相對於「陳智燊」，其實我更熟識「Jason Chan」。
那時候，他還在主持明珠台的《Dolce Vita》，每次我跟別人談起他，只要附註一句「好靚仔9個個」，對方即使沒怎樣看過這節目，也會對他很有印象。
靚仔，可說就是Jason的標記，而我也相信，今年三十三歲、身高五呎十的他，應該亦受過了無限次這樣的讚賞，於是，我直截了當問他，可會覺得自己靚仔，誰不知他即時一臉通紅，笑得十分靦腆。
「?，嗯……呢個問題好尷尬呀！哈哈哈！我都有聽人咁講過0既……」他的臉龐顯得更加紅。「我個樣……都算OK?……哈哈哈！」說罷，他依起棚牙對?我尷尬地笑。
然後，我明白了為何他會被公認為繼陳豪之後的新紮筍盤，為何升呢在《誰家灶頭無煙火》當男主角後，人氣會迅速急升，迷倒一眾大小女性。
可能，他真的缺少阿Mo的忠厚感，沒有林峯的chok，不夠鄭嘉穎man，但他卻有一份現時靚仔小生中罕有的戇直和傻氣，青澀親切得猶如鄰家大男孩。
就如訪問這天，他對著我這位師奶仔，竟然都可以嘻嘻哈哈吹水吹足一個下午，擁有這樣強的親和力，笑容又這樣sweet，講中文口音又唔太正，試問觀眾們點會唔buy？
BBC
總覺得陳智燊擁有這份獨特的耿直和傻傻氣質，多少跟他的成長背景有莫大的關係。他是純正的BBC（British born Chinese），父親在倫敦經營餐館，聽說頗有家底。
「我屋企唔可以話係有錢，只可以話係OK。我阿爸十六七歲時同朋友去英國搵0野做，廿幾歲返0黎同我媽咪結0左婚之後，先再返英國定居。我好細個時，屋企曾經0係蘇格蘭住過兩年，然後到我三、四歲至廿幾歲，都0係倫敦住。我阿爸係一家經濟支柱，為0左我0地四兄弟0既學費，其實都捱得幾辛苦0架，好在個個都讀到大學畢業，算係咁啦。」
他是家中老二，據他形容，一屋男人，個個脾氣又剛烈，所以小時候家裏經常家嘈屋閉。「嘩！真係幾惡頂?！我細個0個陣脾氣好臭，成日都自己撻闔自己咁，經常同阿爸阿媽嘈，同阿哥細佬打交，又會亂咁掟0野。我試過有次發脾氣時，用個杯墊掟爛0左我阿爸個水晶盤，跟住我0地夾手夾腳收埋0的玻璃碎，我阿媽又好nice呀，阿爸放工返0黎都冇話佢聽。仲有我屋企沖涼房門個鉸，有道好深0既裂痕，就係我0地幾個每次發脾氣好大力閂門?傑作！諗起都覺得好搞笑！不過細路仔唔打?交、鬧?交，真係會好悶0架！」
Chinese
Jason說，由於小時候friend的同學仔都是老外，故他懂得中文，都是拜他的母親所賜。「我阿媽好搞笑0架，佢一直都唔肯學英文，可能佢係全職家庭主婦，覺得唔需要學0卦，所以0係屋企我0地都係講中文，我同阿哥就用英文交談，方便0的。最近我有次打電話返去，我阿媽接聽，我貪玩用英文問佢可唔可以叫陳生聽電話，佢竟然用0的唔係好流利0既英文話唔0係度就cup0左我線..?！唔係呀話？你唔識講都唔好cup我線呀！我唔覺得佢唔認得我把聲囉！哈哈哈！不過，好彩我阿媽係講中文，如果唔係，我0既中文根本就係零，冇信心去講。」
升讀大學時，他為了將來方便搵工，揀選修讀經濟和語文，十八九歲才正式認真去學中文。「睇同寫，之前除0左我個名之外，只係識『你』、『我』、『日』、『月』好簡單0既單字，算係唔識0架。後來我讀大學時，有年要去北京留學，咪狂寫囉，好似寫copybook咁，寫滿一張A4紙，寫到我記得為止囉！真係一個好艱苦0既過程呀！最衰狂寫完，之後都未必記得0的筆畫係點寫喎，又冇得拼音拼出?，好難！『你』、『我』、『吃』、『飯』，嘩！寫到人都癲呀！所以我好唔明，香港0的細路仔，點學中文0架？狂寫copybook，好悶0架喎！」
日子有功，幾年努力學習中文，換來的，是今天睇劇本不用寫譯音咁煩。「真係甚少！可能間中有?字會唔識或唔明個意思囉。」
TVB
大學畢業後，他做過網站繙譯，又在英國醫院做過兩年行政工作。「醫院有工見，咪做住先囉，我讀經濟，所以本來打算做會計師、投資銀行0個0的，但一直未搵到。」
後來，他回想起十八九歲時發過一陣子的明星夢。「我細個時，英國都有得睇TVB，可能只係遲個幾星期。然後我睇到王力宏同吳彥祖都係外國返0黎，入0左行好似玩得幾開心喎，加上我當時已經廿四、五歲，咪的起心肝返0黎香港試?入行囉。其實都係先斬後奏?，我同阿爸阿媽講，返?搵工，頭一年我教英文，第二年入0左TVB藝訓班，先同阿媽講，當時佢好擔心，我好開心，幾矛盾0架。」
Jason說，當年若讀不到藝訓班，曾有過參選港男的念頭。「上台參加選美0既人好叻、好有勇氣，我好佩服佢0地，嘩，要?班女士們面前咁樣（說時舉起雙手，擺出扮大隻佬的甫士），我真係未必得！哈哈。」
入了藝訓班，雖說人生已開始有明確方向，但現實生活卻並不易過。「我本身都有儲0左筆錢先返0黎，但始終唔係好多，咪keep住慢慢使囉，同埋返0黎最初係同婆婆住，都撐得住0既。最慘0既時候，係入0左TVB讀藝訓班，每個月有少少搭車津貼，實習時都有四、五千蚊月薪，0個陣我又已經搬0左出0黎住，唔係幾維持到自己生活，衫都冇買件0架！點買呀？咪窮住0黎生活囉，好彩租係同friend share囉。」
藝訓班順利畢業後，剛好明珠台開新節目《Dolce Vita》，即獲監製揀中當主持。「中國人有句說話……咩0野有個地理？（天時地利人和）係囉係囉，0的timing真係好正呀！我讀完藝訓班就入去做《Dolce Vita》主持，半年到娛樂新聞台開，我又加入埋，keep住兩個節目一齊做，錢賺得唔係好多，我當時灰心0架！但我知道只要keep住做落去，將來會發展得更加好，而且兩個節目都好好玩！拍《Dolce Vita》時，可能一日只係拍食個lunch，幾個鐘就收工，又可以去到瑞士表展兩次喎！我有時同人講起，都有0的唔好意思！哈哈！」
沒多久，Jason更被安排客串劇集。「我簽TVB時已經廿七歲，好遲！好在個樣呃?人囉！哈哈！我最大缺點係冇乜演藝經驗，演技惟有用人生經歷搭夠囉！有好多個角色我都好深刻印象0架！好似《談情說案》裏面，我做基Joe，殺0左自己男友……（說到這裏，他自己忍不住笑起來）監製話出0黎效果幾好，我好開心?！然後又拍《情人眼裏高一D》，我0係第一集唔知第幾場做0左一個角色，個roller subtitle叫『英俊色狼』……哈哈哈！好搞笑！」
我問他，終於能在處境劇《誰家灶頭無煙火》擔正，會否覺得被公司力捧，他又臉紅起來。「?？我覺得公司好錫我，畀0左好多機會我囉……嗯……其實我0依家最大目標，係做好『鍾思翰』，因為監製話我仲有好多感情位未拿?得好……不過呢，0依家我出街，的確多人識0左，雖然可能叫唔出我個名，但我都好開心0架啦！嘻嘻！」
眼前的Jason，忽然像十足一個小學生。
靚仔的官腔
兩個人馬座的對談，一定不會認真得去邊。
整個訪問過程，其實吹水的時間比較多，只要每問到某個問題，陳智燊總會給我很詳細的答案，然後談到無邊無際，說說香港天氣、傾了很多電影，繼而又講到香港人搭港鐵的禮貌問題，巴啦巴啦，非正式統計，要是全都記下來的話，應該會逾洋洋萬字，足以輯錄成一本吹水書。
唯一較為官腔的話題，是談到他的感情生活。有說他曾連?TVB四小花、是溝女王，又有說他跟拍檔宋熙年熱戀中。
「我唔係好鍾意『溝女王』呢個名囉。」他扁扁嘴說。「我同佢0地只係拍檔過0既同事，咁樣講，都會好影響女仔0架嘛。宋熙年，都只係好朋友好同事，我冇拍拖！」頓了頓，他再補充：「0依家我都會以事業為
重囉。」
最後一句，猶幸他表達時還未到爐火純青的地步。
▲跟宋熙年的緋聞傳了好幾年，但二人卻堅決否認。
▲五歲時的Jason（左一），跟哥哥和細佬露營。
▲才幾個月大的BB Jason。
▲大學畢業禮後，和年輕他十三年的細細佬，玩Star Wars打交，扮黑武士。
▲十歲，不知不覺間變了小肥仔。
▲二○○○年，Jason（左一）大學畢業，跟家人合照。
▲人氣急升後，他被譽為陳豪後的另一筍盤。
▲當過主持又客串過劇集，來到《誰家灶頭無煙火》，Jason終於擔正。
▲主持《Dolce Vita》，Jason不諱言勁好玩！