災人禍呢?我嘅意思只不過係想大家守望相助同團結,唔好無故生事端啫。唔知點解會被曲解意思,不過我冇所謂,了解明白我嘅人就會了解,嗰啲鍾意斷章取義造新聞嘅人,我講乜都冇用。(唔嬲?)咁多年,我百毒不侵。」

【即時搞gag】成龍唔拍戲,做得咩?

成龍都就嚟60歲啦,不過連腦勺都未生埋,居然詛咒天災降臨,惹嚟全天下男人嘅憤怒!自認讀書少嘅佢,唔拍戲,仲可以做啲乜?

撰文:蘇芬妮

1. 做《亂噏24》主持,同肥佬黎、蔡瀾、倪匡擦出火花。

2. 做特首,佢係大哥嘛,就唔使驚「順得哥情失嫂意」啦!

3. 做《May姐有請》主持,佢亂噏嗰陣,睇吓May姐仲笑唔笑得出。

4. 做人肉沙包。

5. 做高官。反正啲高官都係亂噏啦,成龍斷估好戲過蘇錦樑。

6. 做spin doctor。能有效地轉移大眾視線。

7. 做外交大使,派佢同菲律賓總統會面,正所謂一物治一物。

8. 做亞視台慶,到時啲壽包係由台下掟番上台上。

9. 做棟篤笑,呀唔係,係棟篤怒。

10. 做乜啫!計我話乜都唔好做,咁就唔會有天災。

霸王潮文又要出動喇!

呀……當我第一次知道要回答中英關係的時候,其實我是拒絕的!因為我覺得……呀……你不能叫我答、馬上答,第一,我要想一下,我又不想說……我套電影拍完以後倚靠你美國,那票房動啊……很強!很大!很酷!結果觀眾出來一定罵我,根本是套垃圾!這證明這宣傳是假的……我說先要給我想一下。後來我經思考也知道不應該這樣說,而且沒理由這樣說。那……有時真想見……想見到天災降臨呢……起碼是大海嘯或大地震吧。現在呢……每天還在想!每天還在想呢……我還祈了個禱!來!來!來!天災來臨呀!那我跟全球講:「來的時候就來!發生大災難後,你可看見全球人幫助那個國家,我很開心,再飛到國家去,全世界也應該這樣子!我要給觀眾看到,沒有海嘯、沒有地震,你們就沒事可做,就有政治問題了!