張學友愈戰愈勇 52歲再搞舞台劇 買智能電話玩facebook

「柴九」哥金句:人生有幾多個10年?上月10日「歌神」張學友剛度過52歲牛一,公認愛家好男人的他自爆3大生日願望,努力keep fit,保持健康體魄,狀態才能大勇,亦計劃「親生仔」《雪狼湖》20周年時搞全新音樂劇,現正公開徵求劇本!不過,最過癮的是學友密謀開設facebook戶口及下載WhatsApp跟愛女,12歲瑤華和8歲瑤萱溝通,學友帶點不好意思笑着說:「哎呀,你唔明,對我嚟講真係好大件事㗎,因為我唔係用智能電話,電話只能打出打入!」「歌神」歌藝永遠站在前線,但潮流步速卻墮後,學友,加油呀! 採訪:方騫平

「歌神」張學友「1/2世紀演唱會」以18個月內完成146場演出,再次創下華人歌手單次巡迴演唱會的場次新紀錄。而追求完美的學友在演唱會完結14個月後才推出現場實況CD及DVD,後者預訂數字更高達4萬張,「歌神」地位無可取代!上周,學友接受陳海琪的新電台節目《海琪的天空》訪問時,表示愈來愈喜歡歌手這份工作,隨着人生每個階段,都可唱出不同感情來,他說:「以前好在意比較,但2011年演唱會就好enjoy自己個舞台,感覺變得好舒服,所以堅持唔會退休,唱到80歲都唔錯呀,我把聲係父母畀我嘅禮物。」

自爆怕老婆

結婚17年的學友自爆怕老婆羅美薇:「哈哈!以我做成功男士模範嘅話,有好大機會發達的!」他坦言目前只對音樂事業有奢求,生日願望唔會諗囡囡!他說:「佢哋日後點,讀書、結婚自己處理喇,就算佢哋將來結唔結婚,揀男定揀女都係自己事,但我要知道囉,所以籌備開facebook及WhatsApp同兩個囡囡聯繫。兩個女暫時仲未有facebook,但會用WhatsApp跟媽咪溝通,我部手機就冇得上網嘅,對我嚟講要裝就好大件事,連手機同個plan都要換埋,要慢慢學呀!」

公開徵劇本

至於音樂事業大計,學友披露,現正着手籌備一個全新舞台劇,希望長做長有!「講咗好多年,但真係做嘅話就唔係咁容易,實在有太多顧慮!我連故事都未有呀,真係,連丁點構思都冇,要先有故事,下一步才去物色女主角,其實我都好心急,好想盡快做得成,做乜劇本都可以,當然要加入愛情素材啦,我呢啲一向都唱情歌㗎嘛!唯有公開徵求劇本啦!」

健康住家男

雖然已50有2,但學友愈戰愈勇,男人味滿到瀉,他哈哈大笑:「我呢啲要出嚟見人,靠個樣去搵食,梗係要打網球保持健康啦!年輕時可以放縱吓,家陣新陳代謝慢,要注意飲食,平日食住家飯,老婆會好留意食物卡路里,佢煮飯基本上唔落油,除非我經常出街參與飯局,飲酒就會變肥,但我多數留喺屋企開飯。」

新一代歌手中,學友最like陳奕迅:「佢啱啱出道時已睇好佢,因為佢唱歌好好聽,又係我歌迷。」另外,他點名大讚組合RubberBand同C AllStar,應該可以長青。

雖年過五十,但張學友零老態,男人味滿瀉外,幽默風趣更勝年輕時。
雖年過五十,但學友零老態,男人味滿瀉外,幽默風趣更勝年輕時。

3代歌神

許冠傑

年齡:64歲
家庭狀況:妻子Rebu、兩子許懷欣(Ryan)、細仔許懷谷
創舉:香港樂壇最具影響力的天王,經典歌無數,1992年宣佈退休。2004年舉行復出演唱會,10萬張門券一夜間搶購一空。
現況:半退休狀態,傳揼水幫兩子出唱片。

張學友

年齡:52歲
家庭狀況:妻子羅美薇、兩女12歲瑤華和8歲瑤萱
創舉:「1/2世紀演唱會」以18個月內完成146場演出,再次創下華人歌手單次巡迴演唱會的場次新紀錄,進帳超過7,000萬。
現況:籌備一個全新舞台劇及出唱片

陳奕迅

年齡:39歲
家庭狀況:妻子徐濠縈、8歲女兒康堤
創舉:2012年《DUO 陳奕迅2012演唱會》倫敦站開賣,門票20分鍾內即售罄,成了O2 Arena售票速度最快紀錄的第二名,僅次於Michael Jackson,陳奕迅也成了首位站上O2 Arena的華人歌手。
現況:剛完成25場《EASON’S LIFE陳奕迅演唱會》,進帳2250萬。