陳山聰消瘦現身 避忌提舊愛何超雲

今年4月同何家千金何超雲甩拖嘅陳山聰,豪門夢碎,而山聰亦一直隱藏行蹤,甚少出席公開活動,其間不時傳出佢會搞生意,但一直只聞樓梯響,山聰事業方面似乎冇乜起色,不過身形就較之前同超雲拍拖時瘦咗啲,冇咁脹爆﹗

噚晚陳山聰同關楚耀及黃浩然等人,喺旺角出席一個舞獅活動,久未出席公開場合嘅陳山聰坦言,係專誠支持好友,同時亦可推廣醒獅活動,佢話:「我細個有玩,同郭政鴻都好有興趣,係佛誕時會睇。以前醒獅同0依家唔同,好多學校都有呢個運動同比賽,好健康,今次同啲時裝同一時間推廣,作好好交流。」

噚晚所見,陳山聰身形消瘦唔少,佢話最近練緊跑馬拉松,每日6點幾起身,佢話:「今年報咗全馬比賽,係挑戰,過往跑10km,有好好成績,今年練全馬好唔同,今朝早都要跑10km先出街,最緊要keep住健康。」

問到0依家係咪幫哥哥手?佢話:「其實自己有工作,同娛樂圈冇關,係生活體驗上想試下唔同嘢,唔係自己生意,係打工,拍劇就隨緣。」

陳山聰表示有同樂易玲見過面,大家亦有傾過,並說:「至於係點,係將來嘅事。」

不過當問到係咪有同舊愛何超雲有聯絡時,佢就避忌話:「呢個問題唔答,(仲係朋友?)每個都係朋友。」

佢又透露0依家未有新女友,亦唔想講太多呢個話題:「唔想影響人哋,始終自己面對自己。」

另外,關楚耀本周五就會到馬來西亞與周秀娜宣傳《爆3俏嬌娃》,由於二人曾傳緋聞,問到屆時會唔會相約遊玩?佢話:「知佢係嗰邊好熟,有同佢講過到時帶我食嘢遊山玩水,係兩個人再加多一班人。」佢又爆娜姐近日指因忙於做宣傳而搞到爆瘡,所以過到當地會叫對方飲肉骨茶清熱。


(左)陳山聰同超雲拍拖期間,身形暴脹;同超雲分手後,山聰積極喼弗,更半裸上身示人(中);噚晚山聰出席公開場合,佢話呢排忙練馬拉松。

陳山聰同何超雲沐浴愛河時,身形脹爆。(資料圖片)

今年四月陳山聰同何超雲後分手後,單拖返港。(資料圖片)

跑呀跑﹑跑呀跑﹗(資料圖片)

(資料圖片)

陳山聰終於蒲頭,但避忌提超雲。(攝影:張俊銘)

陳山聰話最近忙於練跑,佢已報名馬拉松賽事,仲話會跑全馬。

山聰專誠捧好友場。


關楚耀稍後同周秀娜到馬來西亞宣傳新戲。