現年43歲的江希文為63歲資深大律師兼全國政協胡漢清未婚生女，可是囡囡仍未滿兩歲已緣盡分手，江希文被指控霸佔胡家豪宅及苛索巨額養女費；然而，事件昨日峯迴路轉，她左腹半呎長瘀傷的相片曝光，疑被打的江希文接受電話訪問，坦言已經報警處理，還大爆被人用粗口辱罵「臭X」，身心受創的她想盡快離開恐怖環境，嚎哭說：「我好驚，好冇天理，繼續落去我會黐線！」

江希文與年長二十年的胡漢清於大前年底奉女訂婚，囡囡至今近兩歲，但二人仍沒註冊，上周胡漢清宣告已分手兩個月，與江希文母女仍同住沙宣道四千呎胡宅但分房瞓，有傳江希文出辣招霸佔胡宅，要求胡漢清租南區豪宅給兩母女住，令外間以為女方金錢至上。昨日江希文左腹半呎長瘀傷相片曝光，令全城譁然，去年九月被打的江希文，昨開腔接受電話訪問，聲淚俱下作出大反擊。

慘遭毆打的江希文左腹有半呎長瘀傷，十分嚇人，她直認日前已報警處理。

江希文被打後勸女性不要容忍，最緊要保護自己。

去年底江希文公開出席活動，當日她未有提曾慘遭推撞受傷。資料圖片

反擊保護自己

問到是否被打？江希文喊着說：「我好驚，唔敢講，俾人推撞落枱，前幾日報咗警，警方話記錄在案。之前我唔想搞大件事，但俾人作好多假嘢誣衊我，好冇天理。」為甚麼被人打？江希文嘆氣：「佢脾性好多人知，乜都要聽佢講，控制慾好強，你有自己意見佢就爆發，點可以咁？我唔係工人唔係奴隸，超出容忍底線，好恐怖好恐怖好恐怖！如果再繼續落去我都會黐線，希望件事快啲完結。」受到暴力對待的她挺身而出說：「勸女性唔好容忍，保護自己最緊要，人生苦短，就算我聽日有乜事，有人搞我都好，今日有一口氣都要講出嚟，我驚佢搞我、BB、屋企人，呢個人真係好恐怖！」

此外，對於被指控貪錢霸佔胡宅，將胡漢清與前妻兒子的房霸做BB房，又將私人電腦擺廚房霸佔，江希文呼冤：「BB床係佢個女嘅舊床，係佢攞嚟擺喺個仔間房，電腦擺喺廚房偏廳張枱，大家食飯睇住當電視。我乜錢都冇攞過，點樣同個女離開？我邊有話要買樓，租屋咋，但租屋錢都冇點搬？佢畀嘅錢完全唔足夠租正常屋，攞槍指住我都冇能力搬。」問每月有多少家用？她坦言：「一定冇六位數，有就唔使咁慘，工人一早都冇，畀佢鬧走咗。我都係揸番自己架舊車。」點解不回娘家住？她說：「家姐（江欣燕）都住緊，又好多貓，女有鼻敏感，唔係最適合嘅地方，而且冇房要瞓梳化，長期唔係辦法。」

雖然與胡沒註冊，但育有一名女兒，分手有很多事要處理，江希文說：「呢件事去咗律師度，搞緊贍養費，唔想講太多，希望大家明白我處境，o依家我好徬徨，我都好想離開，希望對方盡快畀合理贍養費，畀空間大家行，我知道佢都唔想對住我，佢呢幾日冇返屋企。」有否第三者出現？她說：「唔知，但佢唔想我返香港，如果老公錫你，點解唔想一齊住？」

江希文坦言當初覺得胡漢清好錫自己。資料圖片

江希文盼盡快帶囡囡離開胡宅（圖）。資料圖片

囡囡攬住安慰

有指江希文曾被人用粗口辱罵，她委屈說：「佢鬧我『臭X』，少少唔滿意咪粗口鬧你，唔想BB喺咁環境下成長，BB開始學講嘢，我唔想佢聽到粗言穢語，唔想對佢有陰影。去英國之前好好，去咗英國好唔同。唔知點解變成咁，你問番佢，完全唔似屋企人，好似打佢工，有乜事炒你魷魚。」問對這段感情是否後悔？她再泣不成聲說：「最大安慰係個女，佢好生性，佢見到我喊，佢攬住我講『媽咪，OK！』由英國到??家都相依為命，我生BB佢都冇嚟英國，點解人哋大肚咁，我就咁？??家只想好好哋養大囡囡，有安定生活已經滿足，唔理大家評價。」

江希文以歌手身份出道，有樣有身材的她，亦間中以性感示人。曾經加入無綫拍劇，在吳啟華版《倚天屠龍記》飾小昭等。

江希文多年來感情坎坷，而家姐江欣燕亦月前跟吳積遜離婚，相信兩姊妹互相扶持。

爭鬥大龍鳳

一直以來，胡漢清和江希文都是站在同一陣線夾攻胡老太莊永楚，有女在手的江希文即使對着奶奶亦絕冇退讓。經過一輪惡鬥之後，胡老太去年已搬到加國，奈何最終胡漢清和江希文這一對亦分手收場，果然人生如戲。

開記招怒斥兒子
13年 3月，當時已 84歲的胡老太由白韻琹和謝偉俊陪同開記招。她哭訴兒子胡漢清侵佔其 2,000萬家產，指控他不孝，又禁她返回沙宣道大宅，要求歸還上海大宅和 1,150萬元賣樓收益。胡老太直指兒子與江希文一起之後，整個人都變了，更沒有供養母親，自己要變賣首飾過活，又遭江希文拒於屋外。

江發微博呼寃
當時正在英國待產的江希文，突然連發十三條微博為自己和胡申寃，透露胡漢清一早希望母親可搬回港或上海同住，只是對方決定在加拿大買新屋長居。指胡老太向傳媒說是胡漢清趕她離開，是偽造事實來傷害他們。

胡老太加國獨居
同年 4月，兩母子共同發聲明，指經調解員的積極調解後，已達成和解。兩人簽下和解協議，完成大宅業權交收手續後，胡老太便避走加國獨自生活。

江希文坐正
14年 5月，記者發現在英國為胡漢清誕下女兒的江希文返港定居，以勝利者姿態正式進駐夫家沙宣道的億元巨宅。