李思捷玩嘢真言 視春卷為終身伴侶

面前的李思捷,戴着一副半透視墨鏡,蹺着二郎腿,擺出一副大導姿態,在太陽光折射下,看見他的眼睛轉動,似想着下一步行動,訪問未正式啟動,他竟然先下手為強,第一句話是:「唔好意思呀!等咗咁耐!」

傲慢、自信又囂張,舉手投足想展示自己是藝術家的李思捷,為遲了半句鐘的訪問和押後訪問日期,竟然心表歉意,表裏不一,莫非玩嘢王又想玩嘢?慎防有詐,警覺級別瞬間提升!訪問其間,沉鬱有時、悔咎有時、自大有時、狂妄有時,有時難以捉摸,有時又成熟沉穩,是玩嘢王玩嘢?抑或李思捷的真心話,請自行判斷!

撰文:楊潔雯

李思捷玩嘢真言 視春卷為終身伴侶
■由於李思捷太喜歡玩嘢,就算是真情剖白,亦令人真假難分。攝影:黃偉雄

李思捷玩嘢真言 視春卷為終身伴侶
■鍾嘉欣在《玩嘢王》中扮被整蠱,惹來外界極大迴響。資料圖片

玩嘢王李思捷有欺騙藝人、觀眾前科,甚至被指跟陳雅倫搞緋聞玩傳媒,此人可信性甚低,李思捷日前呼冤說:「之前我周圍同人講拍晒,但係其實未拍晒,o依家真係拍晒就舒服晒!」擺出一副滿意和滿足的模樣,玩嘢王直認有無數藝人被罵黐線,他說:「個個見到我問我嗰單嘢點?我咪話黐線,拍晒喇!哈哈哈!之後我即刻跑上六樓度橋,你知唔知,我哋拍咗唔夠兩集已經出第一集,我壓力幾大!得番四月中個期畀我去做呢個節目,打呢場仗,好感觸!」

李思捷托一托眼鏡,chok了一chok,續說那一份感觸:「開咗好多次會,後尾我諗到一樣嘢,如果我哋擺好多人力物力製作落一件事,就係為咗整蠱一個人,而嗰個人最尾感受到咁大龍鳳係為咗佢,佢被整蠱都服嘅,咁就好睇,我哋又贏,佢又攞到個面,觀眾又睇得開心,係三贏,就試吓打呢場仗,好慘呀!我o依家先可以講真話,因為我拍晒喇!」李思捷強調「玩嘢王」拍完,為最後一集大賣關子,笑騎騎說:「唔講得住,會玩一個地位好高嘅阿姐,大家平時見到會低頭打招呼嘅。」

樂做領導人

玩嘢王如數家珍的致謝,監製黃中濠、五個編劇、九個導演、一班被玩的藝人同事,還特別鳴謝被他臭罵過的工作人員,一臉悔意的李思捷說:「我承認,我當時好緊張,咁大龍鳳,個個人知道咪死,咁知道唔通同佢講麻煩你繼續幫我做埋去,你扮唔知喇!咁有乜好睇,咁佢俾唔到嘢咪死,我最驚成件事穿,所以我嗰時係有啲霸氣,有啲緊張,我成日要大家排十次,唔得唔得,個蛋糕唔係跌,再嚟過,我記得有一次某位被整蠱啱啱想喊,嗰一吓,呆一呆,知道原來係整蠱,嗰個反應最勁,竟然拎咗部cam,影緊第二樣嘢,激到我死咁滯,真係鬧,當場我係鬧咗佢,點解咁重要個反應你唔take,take第二樣唔關係嘅嘢,後尾我忍唔住同佢講對唔住,人哋都係做嘢返工,對我嚟講係一個mission,但係佢返工,我咁樣鬧人唔啱,咁咪道歉,我又唔係佢老細,監製先係佢老細。??家成team人,我諗九成都接受我,可能有一成唔順我,我咁惡又衰格,不過我之後都generous咗。」
戲外是玩嘢王,戲內變身緊張大師,李思捷一方面致歉,同一時間又褒獎自己有導演才華,他挺一挺胸,認真地說:「我做嘢嗰時真係成個領導人咁,一眼關七,做導演最適合,即係排《玩嘢王》個wedding,cam我好留意點take,新娘點出場,兄弟要乜反應,蛋糕加cream點跌得好睇,every department都會睇,所以我係好適合做領導人。」

李思捷玩嘢真言 視春卷為終身伴侶
■其實李思捷的玩嘢實力早獲認同,去年已挾着福祿壽之名殺入紅館。
資料圖片

榮升男主角

《玩嘢王》無論口碑、收視都揮低一眾重頭節目和劇集,李思捷可以獨當一面,吐氣揚眉,自然心情亢奮,但他竟然刻意抑壓高漲情緒,低聲說:「算係咁喇!其實我一向做嘢係過到自己嗰關,甚至唱歌,每粒音都好緊張,要自己最好狀態,今次我擔大旗,罵,第一個罵我先,所以我對呢嚿嘢特別要求高。」

回想在無綫最初的五年,李思捷被投閒置散,他感觸良多,不過當年的怨氣經已化作一縷輕煙,隨風飄散,今日李思捷感激所有好的、壞的,也曾經遇上,他說:「後生嗰時我係緊張嘅,30歲嗰時我好chur,要做男主角,但我o依家冇呢啲感覺,我好清楚自己on track,我睇到有人需要我,我feel到,我亦知道,我做配角冇所謂,當然我o依家做得男主角喇!如果有個配角寫得好爆,我點解唔做!」

鬼見愁從良

03年加入無綫的黃毛小子,李思捷當年被指是演員「鬼見愁」,十年過去,玩嘢王跟所有被玩的藝人成為老友,他說:「我覺得做人,最緊要『真』,做任何嘢要真,講一句說話都要真話,真,人哋係會feel到。成功率係大好多,雖然娛樂圈好難,最緊要我身邊朋友、同事,我家人知我係乜人就足夠,好似以前我改劇本改到飛起,改到啲戲喺自己度,馬仔馬浚偉好鬼憎我,不過o依家我哋係兄弟,嘉欣(鍾嘉欣)o依家都同我friend咗,阿Bob又做咗我兄弟。所以唔熟我,唔識我,你係一個網民,點批評我,I don`t care。o依家最緊要係屋企人,身邊人,我health,我事業,夠喇!做人好簡單,just do my best!」

視春卷為終身伴侶

李思捷玩嘢真言 視春卷為終身伴侶
■表面天不怕地不怕,但李思捷還是有死穴,對感情十分避忌。

李思捷和陳雅倫的關係,疑幻似真,抑或是傳聞中的傳媒終極版《玩嘢王》?李思捷指是事有湊巧,還口口聲聲稱陳雅倫做「阿姐」,他說:「係咁啱有《玩嘢王》,咁啱同阿姐有緋聞,咁啱電影有個角色係阿姐,咁啱咋!」
李思捷跟陳雅倫的曖昧關係,由思春期開始,他自爆房中掛上女神陳雅倫的照片,他說:「90年代頭,有邊個男仔唔鍾意關之琳、鍾楚紅、陳雅倫,女神嚟?!阿姐嘅戲我睇晒,佢都同人講我黐線,連對白都背得出。」

女友王宝宝感情穩定,李思捷更直言是時候選定終身伴侶。
■跟女友王宝宝感情穩定,李思捷更直言是時候選定終身伴侶。
資料圖片


■03年李思捷初入行時從低做起,於港台劇《執法群英II》扮大配角。
劇照

煲水新聞,李思捷可以任講,自家點心「春卷」王宝宝,他卻不想提。提起女朋友王宝宝,李思捷交叉手扮死光槍向天發射,他笑說:「感情事唔講。」後來玩嘢王更貫徹始終不肯露底,只推說「一個人」,他說:「一個人唔會諗住出位,只會不斷接job,去做自己本份,呢啲先堅,成日諗我唔會做咩工展會,我o依家係o靓模,個個都識我,咁咪快死,我同佢講,唔好理乜都接,我好欣賞佢呢樣嘢,唔怕辛苦。好多嘢佢明,大家互相尊重。」40將至的李思捷,明言媾女階段已過,是選定終身伴侶的時候,相信「春卷」很快沽清。

服裝提供:PRIVATE STRUCTURE