張智霖(ChiLam)今日喺電視城接受《今日VIP》訪問，《衝上雲霄II》下星期一首播，大家同Chi Lam一樣都好期待，ChiLam表示早排返電視城配音，已經睇咗頭5集，覺得好好睇，每個演員都做得好好。

《衝上II》未播，但無綫已經收到51宗關於主題曲嘅投訴，ChiLam忍唔住話：「真係史無前例，證明大家都好關心。」ChiLam有冇聽過先？佢話之前去咗大馬做宣傳，已經聽到入晒腦，佢讚呢個歌同劇情好配襯。

問ChiLam可覺得係觀眾對首輯嘅主題曲《歲月如歌》已經先入為主？ChiLam話：「絕對係啦，正如94年我拍《射鵰英雄傳》，做得幾咁努力，啲人唔會覺得我做得好過黃日華；到今時今日，亦冇人覺得好過我，我相信大家對主題曲嘅爭議係時間性問題。」

講真嗰句，林子祥唱功絕對冇問題，但首歌melody真係比較old，正如網民話齋，成首歌俾人感覺好似「墜機」。《歲月如歌》就係愉快地、充滿朝氣地起飛，同新主題曲感覺完全相反。但學ChiLam話齋，呢個只係時間性問題，43集晚晚聽幾次，就好似「洗腦」一樣，想聽唔慣都難啦！

阿Lam首歌俾人狂插，但Chilam就力撐喎。