張智霖5000萬 賣身蕭定一3年

41歲的張智霖(Chilam)今年行運行到落腳趾尾,財神爺不斷叩門,除了拉了幾次頭馬外,近日又憑無綫劇《衝上雲霄II》的萬人迷機師角色「Cool魔」,令人氣再度急升,出街勁受粉絲歡迎。據知蕭定一更出到5,000萬高價誘他簽約3年,聲價衝破雲霄,加上近來頻頻接廣告,Chilam賺到豬籠入水!

無綫最近播出的重頭劇《衝上雲霄II》收視高企,張智霖所飾演的帥氣飛機師「Cool魔」迷倒不少粉絲,同劇的男演員吳鎮宇、馬國明及吳卓羲等都被他搶盡風頭,他走到街上,粉絲都以「Cool魔」來稱呼他,連他自己都沒想到觀眾反應會如此熱烈。年底他將接演一部葉念琛執導的愛情片,片酬已由200萬加至300萬,另內地有電視劇想請他演出,每集酬金由25萬人民幣加至35萬人民幣,今年肯定是他大豐收年!

■張智霖最近憑《衝上雲霄II》的Cool魔一角再次彈起,聲價亦自然急升。資料圖片
■張智霖最近憑《衝上雲霄II》的Cool魔一角再次彈起,聲價亦自然急升。資料圖片

一筆過收酬金

鴻運當頭的Chilam今年受幸運之神眷戀,橫財及正財都大有進賬,他與郭富城共同擁有的愛駒愛將出仗4次,拉了3次頭馬,為他倆贏了不少獎金。正財方面,今年單是廣告就接了Fancl、美心月餅、Georgia Coffee及清熱飲,每個廣告酬金約250萬,為他帶來約1,000萬收入。經理人公司澤東又為他接了5個商演騷,每個酬金約70萬,為他賺得350萬。但今年最大筆收入肯定是他轉投蕭定一旗下的經理人公司,本報接獲消息,Chilam9月正式簽約加盟蕭定一公司,蕭定一並一筆過付清包底3年的5,000萬酬金。
記者昨日致電向Chilam求證,他說:「我9月先約滿,等我約滿先講啦!」問到是否加盟蕭定一公司,獲取5,000萬酬金?他笑說:「錢銀係商業秘密,真係唔講得,一切新動向都話等約滿先講得咯!不過將來就算真係轉新公司,都係歌影視三線發展,唔會只偏重一面。其實今年事事順利,特別係最近《衝上雲霄II》咁好反應,大家都叫我Cool魔,聽到我好開心,好感謝大家對我嘅支持。」

張智霖
【行街街】
■人氣再度急升的張智霖,昨日出巡行街街,心情勁靚。

張智霖
【家庭樂】
■張智霖日前一家三口於中環開餐,享受家庭樂。資料圖片

袁詠儀唔使做

袁詠儀(靚靚)一直默默在背後支持老公Chilam,對於老公財源滾滾來,今年能夠名利雙收,靚靚在電話中哈哈大笑:「係呀!我唔使做喇!我老公都話等佢衝喎,o依家距離我年輕退休又有錢又行近咗一大步喇!我以後可以更加揀嘢做,遠啲都唔去拍。」

此外,Chilam偷得浮生半日閒,昨日陪太太及兒子在金鐘看電影《怪獸大學》(Monsters University),看完電影後,他與妻兒分道揚鑣,約6時許獨自駕車往中環I.T購物。入店後,他專攻T恤,但他看了幾件黑色T恤,店員跟他講解了一輪,最後都沒有購買。他又入另一間I.T時裝店看T恤,看了約5分鐘又空手走出來,記者問他是否買不到東西?他笑說:「係呀!睇唔啱!拜拜!」

採訪、攝影:葉雪、楊浩賢、羅德光

張智霖
【泊碼頭】
■蕭定一(右)出價5,000萬元羅致張智霖。資料圖片

張智霖
【拉頭馬】
■運氣甚好的張智霖,早前愛駒贏頭馬。資料圖片

話你知:一劇奠定地位

近年不少藝人也憑劇集角色而爆紅,張智霖的Cool魔便是最佳例子。其實無綫歷年亦孕育不少爆紅角色,令浮沉多年的藝人突破悶局上位。

鄭嘉穎
90年代出道做歌手的鄭嘉穎,後來加入無綫拍劇,11年才憑劇集《怒火街頭》的正氣律師Law霸(羅力亞)人氣急升,帶旺接拍內地劇《步步驚心》做八阿哥!

郭晉安
85年出道的郭晉安,加入無綫不久已做男主角,但未能令觀眾留下深刻印象,至03年憑劇集《戇夫成龍》中,飾演智障的丁常旺一角,令他真正做一哥。

黎耀祥
83年出道的黎耀祥,常於劇集飾演閒角,09年於劇集《巾幗梟雄》中飾演柴九,角色性格鮮明,令人留下深刻印象,火速上位,還三連奪視帝。

吳啟華
83年出道的吳啟華,入行初期多演奸角,未為觀眾受落。直至98年,於一連三輯的劇集《妙手仁心》中飾演「情聖」醫生程至美,終於成功入屋。

劉俐胸壓Chilam

劉俐胸壓Chilam
■劉俐在劇中投懷送抱,但Chilam笑言冇感覺。
電視圖片

無綫新劇《衝上雲霄II》眾型男當中,以張智霖(Chilam)最好艷福,不時被劇中女角包圍,先後跟陳法拉、朱璇及劉俐攬攬抱抱送波餅,稍後還與另一性感咪神梁政珏有床上戲。講到在劇中好艷福,被男觀眾羨慕又妒忌的Chilam卻說:「冇特別感覺喎,你哋睇到嘅同現場係唔同,拍攝時好多工作人員,又要記對白,冇諗任何溫柔鄉感覺。」他更指老婆袁詠儀(靚靚)同是演員會明白:「唔會呷醋咁小器。」除了Chilam有艷福,觀眾亦有眼福,上周五一集胡杏兒飾演的顧夏晨,穿上運動背心top在街上跑步,大晒小蠻腰。

胡杏兒連跑步都露得多過人,觀眾有眼福了。
■胡杏兒連跑步都露得多過人,觀眾有眼福了。
電視圖片

此外,《衝》劇首播一周即有好收視,叫好叫座,無綫有意下月拉隊到三亞慶功兼宣傳,不過因Chilam、吳鎮宇、陳法拉及胡杏兒各有各忙,故要度期配合。