撰文:鄧龍傑、鄺素媚
孭飛的《玩嘢王》收視報捷，坊間網民反應又爆晒燈，李思捷難免躊躇滿志，計劃拍劇、當導演、做節目等多綫同步發展，繼續娛樂大眾。想不到形象花弗的他，竟然會說：「男人最緊要有型、有 attitude，但冇嘢緊要得過識返屋企。」叫得「玩嘢王」，當然要估佢唔到。
《玩嘢王》自4月20日開播以來，坊間迴響一集比一集勁，收視最高達24點，myTV網上點擊率也是No.1，以周末綜藝節目來說，成績本已亮眼，何況平均收視比視帝視后孭飛的重頭劇還要高，難怪連名副其實「玩嘢王」的李思捷也說始料不及。
「現在這成績唔係我預期，是 bonus、luck、timing。我曾經聽過史提芬史匹堡講：『我而家拍一部戲出來，都唔肯定其票房將會怎樣。』連史匹堡都咁講，咁我都係咁講，我只係做我的 best，因為是我擔大旗，好唔好睇，第一個一定話我先，所以我給自己一個好大的責任。這是屬於我自己的 TV show、有我的 character，最起碼要對得住自己，才對得起觀眾，而我自評《玩嘢王》是合格的。」
令被整蠱的嘉賓覺得抵
李思捷不是過謙，而是他指「因為時間嘅關係」，7集節目未拍竣就要邊拍邊出街。「公司只可畀到4月中至5月這個 time slot 給我，我們拍唔夠兩集便出街，邊拍邊播好慘，慘到不得了，因為一出街就好大壓力，係人都驚咗我，點搵人？真係諗到頭都爆晒。而這節目就像打仗般辛苦，因為要諗要做要拍好多嘢，每件事都放好多人力物力、好大製作、好認真，『全為了你』地只為呃一個人。每個嘉賓都係聰明的，唔好當人傻，整蠱人家之餘最尾要令他們覺得『抵』，咁就係三贏（觀眾、節目、嘉賓都贏）。」
節目已播出6集，一眾被玩嘉賓當中以Bob及嘉欣BB最大迴響，但李思捷說拍陳智燊練武功一集最是難忘。「最緊張是 Jason 那集，因為已出街，他又睇了幾集，我真係好驚穿崩，故找了鍾澍佳導演、田雞幫手，又去到大澳，令成件事好似好勁，鋪到個『練少林寺武功是為了電影試鏡』這backdrop好真、好靚。後來令唔識武功的Jason都肯練功，就show 到他夠pro，而他的反應又好好笑。」
不易穿崩還有秘密武器，就是李思捷招攬了一班「Johnson 兵團」。「開拍前，我跟編審說：「千祈唔好畀臨記我，因為他們只會交『臨時』的功課，一定要找一些識做戲的人，結果她真係找到一班話劇團的人幫手。他們好掂，個個都有戲、交到戲。」
腦震盪激發創意
李思捷認為創作須集思廣益，所以他說：「I love brainstorming。我不是最聰明，大家一起度出來的東西才是最聰明。十多年前跟隨過周星馳先生一段日子，在他身上學到很多，他是我的 idol。周生不多說話，我當時覺得奇怪：『小時候看他演出口若懸河，為何真人卻沉默寡言？』原來他就是在聆聽大家說甚麼，然後思考、filter，覺得冇用就掉走，有用的就記下，然後再放自己的東西，他就是這麼聰明。」
大眾覺得李思捷較自負、高傲、剛愎，事實正正相反。「我在TVB的崗位始終是演員，公司大把編劇導演，需要相信同事才行，如果不信任，就做唔到嘢。一個人叻唔晒，咁大間公司，大把叻人，自己霸晒，即係話人哋渣啫，遲早令大家唔開心。所以我一諗到idea，便交出去睇下大家有冇興趣，如有，麻煩佢哋去寫、去拍。我在TVB的合約是artist，便做回演員，這是respect。甚麼也參一腳，即係唔尊重人，同事便唔妥你，咁又點會交好嘢出嚟畀你？我相信每個人有自己的talent，要多去欣賞別人。」
冀與家人分享事業成功
不止在創作上，李思捷演戲也像海綿般不斷吸收眾人的長處。「如看過阿爾柏仙奴這個（表情、動作、演技）好、劉青雲那個好，便記下來，變成自己的。這世上沒有完全 original 的，所有人做的都是將見過的模仿出來，因為演戲就是模仿，比如演《On Call 36 小時》就是模仿醫生，但要pretend 得有style，便變成是屬於你自己的東西。」
事實不論演劇還是主持綜藝節目，都需要講演技，不過普羅觀眾一見到李思捷，通常只直接想到他扮鬼扮馬搞笑，他豁達地笑說：「公眾對我有何comment、感覺，沒所謂，我每天拼命地死度死做，最終都不過是想娛樂觀眾，他們接收到一個甚麼的李思捷，我不能控制。你覺得我柴娃娃OK，但能夠娛樂到你、我又 fulfill 到工作，我收這份糧是問心無愧，OK；有些人如覺得『呢條友』背後有一套藝術，我就要講聲多謝。」
他說享受每一份工作：「我接每個job，首先一定要覺得會enjoy 的才接，否則只會做得唔開心，最緊要 happy，做完（工作）便吃飯、回家，很簡單，我也是個普通人。觀眾喜歡我做綜藝節目還是劇集也沒所謂，都幾十歲人，最緊要happy、尊重人，以及識返屋企就得。」
李思捷多次強調屋企，他現在亦是與母親同住。「任何人最後也是要返屋企，玩幾十年也好、是李嘉誠也好，也是返屋企罷了，冇嘢緊要得過屋企，就算事業多精采，冇屋企便冇意思，有 family 與你 share 才是最重要。」
最憎扮女人
傳聞，李思捷討厭扮女人，問及此事，他斬釘截鐵地說：「我很介意扮女人！因為平時做戲、專訪都唔化粧，仲要化女人粧？黐眼睫毛、戴假髮都好煩，而且我扮女人好醜樣，照鏡見到自己已黑口黑面，只想快點拍完就落粧。但他們（阮兆祥、王祖藍）唔同，他們化女人粧好靚，祖藍直情靚到不得了，佢見到自己咁靚一定happy，祥仔份人又好nice，覺得娛樂到觀眾就冇所謂。我見到自己個女人樣就忟憎，但冇辦法，這是工作，觀眾想睇便要做，觀眾唔想睇便唔做。」
再圓電影夢
百足咁多爪的李思捷，《玩嘢王》播到尾聲才有空做訪問宣傳，原來他有大project在手，「當領導人擔大旗」。「因正籌備自己的電影，希望 8 月可開拍。今次由自己做領導人，所以好大責任、唔衰得。我一直都好鍾意做導演、拍電影，覺得自己係有少少 talent 在這方面。上次《金國民》我就是只用了10萬元去拍，所以『衰咗』，新片則是多出好多好多倍，而且是商業電影，有壓力但我都OK、有信心。」此片題材據稱跟漫畫《老夫子》有關。
至於劇集方面，李思捷手上有兩部劇集。「年尾一部劇，是公司度的；明年年初另有一部劇，因為有位老牌演員回TVB拍劇，想與我一起拍，我們便一起度了一些東西，然後將idea sell畀公司，已見過高層了。」到底是哪位資深演員？非常令人期待。