2014年對黃智賢來說，應該是一個很值得紀念的年份，因為今年正是他入行25年的大日子。
「唉吔……你唔講我都唔記得喇，如果唔係同傳媒做訪問，我真係唔會去記以前嘅嘢，人對眼生喺前面，就係要自己要向前望，而唔係去記以前嘅事。」
靦腆的笑容，令我心中出現了五個字：「阿海返嚟喇！」
在一般人心目中，黃智賢是一個Man到爆男人，但其實他很愛說笑，偶然跟他whatsapp閒談說笑，他會傳來「講呢啲」再加哈哈笑圖案；過時過節又會傳來他與兩頭可愛愛犬合照的祝福圖片。他做過男主角、奪過「最佳男配角」，又返過國內拍電視劇、拍電影，但這25年來他覺得自己從來沒有變過。
「真係冇變過，我都係咁嘅性格，我唔會俾自己『滑牙』，我每一日都俾自己有一團火，因為我真係好鍾意做戲，咩角色都鍾意做，總之有得做就乜都得！」
廣東人有句名言：「做嗰行、厭嗰行」，對於拍了25年戲的黃智賢來說，卻是「做呢行、愛呢行」。
第一次跟黃智賢訪問，是2011年的事，當時他飾演的「辣薑」人氣急升，亦為他贏來了「最佳男配角」的殊榮，還記得他得獎當晚在後台碰上了面，兩個麻甩佬沒有多餘客套的話，輕輕相擁了一下，一聲「恭喜」一聲「多謝」，說得多了就會變成婆媽。
失意離開TVB
記得上期訪問王祖藍，談到劇中的演員，跟他首次合作的黃智賢是他點名力讚的演員之一。不少人都在說，這次是黃智賢第一次當男主角，其實早在97年時他曾經是電視劇集《真命天師》的男主角，只是當時收視口碑都只是一般，令男主角之位，只是曇花一現。
「當時真係好心灰，《真》我好俾心機去做，但最後當我知道劇集放喺聖誕檔期播，個心已經涼一涼，再知道劇集由20集剪淨15集，就知道好大問題。果然劇集播出之後收視唔理想，又冇咩口碑。劇集本身係有問題，但我係咪冇問題？我都有問題，因為我唔識得點樣做到好突出自己，當時係我人生低潮，我成日諗一套劇唔得，點解唔俾多次機會我？真係一套劇就定我生死？好唔開心呀，最後咪就唔開心到要離開TVB，咁啱當時韋家輝搵我拍《世紀之戰》，又青雲又秋官，我諗唔到理由唔拍囉，之後又返過內地拍電視劇，呢幾年見識嘅世面，完全係自我增值嘅好機會。」
主角就像便利店
事隔17年，黃智賢再戰男主角，壓力沒有當年首次擔正的重，有的只是勞心勞力，因為對他來說，主角比配角應該要有更多想法，他就用上了精品店與便利店來形容主角與配角的分別。
「今次再做主角，壓力唔係套劇收唔收得，而係要對信得過自己嘅同事有交待。咁大間公司咁多藝人，人哋搵得我做主角，就一定係想過度過，覺得我一定有啲嘢夾到個角色，咁既然人哋對我咁有信心，我係咪都要交足貨俾人先！
我會用精品店去形容配角，因為配角係可以點玩都得，戲份唔多但每一場戲都可以好似精品咁慢慢扭，而且大部分配角戲份都只係需要對主角，甚至係壓住主角嚟打，有好大空間玩。
至於主角我就會用便利店去形容，因為主角就好似便利店咁好容易就俾人見到，但因為太容易見到喇，點樣可以去吸引觀眾視線呢？其實做主角真係好攰，因為主角要面對好多演員，而且主角好多時都好被動，大部分時間都係俾做反派嘅配角帶住走，好似我之前幾套劇集做奸角，幾乎成套劇都係主角俾我牽住走，去到大結局先至衰收尾，而且配角唔係場場戲有份，有比較多時間去設計角色，但主角幾乎場場都有，時間上就變得好迫切，不過亦係做主角最好玩嘅地方。至於收視、口碑係點，唔到我去諗啦！」
終於一嘗皇帝癮
有看《食為奴》的讀者，都會知道這次黃智賢飾演的「雍正」，與以往電視劇出現的雍正有很大的出入。雍正一向予人印象是一個心狠嚴厲的皇帝，與這次黃智賢的忠厚沒有野心的雍正有很大出入。對黃智賢來說，這次能夠飾演雍正，比他再次當上男主角，更加有意義。
「雍正係我最欣賞嘅皇帝之一，之前國內套《雍正皇朝》，我最少睇過三次。喺一般人心目中，雍正係一個心狠手辣嘅皇帝，大家可能會著眼喺佢同呂四娘嘅恩怨，或者有傳係雍正發明嘅血滴子呢啲野史身上，但因為今次劇情係講雍正同幾個阿哥嘅恩怨情仇，著重雍正點樣由一個與世無爭嘅四阿哥，變成為國為民而出面同八阿哥爭皇位，條線比較軟性，算係電視史上幾特別嘅雍正皇帝。
今次拍《食》好開心，首先係遇上一班好用心嘅演員，冇人係hea住去做，好似陳國邦、張繼聰、祖藍、岳華哥等等，個個都係一埋位就嚟料。
好似有一場戲講老康熙駕崩，因為無遺詔指定邊個繼位，於是就係我同阿聰喺大殿爭皇位，呢場戲大家都好俾心機去演，就連點樣走位我同阿聰都度好耐，邊個佔上風就邊個用龍椅做background，兩個人就咁不停喺大殿兜圈走位講對白，拍得好過癮。
今次最開心係終於可以做皇帝，之前唔係做大臣就係做皇爺，次次都係企大殿做戲，好多時拍一場戲係可以企足一日，但做皇帝都唔同，可以坐龍椅做戲，原來真係好舒服，哈哈！不過最重要係當你坐上龍椅之後，個氣勢真係好唔同，一坐上去戲就係咁湧出。」
不願回首25年
黃智賢入行25年，由路人甲乙做起，試過憑《真情》的阿海一夜成名，亦試過第一次擔正男主角就遇上了滑鐵盧，亦試過在亞視做沒有太多人知的男主角，這25年的銀色生涯有喜亦有悲，不過黃智賢自小就習慣凡事都要向前看，往事就只會在接受訪問時，才偶然回首。
「我好細個就明白人係要向前看呢個道理，因為人嘅眼睛係向前望，以前嘅事……無論係開心定唔開心，我都好少會去諗。入行25年，真係唔覺自己變好多，當然咁多年，好多事應該點面對、應該點做都會有一定領悟，但其他就真係冇大變。
咁多年我都對自己份工有一團火，因為我真係好鍾意做戲，咁多年我好似冇咩特別事做過，但其實又有好多事做過，好似角色我都算多元化，醫生、警察、忠、奸、有錢人、小市民……每一個角色都俾到滿足感俾我。主角同配角，名稱唔同，最緊要就係有戲俾我演，咁我就心滿意足喇！」
後記：冇晒「海味」
在訪問期間，我透露了這篇專訪會用因為入行25年而以「銀禧」來作為主題，當事人黃智賢聽後即時靦腆地笑說：「嘩……你講呢啲，你唔講我都唔記得入行25年啦，係都要提醒我嘅你！」
時間，是女人的秘密，其實對男人來說還不是一樣。黃智賢不是介意別人說他的陳年往事，而是因為他習慣了向前看，總覺得談多一分往事，就多一分老土。
這其實與他的「海味」有關。
話說95年他憑《真情》入面的「阿海」人氣急升，每次在街上都被人稱呼做「阿海」，初初一兩年黃智賢非常開心，只是《真情》播完三年、四年、五年過後，市民還是稱他做「阿海」，開始令他非常擔心。
「咁多年仲係叫我做阿海，叫唔出我其他角色……咁係咪即係我已經被定型，成世都係阿海？」
果然他在這些年間，角色清一色都是忠忠直直，沒有監製敢放他在其他角色，直至他05年重返TVB後，才開始有多方面嘗試。
「離開TVB嗰五年，最重要係洗咗走陣『海味』，如果唔係就冇『辣薑』嘅出現。」