陳山聰零收入 搵朋友打救 全裸價100萬

陳山聰押重注做賭王女婿的夢終告破滅,失去女友何超雲、工作、金錢及形象的四失山聰,現只得九龍灣物業片瓦遮頭。據知現在零收入打回原形的他方知友情可貴,近日四出找回昔日朋友??撈打救。由於山聰當日掛住拍拖常常向無綫告假,眾監製已耍手擰頭不敢用他,廣告商又嫌他形象插水,聲稱有圈外工作有收入原來亦是大話一場,現在他坐食山崩,可謂前路茫茫。

陳山聰箍煲失敗前日由倫敦返港,超雲火速在facebook及微博公佈單身劃清界線,山聰的何家女婿夢碎,失去女友、工作、金錢及形象,暫時住在他早年買下的九龍灣麗晶花園住所,總算有瓦遮頭。山聰與超雲拍拖兩年多以來,只寄情陪女友遊山玩水,未有工作零收入,雖然他返港時透露一直有圈外工作有收入和時裝生意,但據知其實都是大話一場。陳山聰未與超雲相戀時,一直與明星足球隊圈子玩埋,當中與曾志偉、陳百祥和譚詠麟等稔熟,常常夜蒲陪玩,但他搭上超雲即忽然與眾老友割席。現在山聰返回現實,即為生計四出籌謀,更知道友情可貴,月前他第一次與超雲鬧分手,即主動找回昔日的朋友打救,為未來生計搵着落。

陳山聰零收入 搵朋友打救 全裸價100萬

添哥:沙塵角色啱佢

據悉陳山聰現在的工作選擇不多,廣告商昔日都是因為超雲情面才讓他孖住出席活動,現在廣告商紛紛嫌他形象插水,無綫也此路不通,他雖口口聲聲稱暫時不會拍劇,其實一向心頭高的他不時同友人表示,不想再演二打六閒角,而他的合約亦已經由基本合約轉為部頭藝員約。無綫製作資源部總監樂易玲昨日表示,陳山聰未有跟他聯絡。其實無綫眾監製聽到他的大名,也耍手怕怕不敢再起用他,都是怪他當日掛住與超雲遊山玩水常常請假,連賞識他的李添勝所監製的《天梯》,山聰更是零宣傳。記者昨日致電山聰,未表明來意,他即掛線。

問到無綫高層梁家樹會否重用山聰?他昨在電話表示:「我都唔知佢回歸,因為佢一直請緊假,所以我手頭嘅劇都冇預佢,如果佢真係想返嚟拍劇,咁有啱嘅角色咪搵佢做囉!」問到山聰再回歸拍劇會有出路嗎?他回應說:「咁發生咗咁多是非,可能都要時間沖淡吓,之後再返嚟拍劇會比較好。」

失戀山聰一沉百踩,幸仍獲伯樂李添勝雪中送炭,他早前指若山聰回巢無綫,不排除安排他演騎呢角色,添哥昨日在電話中說:「佢演沙塵同囂張、叻唔切嘅角色真係好啱佢,又唔係話佢份人似,我見佢平日都唔係誇張,好平實。」添哥表示手頭上的劇集《巾幗梟雄之諜血長天》拍得如火如荼,稍後更會返內地拍攝,現在根本無可能再加插角色進去,添哥說:「今年冇可能啦,最快明年開劇先可預佢,但佢要返藝員部報到先。」添哥勉勵山聰要往前看,他說:「凡事睇通透啲,人生仆底咗人人都會,最緊要識爬起身,佢又唔係作奸犯科,感情事發生喺自己身上,總會處理得一塌胡塗,我同佢始終係同事朋友。」

郭政鴻:點會冇錢?

山聰搭上超雲後,在圈中只與好兄弟郭政鴻有聯繫,連郭的囡囡亦成為超雲契女,人不在港的鴻仔昨日在電話中說:「咁o依家佢哋點?」他透露未有留意山聰箍煲失敗返港的消息,對於山聰頓變四失聰,問到若山聰經濟有問題,他會否接濟?鴻仔說:「咁大個人,點會冇錢,做嘢?嘛。」

伍詠薇作為山聰的前度契姐,她昨日在電話中說:「佢嘅事由拍拖到o依家,我都係no comment,都係同大家一樣睇報紙至知佢返咗嚟,佢返咗嚟應該可以拍劇啦,我唔想再提佢嘅嘢,佢有佢嘅生活,我有我嘅工作同宣傳,總之我衷心祝福佢。」

採訪:葉雪


■山聰未與超雲拍拖時,與志偉和阿倫等明星足球隊友人稔熟。資料圖片

相士話:「最好返娛圈發展」

雲山戀玩完,陳山聰向何超雲箍煲失敗,事業、女友、形象和金錢四失的山聰,前途將會如何?堪輿家司徒法正昨日在電話中說:「一山還有一山高,我幫山聰起卦,發現佢下半年有轉機,最好係返去娛圈發展,佢身邊有女貴人,好有女人緣。」

另一堪輿家麥玲玲卻持反調,她昨日在電話中說:「肖龍嘅山聰今年沖得好犀利,危機四伏,佢把握唔到去年同今年結婚沖喜就比較麻煩。佢今年適宜唞吓,留喺自己出生地都唔會有發展,或者可以試吓離開香港,返內地試吓都未嘗冇出路。佢條命係可以做生意,但唔係今年,要做一定同人夾份,有好拍檔支持先得,佢今年真係少做少錯。」
採訪:比華利

潮山聰五大出路

陳山聰做不成賭王女婿,若然不再拍劇,還有甚麼出路呢?

1.出書爆情史

山聰跟超雲拍拖兩年,雖常在人前晒恩愛,但拍拖過程的甜與苦都鮮為人知,爆名人情史最有睇頭。

2.型英潮顧問

為襯得起年輕的超雲,山聰在形象方面下過苦功,本身已是潮山聰,大可轉做形象顧問。

3.開二手貴貨店

為追富家女,山聰在服裝及飾物方面花費不少,回復樸素後可全部放售,至少取回三成置裝費。

4.主持豪華遊

若不想只做奸角,山聰仍可返無綫轉做綜藝組,以曾與超雲拍拖外遊的經驗,踢走洪永城主持《走過浮華大地》。

5.開班教演技

若山聰不想返無綫或再做幕前,仍可憑他在無綫的演出經驗,轉型做導師,開班教人演戲。

艾威搭路過檔 王維基不識「山」

成為「四失」的陳山聰於電視發展方面暫未有明朗新工作,與其尚有合約的無綫,私下亦未有主動聯絡。山聰好友艾威亦表示擔心,早已過檔王維基旗下的他,原來年初時曾為山聰搭路入「香港電視」,惟內部對山聰反應不大,最後不了了之。

王維基昨日在電話中表示對陳山聰不認識,但希望跟所有愛演戲的藝員合作:「據我理解,藝員部未有提陳山聰呢個人,但佢有興趣嘅話都歡迎,(咩角色適合?)唔敢妄下判斷,因為我同佢唔熟。」

「失雲」山聰 全裸價100萬

猶記得電影《一路向西》去年上映時叫好叫座,老闆蕭定一火速拍板以原班人馬開拍同是Ⅲ級題材的新片《一路向西2之泰西》,預計今年10月開鏡。蕭定一昨接受電話訪問時,直言對山聰感興趣:「覺得呢個男人好有guts!唔係個個都夠膽追超雲,就算佢哋依家分咗手,但我好欣賞佢有呢份勇氣,冇乜自卑心,係值得支持嘅。」阿一不諱言山聰這人物很有話題性,故有意於《一》片為他加入泰國嚮導的新角色,更謂:「係一個深度旅遊嘅嚮導,要佢以真人身份試好多嘢,即係試鐘男囉!我覺得以佢條件,我願意出100萬,當然唔只露pat pat咁簡單啦!」