訪問一開始，鄭敬基（Joe）便開宗明義說自己是反面教材：曾有一個幸福的四口之家，有一對仔女鄭家揚（JT）和鄭依揚（Natalie），但他沒有珍惜，瞞着前妻搞小三，最少三次被前妻Winsome揭發，忍無可忍之下離婚，當時正值1998年，Joe主演的電視劇《烈火雄心》爆紅，事業攀上高峰，為了挽救婚姻，急急放下一切返加拿大箍煲，可惜一切已經太遲。
Joe搬到一間殘屋自責痛哭兩年，尋找婚姻輔導，與妻兒坦承相對，獲得原諒。一對仔女跟隨媽媽生活，實質是五人行，「佢同依家丈夫好大方，俾我搬到附近，方便隨時探仔女，前妻又調教得仔女好好，令佢哋冇嬲我，仲同我好close，我同前妻同佢丈夫更加係好朋友。連張堅庭都話，呢個劇情寫都寫唔到。」
前妻揭出軌3次
鄭敬基80年代出道，是二人組合「風雲」成員，可惜一碟散band，作個人發展後紅了一曲《酒杯敲鋼琴》，可惜紅歌不紅人。後來加入TVB拍劇，一直只做二三線角色，他有感事業去到樽頸位，1995年一家四口移民到加拿大，當時長子JT 5歲、幼女Natalie只得1歲。頭兩年他主要做電台工作，間中返港拍劇，生活穩定。直到1998年《烈火雄心》司徒拔一角，結局跳樓自殺全港喊爆，一班觀眾以及Joe身邊所有人，都驚覺「鄭敬基真係識做戲！」以為終於等到機會上位，結果因犯了男人最錯，賠上婚姻和事業。拍此劇背後，Joe正面對離婚危機。
「我返嚟拍《烈火雄心》之前，前妻已經同我提出離婚，拍呢套劇大約要半年，佢話：『二哥（前妻對Joe暱稱）呀，你返香港半年，我覺得呢……我唔想你每一次唔打電話番嚟，又或者睇到你咩新聞，我個心會承受好大嘅怯，不如我哋離婚啦。』佢好坦白，好冷靜。」
Joe一直沒甚緋聞，形象搞笑討好，原來背後三番四次出軌，令Winsome過着提心吊膽的生活，「由我第一次出軌，到第N次出軌，被佢發現咗三次，暗地裏仲有好多次。我個心成日都唔settle，當一個男人個心唔settle，女人就有危機感，同你一齊就諗你幾時又會變呢？幾時又會鍾意第二個呢？鄭敬基係有晒呢啲元素俾一個女人，你諗吓我個ex幾慘！」
拍劇時Joe心神恍惚，同劇拍檔錢嘉樂看到有異樣，請他回家訴心聲，是第一個圈中人得知他受婚變困擾，「我同佢第一個星期都唔識嘅，但我同佢多對手戲，開始熟，佢問我『你做乜心神恍惚？上嚟我屋企傾吓啦。』」自此成為好兄弟。劇集取得空前成功，但Joe決定捨棄事業挽救婚姻，「《烈火雄心》得咗，收視50點，唔使諗啦，每個藝人夢寐以求都係等一個機會啫，之後有次我同王喜睇電影首映，個腦突然出現咗強烈訊息，當時我坐喺王喜隔籬諗緊，如果我今次唔返去，即使《烈火雄心》50點帶俾我將來成功，我都會倒蝕，就係咁決定返加拿大。」
細女鄭依揚 (Natalie)19歲
大仔鄭家揚 (JT)23歲
妻兒毫無怨恨
箍煲無效，前妻去意已決。離婚後半年最難捱，Joe繼續工作，前妻負責輔導子女，臨近聖誕節他再探家人，是離婚後首次，前妻和仔女不但沒怨恨，感情更像從前，只有Joe心中有愧，「喺呢段咁殘忍嘅時期，前妻不但冇嬲，仲輔導得佢哋好好。我一入到去，個女走埋嚟錫我，個仔又同我傾偈，前妻仲叫佢哋同爸爸講goodnight，佢仲講得出呢啲說話。我前妻好creative，佢要同仔女解釋點解爸爸唔返嚟瞓，啲細路問佢『你唔愛爸爸喇？』佢話『你老師都唔同你瞓㗎，咁老師愛唔愛你吖？』細路仔logic好簡單，只要解釋到，細路就唔會再問，會接受咗。」
離開後他終於感到失去家庭，「當我行出門口，回望番間屋，見到好warm嘅燈、聖誕樹，第一次感覺到冇咗個家。」之後他租了一間殘屋，自閉兩年，對生活失去興趣，不想接觸外人，只想追回前妻，但前妻不想再擔驚受怕而拒絕，更找到新的另一半Peter，重過新生活。
9歲兒聞巨變：I understand
Joe在電台好友介紹下，開始閱讀、看日劇，研究修補兩性關係，又尋求婚姻輔導，「輔導話當你犯咗咁大錯誤，尤其搞到離婚，要喺最短時間內，講個真相俾小朋友聽，如果唔係小朋友會多嘢諗，點解家長日爸爸唔出現呢？當個屋企咁多秘密，小朋友都會諗一啲秘密掩飾，盡量唔俾人問屋企嘢，所以好多小朋友做啲嘢好extreme，有啲好沉靜、紋晒身，或者特別叻。所以有日我接仔女放學，同佢哋去老麥食雪糕，個女掛住食，我就同個仔講，『JT，你要聽清楚爸爸嘅說話，你要forgive爸爸做咗一件好錯嘅事：當媽咪好愛爸爸嗰陣，爸爸愛上咗第二啲女人，唔只一個。』佢聽完走咗過嚟，拍拍我膊頭，嗰陣佢9歲，佢話：『得㗎喇，I understand，can we talk about something else？（我明白，我們可以講其他話題嗎？）」我第一次感覺到黑暗中有一點光。原來細路仔比你想像中聰明好多，佢哋只想開開心心，只要誠實解決咗問題，就可以開始build up番開心時光，之前因為離婚失去咗好多時光。」
大方情敵：隨時探仔女
前妻2000年與新歡Peter再婚，情敵Peter感謝Joe出席，更交低屋企鎖匙，大方得難以置信，「你咁錫你啲仔女，你可以隨時上嚟探仔女㗎！」他們搬了5次屋，Peter每次都有交低鎖匙，更主動提出到機場接送Joe，「有兩次我真係叫佢車我，試吓佢吖嘛，佢真係咁大方喎！」連前妻都不計前嫌，原諒了Joe，「有日我同佢食晏，佢話我依家對啲小朋友好好，但一擰轉面就愁眉苦臉。有番說話我到今時今日都記住，佢話：『你記住，即使第日你老咗，第日再婚識過第二個女仔，你啲小朋友永遠都錫你、原諒你；第二，我都原諒咗你；第三，主都原諒你，但你要原諒自己。』我前妻實在太勁，我真係好好彩。」
囡囡男友 請示拍拖
一對仔女已長大成人，正在加拿大讀大學，哥哥JT 23歲讀物理治療，今年即將畢業；妹妹Natalie 19歲讀大學一年級，主修教育，今年初嘗拍拖滋味，男朋友中四開始相識，Joe大讚個男仔懂得尊敬長輩，「相識冇幾耐，個女已經話鍾意呢個男仔，鍾意到想嫁俾佢，我叫佢哋快啲拍拖啦，個女竟然話唔得，做朋友可以乜都講，但男女朋友有啲嘢就唔講得，咁我叫佢等吓先囉。今年第三年，個男仔有日whatsapp我：『uncle，你可以正式俾你個女成為我女朋友嗎？』我梗係好開心啦，我心諗你唔問我都得啦！好多父母成日叫自己仔女唔好行差踏錯，係因為自己做錯好多嘢。個男仔只係話鍾意咗你個女，唔係講生仔吖嘛，但好多家長第一件事就係諗生仔，要點安全呀，唔好俾人搞呀……我完全冇諗呢啲，因為我啲仔女經歷咗爸爸咁大鑊嘢，都可以solve到，我相信我個女嘅選擇。」
家庭巨變已成過去，已屆50歲的Joe今年回流返港，重新開展事業，並照顧80歲的母親，他以過來人告誡一眾偷食男，「你玩吓冇所謂，你玩出感情就有所謂喇，我就係沉迷咗感情，傷害到好多人，擱置咗一啲真正應該投放時間、應該灌溉嘅事情，例如一對仔女。今時今日我見到好多男人跌落呢個陷阱，希望佢哋從我呢個例子睇到，你今次跌咗落去，你以為就完，其實只係開始，直至痛到、喊到抽搐，再回首一望，你已經冇咗一啲好愛你嘅人，冇咗珍貴嘅光陰，當你想犯錯嘅時候睇到呢啲嘢，你就唔會犯錯。」