無綫重頭劇《衝上雲霄II》開播四周以來，42歲風流機長「Cool魔」張智霖奉旨食盡「珍饈百味」，上周肉搏「Holiday」法拉一幕令Chilam出盡風頭。本周輪到深情「Sam哥」吳鎮宇發威，交代跟已故愛妻「蘇怡」的生死結。而下周便是馬國明的世界，劇情發展到43歲的「Heather」江美儀將會吸乾39歲「高志宏」馬國明，兩人將上演採陽補陰式「姊弟戀」，美儀怕羞欲言又止：「我哋會有好多場情慾戲，一嚟就入直路，總之一路激咀一路除衫，由露台錫到上牀，連10號風球打到嚟都唔理。」完事後，馬明大讚美儀演技了得：「佢好專業，牀戲演繹一流！感覺好正，可以帶到我入戲！」看來馬明好回味！

採訪：方騫平　攝影：畢紹基
化妝：Suko@ chinni ching(江美儀)
髮型：Ivan Lee@headquarters(江美儀)

馬國明與江美儀先於《名媛望族》中演母子，再於《衝上雲霄Ⅱ》做玩伴，大玩「多夜情」，最後演變成「姊弟戀」，「Head姐」因為夠善解人意，又o氹得「Dee Dee」開心，最後成功擊敗青春無敵、上下激凸的Coffee及大方得體的陳倩揚坐正成為正印女友，總算修成正果！

牀上玩搞笑

下周情節輪到馬明「起飛」！劇情講到失婚後寂寞難耐的「Head姐」跟細她3年的高級副機長高志宏撻着，血氣方剛的後者正好彌補到前者的缺失，天時地利人和配合下，兩人的慾火一發不可收拾。馬明預告說：「我地一嚟就上牀，因為講Head姐睇中高志宏後生兼有精力，所以我要發揮牀上熱情同激情一面，但唔算好埋身肉搏，一定唔及法拉同Chilam咁出位，不過，又要表達到係姊弟戀，就算牀戲都會加插一啲姐姐o氹細路嘅動態，有搞笑元素，唔係一般嘅牀戲，好彩有個經驗豐富、演技出眾嘅對手，我哋拍親熱戲不但冇尷尬，仲互相帶到對方入戲，戲裏由原先只係心靈上互相扶持引發嘅有性冇愛關係，到最後高志宏真係愛上善解人意嘅Head姐㗎！」

激讚江美儀

雖然被網民狂轟是「母子戀」，認為江美儀襯唔起馬明，但馬明冇嫌過美儀，反而激讚對方：「我冇嫌棄過佢，美儀絕對襯得起我喎，因為性格問題，高志宏係會揀Head姐，呢方面劇情都會有交代，佢哋關係發展係好合情合理，可能網民睇慣我同楊怡一齊，先至有呢個睇法！」

至於「Head姐」江美儀又點睇？她哈哈大笑說：「第一次同筍盤合作，真係益我，其實最初接呢套戲時都有壓力㗎，因為從未演過姊弟戀，好彩劇情發展可以幫到我入戲。我哋有好多場情慾戲，一開波就咀晒，由朝咀到黑，所以拍戲時交叉感染，不停感冒，今次就唔使着黑絲同性感睡衣！只係感覺激情，攬吓錫吓正常男女親熱戲啫！點知好冇陰功咁俾馬明粉絲鬧，話我老過佢，其實我想講我只係大過佢3年啫，佢個樣生得低能唔可以嘅？點解要話我？」

唔恨爭出位的江美儀更強調：「我哋唔想用牀戲同咀戲做焦點，唔係用呢樣嘢去吸引人，大家咁睇嘅話就太過膚淺，我真係滿足唔到你哋，我希望透過我同馬明嘅激情可以感動到大家，連觀眾都好想呢對姊弟戀可以走埋一齊，咁就證明到我哋嘅功力！」

邪味熟女

去年，43歲的江美儀在《名媛望族》中以黑絲色誘劉松仁惹來不少投訴，但有人嘈代表有人看，美儀都不知幾開心，而且演開大家閨秀的她成功擴闊戲路，亦正亦邪，有排玩。