42歲「男神」張智霖憑《衝上雲霄II》的風流機長「Captain Cool」一角人氣爆燈,因為奉旨食盡「珍饈百味」,好艷福到令宅男勁葡萄,就連「影帝」周潤發都要封他做偶像!現實生活中,Chilam的緋聞樹根圖都好壯大,而Cool Sir亦坦言和老婆袁詠儀相處了20年,其間曾遇中年危機:「我哋有試過低潮期,而呢件事亦傷害咗我哋嘅關係,後來雙方坐低檢討,以後盡量唔會畀佢再發生!」究竟低潮期屬甚麼年份?Captain Cool靚仔但不是傻的,答問題點到即止相當明智。
「Cool魔」戲裏靚仔有型,多女又多精警金句,香港九成女性像突然發現新大陸,全城高呼我愛Captain Cool。其實自91年入行開始,Chilam緋聞不斷,尤以00年跟佘詩曼拍《十月初五的月光》炒得最熾熱,一個嗲一個未定性,假戲真做一事嚇親正印,當時有傳靚靚不時以正印身份到片場探班示威,盯實情敵兼宣示主權;巧合地,兩人於翌年2月即註冊結婚,袁詠儀以一紙婚書正式要Chilam「封盤」!06年11月12日仲生埋兒子張慕童,結合母子兩人的「威力」,Chilam難以再走出靚靚的手指罅。對於有傳老婆怕老公有「中年危機」,要拜神箍着他,Chilam即大派定心丸:「要箍20年前就做咗,我封咗盤,我對佢死心塌地,唔使箍。」
Chilam接受鳳凰衞視《海琪的天空》訪問,坦承過去曾有感情缺失:「曾有過傷害到兩個人關係嘅事情出現,最後雙方坐低好好檢討,睇吓點樣會做得更好,等日後唔會再發生同類事情!」不過,他冇明示是哪個階段有危機,只淡然交代:「我唔會記住唔開心嘅事。」
夫妻關係曾受傷
講到夫婦相處之道,Chilam舉出結婚方程式:「都係學習中,我覺得兩個人條數,唔係一加一咁計,而係0.5加0.5,意思係要捨棄一半自己嘢,去接納對方嘅一半,大家相處唔可以咁自我同霸道,係要平等,所以我唔會係大男人,但我會做男人做嘅事,保衞家人。」他更自爆唔再浪漫,冇送花畀靚靚,反而揀送實質有價值嘅禮物。相處20年,大家已歸於平淡,卻變得更加珍惜,正如「Cool魔」的新金句:「無人可以保證甚麼。因為無人會知道下一秒會發生咩事。」他覺得幸福唔係必然,故此要從心而發,好好欣賞對方的優點和缺點,這樣一對夫婦才可走得更遠。
張曼玉肺腑之言
因為《衝II》收視佳又有話題,TVB打算乘勝追擊,開拍電影版。對於會否接拍,Chilam答得好玄:「之前我同左鄰右里張曼玉結伴行山時討論,我問佢仲有冇興趣拍戲?佢話唔會接某啲導演嘅戲,因為唔想為拍戲而拍戲,做番自己先至係最高境界,當時我唔太明白,至今終於了解箇中玄機,亦成為咗我最大嘅演藝目標。」
童顏靚佬多女冧
許秋怡 91年,張智霖、許秋怡以情侶檔殺入樂壇,傳兩人日久生情秘密拍拖。
朱茵 94年,兩人合作《射鵰英雄傳》傳緋聞,更有傳女方主動出擊冧掂Chilam。
佘詩曼 00年,兩人合作《十月初五的月光》並高調地以熒幕情侶姿態示人,戲裏戲外都十分投入,傳靚靚出招踢走阿佘。
郭可盈 07年,合作內地電視劇《紅粉》傳緋聞。