王心慰打救「四失聰」 陳山聰不領情推新劇

自從陳山聰同何家千金何超雲甩拖後,山聰就由「準駙馬」火速降呢為「四失聰」,不過山聰做戲唔算差,好似舊年無綫監製李添勝嗰部《天梯》,陳山聰飾演嗰個藥廠老板黎濟民,其實都幾可愛,可惜佢拋棄糟糠Ponny,同咗賭王千金何超雲拍拖,搞到形象插水,加上之前佢同超雲拍拖嗰陣成日請假推job,好多無綫監製都買佢怕,唔敢再搵佢開劇。

最近有位無綫金牌監製想出手打救「四失聰」,呢位就係曾經拍過《烈火雄心》、《天幕下的戀人》同《真相》,有份捧紅鄭嘉穎同陳展鵬嘅王心慰。聽聞佢見陳山聰一直坐食山崩,所以下半年佢開拍一部時裝劇,諗住搵陳山聰去做一個戲份都好重嘅角色,但係點知陳山聰唔領情推咗,原因係佢自己都未清楚自己未來方向,所以唔想拍劇住喎。

日前向無綫製作資源總監樂易玲求證,佢承認有咁嘅事:「王心慰新劇係想搵陳山聰,但陳山聰話需要時間計劃佢嘅發展空間,所以暫時佢唔想拍劇住,話好多謝公司同王心慰畀機會佢。」

對於推無綫新劇,陳山聰日前喺電話回應:「我冇回應呢啲嘢,唔好意思。」至於王心慰噚日話唔覺得陳山聰唔領情:「人哋有原因唔得,佢有佢自己選擇。」究竟原本想搵陳山聰做乜嘢角色、部劇故事講乜,以及有邊個小生花旦做,王心慰就話:「佢都唔拍,講嚟都冇用。至於部劇好多嘢未落實,所以唔方便透露。」

陳山聰
陳山聰話諗緊去向,唔拍劇住!