《再戰明天》同徐子珊「鬥戲」 何超儀去盡跪地喊爆

何超儀(Josie)向來拍戲都好搏,尤其是今次義字當頭幫無綫打仗接拍新劇《再戰明天》,超儀捱冷開早唔在講,仲紆尊降貴扮跛腳監躉。日前她在赤柱街頭喊爆跪求王浩信,激情拒愛場面,投入到完全拋開「賭王千金」嘅身份,好精采!「勞役」完一個早上,何超走景去到深水埗繼續同徐子珊「鬥戲」,熱血超儀愈拍愈興奮:「可以做到現實以外嘅嘢,好爽!辛苦?我唔怕,預咗啦。」

何超儀最愛挑戰角色,04年她拍三級片《豪情》飾演「趙啷啷」。今年她再拍《3D豪情》增肥20磅扮老雞就知佢去得有幾盡!眼見TVB重頭劇《再戰明天》一女囚角色好有發揮,慘被強姦而誤殺要坐監的人妻,在獄中遭人打跛腳,又因丈夫拋妻棄子,出冊後要靠倒垃圾、洗碗同埋幫人腳底按摩維生,慘絕人寰好搶戲,搞到超儀事隔14年後重拾拍劇癮。

攝氏8度拍外景

作為「女一」,戲份梗係多,尤其是拍電視劇工時唔會短,撞啱超儀同時間開拍電影《全力扣殺》,電影成日要打羽毛球,勁消耗體力,但兩邊踩的超儀全無怨言。日前清晨9點在只得8度低溫下,何超儀穿上薄外套準時現身赤柱大街拍外景,呢場戲講跛腳超儀出冊後為生計偷竊,結果當場被捕,懲教員男友王浩信上前代為求情,超儀唔想再受男友恩惠,喊晒跪求王浩信話:「拉我啦!拉我啦!」兩人相擁而泣,好悽涼。拍攝當日遊人穿梭,但王浩信唔使兩下就可以谷出眼淚,仲帶動埋超儀情緒,兩人七情上面,幾Take收貨。

拍足9粒鐘

拍完呢場慘戲,何超儀食個快飯又趕到深水埗玉石市場附近,同徐子珊、蝦頭(楊詩敏)做對手戲。超儀鼓勵坐街的徐子珊要重新振作,流落街邊的子珊即時悲從中來喊到爆。當日拍足9粒鐘先收工,超儀冇詐型,冇擺何家千金架子,她說:「我一直想拍呢啲角色好耐,演戲好玩之處,係做到現實中做唔到嘅嘢,但又冇偏離現實,真係好多謝樂小姐畀呢個機會我去發揮,呢個班底合作得好開心。」原來Josie跟中大合作設有一個慈善基金,將唱片收益撥捐教育創作方面,拍過呢個角色後,超儀體會到在貧窮線生活嘅一班基層人士苦況,她說:「我考慮擴大受助網絡,希望真係幫到一班需要幫助嘅基層市民,盡自己力量,回饋社會。」

何超儀為拍慘劇,只薄施脂粉上陣,當日跪地哭求,幾Take跪足十分鐘。
何超儀為拍慘劇,只薄施脂粉上陣,當日跪地哭求,幾Take跪足十分鐘。
王浩信好入戲,喊住攬超儀起身,好感人。
王浩信好入戲,喊住攬超儀起身,好感人。
何超儀和王浩信兩位好戲之人,話喊即喊。
何超儀和王浩信兩位好戲之人,話喊即喊。
跛腳超儀上前勸坐街徐子珊,重新振作。
跛腳超儀上前勸坐街徐子珊,重新振作。
徐子珊拍時自動波流出真眼淚,停機時不停抹鼻涕。
徐子珊拍時自動波流出真眼淚,停機時不停抹鼻涕。
徐子珊(左)和何超儀一收工,即穿回羽絨保暖。
徐子珊(左)和何超儀一收工,即穿回羽絨保暖。

蝦頭突圍

蝦頭(楊詩敏)在《My盛Lady》演活癲婆神髓,而在《再戰明天》同樣搶戲。當日在深水埗場戲就講到釋囚蝦頭要瞓街拾荒為生,仲要在垃圾桶執飯盒食,雖然劇組預備好道具垃圾桶和「乾淨飯盒」,但蝦頭好鬼入戲,由推車到執飯食都係一take過,連同場的超儀和子珊都激讚佢。