張智霖（Chilam）今日盛裝出席喺舊啟德停機坪舉行嘅簽約記者會，宣佈加盟蕭定一旗下兼續約星娛樂。Chilam同蕭定一坐住勞斯萊斯到場，喺一班著上露腰空姐裝嘅空姐陪同下，上台同兩位老闆蕭定一，薛濟傑進行簽約儀式，現場播住chilam重唱嘅《歲月如歌》，最後chilam坐住直昇機喺空中暢遊，呢個簽約儀式認真架勢。
講到無綫將會如蕭定一合作拍《衝上雲霄》電影版，佢話：「聽講會呀，不過係明年嘅事，我自己好期待，當然一部電影嘅誕生，唔係一個人可以做到，要有各方面先可以成事，如果做唔到，《衝II》有呢個成績已經係好大嘅獎勵。」人選方面，佢話：「我無任何話事權，只係演員，每一個演員都有魅力。」講到重唱《歲月如歌》嘅決定，佢話：「呢個係唱片公司嘅安排，遲啲我會出一張重唱大碟，可能佢哋覺得我飾演嘅角色好得意，而且又同《衝II》好有關係，我唔抗拒呢個安排。」
有網民專登設計《衝II》結局相片，佢笑笑口話：「嗰張相真係好好笑，我已經cap起咗俾個仔睇。」外傳張智霖今次以八位數字獲邀加盟，心情勁靚嘅佢就話：「錢係商業秘密，遲啲有一連串歌影視嘅工作計劃，0依家要保持最好狀態，迎接新工作。」
而最近網上亦開始瘋傳Chilam翻唱《歲月如歌》嘅視頻，大家又覺得唱得好唔好聽呢？
威到盡呀!
今日好sharp醒
勁威水
仲有直昇機
上去巡遊一圈先
