有些戀情見光死，房祖名與薛凱琪（Fiona）當年戀情曝光，關係無疾而終！「祖薛」近年各自精彩，不過兜兜轉轉，祖名始終最愛Fiona，二人更收收埋埋，發展一段絕密地下情！趁周杰倫上星期來港，他們更相約周董篤波洗塵！兩口子由得周董耍帥表演，自己則匿埋暗角摸酒杯底煙韌談心，難得身為天王的周董都肯做掩護，讓「祖薛」慢慢癡纏！

酒過三巡，二人警覺性降低，祖名先行攞車，Fiona為會合愛郎猛撳手機，當祖名Benz駛到，她即熟練跳上前座，擺明分開半秒也不行，同「車」關係斷正，Fiona尷尬甜笑！

薛凱琪翻撻玄機：祖名係好男仔

Fiona昨日在電話中為跟祖名「同車」鐵證親自解話，她自揭當晚祖名跟謝霆鋒、方大同、徐濠縈等約食飯，並在微博上載照片，但她因為錄音而未能出現，之後她才跟祖名、周董再會合去飲嘢。對於「翻撻」斷正，Fiona冧笑說：「都話唔係翻，都冇撻過，我哋耐不耐都會食飯見面。」祖名帶她這個「女友」見朋友？她笑說：「唔係，祖名最鍾意成班一齊，佢最愛熱鬧。」

避談發展機會

對與祖名的緋聞傳個不停，Fiona並不在意，更對祖名讚不絕口，她笑說：「做藝人預咗畀人寫，寫我同祖名好過寫一個我唔friend嘅人，佢係好男仔，記者要寫，寫佢好過。」祖名既然是她口中的好男仔，何不好好考慮呢？她不置可否笑說：「大家都好忙，冇考慮任何嘢。（有冇發展機會？）大家係朋友，冇話機唔機會。（唔排除有發展可能？）我唔會答。」截稿前祖名未有回覆。