喬寶寶因老婆不獲申請香港護照，月前被逼回蘇格蘭坐移民監，不過皇天不負有心人，日前太太獲批三年蘇格蘭的居留權，而喬寶寶亦不用坐移民監，正式回歸香港。

他出席慈善演唱會記者會時，亦難掩興奮心情：「九月三十日收到通知，我同老婆都好開心，我終於可以江山再起，啱啱去到嗰邊身無分文，因為英國間餐廳入息唔多，全靠黑妹姐（李麗霞）幫我接咗好多工作」喬寶寶又笑言早前因不捨香港而流淚：「白流眼淚啦，不過我都冇諗過咁快可以番嚟，已同啲舊同事慶祝。」他又提到在今次演唱會將表演棟篤笑：「唔會講政治，反而想娛樂吓人。」

現時佢同細妹喺蘇格蘭合資嘅餐館，就交由細妹、妹夫打理，佢就喺香港做嘢：「我唔太慣蘇格蘭生活，會間中返。本身我同無綫請假到11月，依家提早消假。」