賭王千金何超雲與拍拖兩年的陳山聰分手後，男方行蹤備受關注，潛水數個月的他最近終蒲頭，被發現有新搞作的山聰，工作時間晚出早歸，而且一身型人打扮Deep V出擊執到正。返神秘筍工的他日前放工後又匆匆回家，並趕往澳門，期間接受獨家專訪時透露生活得開心，不需揸跑車住洋樓外，並自食其力搵銀。

自2011年3月撻着後，「雲山戀」可謂轟動娛樂圈，但兩人拍拖約兩年，終於今年4月分手，各走各路，女方不時與友人外遊，生活逍遙自在。反而「失雲聰」甩拖後連月來一直潛水，行蹤成謎，就連無綫找他拍劇，他亦一一推掉避世。

不過，閉關多時的山聰最近終於蒲頭，已有新工作的他不時悉心打扮，但晚出早歸，日前更被發現工作至下午才收工，駕車返回九龍灣寓所。一臉疲累的他泊車後，便手持兩大袋急急腳返家攤抖。

頻現身上環 過大海探親

事隔數日，山聰又再出動，當晚大約九時許，以一身型人打扮的他穿上白色Deep V襯衣爆肌又再出動，見他與哥哥陳山海及嫂嫂於中環的餐廳步出。三人等的士時有傾有講，登車後直駛上環信德中心，當記者上前拍照時，山聰一臉愕然，除了以手掩面外，還多次擰歪面避鏡頭。不過，山聰定一定神後仍笑笑口向記者打招呼，並拿着大袋下車，與哥哥急步離開，問到是否前往澳門，山聰説：「唔係，我去攞番架車啫！」説罷即前往附近的停車場取回白色七人車，心情不錯的他臨走前更風趣地説：「記得揀張靚啲嘅相出喎！」為工作晚出早歸的山聰，於另一日下午約1時，收工駕車返家，戴上黑超遮掩倦容，又拿着一袋二袋匆匆上樓，不足五分鐘又再落樓，看來他工作自由度極大，又「早」收工，完全屬一份筍工！當發現記者在場時，他亦表現友善，多次揮手打招呼，還表示趕時間，見他極速取車後便直駛信德中心，下車時見記者仍追訪，他笑容滿面説：「我要過澳門探爸爸呀！」但他仍停下腳步接受記者獨家專訪，透露生活得開心，不需揸跑車住洋樓外，並自食其力打工搵銀，但問到返甚麼工時卻表現神秘，説畢才往乘船，沿途吸引不少途人的目光。

獨家剖白失戀心情：唔需要揸跑車住洋樓

記：最近盛傳你不時去澳門搵阿哥「撲水」喎！
聰：其實我依家都有工作在身，唔使投靠哥哥！呢個係我一向嘅宗旨，由始至終我同哥哥喺工作上係分開嘅，一向都唔會喺工作上幫哥哥，以前唔會，將來都唔會！如果唔係幾年前，我就唔入娛樂圈啦！屋企人就係屋企人，金錢上亦唔會有轇轕。」

記：你以前出席過阿嫂本澳門雜誌嘅周年活動，佢有否搵你幫手寫時裝專欄？
聰：冇叫過，亦都唔會，因為佢有佢嘅班底，我依家都有嘢做緊。

記：甩拖後嘅生活過成點？
聰：我唔需要一定揸跑車、住洋樓（語氣堅定），總之我依家好開心。

記：依家返新工作係點同做啲咩？
聰：我都唔係娛樂圈中人，真係唔想講，唔想影響到公司嘅同事，我只係做緊普通人做嘅嘢，啲人鍾意寫我點都好，自己開心就得。

記：早前有傳你推辭新劇係因為角色欠發揮，有冇人再揾你作幕前演出？
聰：如果我他日再出番嚟，一定會同大家講，但暫時真係冇呢個打算。

跑步上癮 挑戰馬拉松

與超雲拍拖期間，山聰搭飛機多過坐港鐵，不是去歐遊就是出入Ball場，回歸平淡生活的他連興趣也改變！趁早前休息期間，他頻頻跑步操Fit體能，自此更成為興趣，一有時間即相約同道中人練習，並打算出戰明年初舉行的馬拉松比赛。

日子有功，難怪已40多歲的他的確比早前收身不少，提到快將出賽，他自豪地説：「初時諗住跑吓步練氣，點知愈跑愈上癮，我係準備報名參加馬拉松，打算跑『半馬』。」身穿貼身衫的他未見大肚腩，棄掉以往的肚滿腸肥，換回一臉自信。