少年食神衰媾女
被無綫踢走

由少年食神林澄光和高海寧主持的《為食一條街》早前剛播映完畢，由於收視不俗，無綫本有意開拍第二輯。不過，近日林澄光被指扮有錢佬呃老友錢之餘，更被指速食高海寧和狂媾女，無綫有見食神負面新聞不絕，遂喊停開拍計劃，令林澄光「覓食」大計撻 Q；而身為亞視食神的黃麗梅除批評林澄光與拍檔欠缺溝通外，更暗寸林澄光形象負面說：「入屋形象好緊要，一定要健康、要檢點。」

現年 36歲、人稱少年食神的林澄光，近日憑與高海寧主持的無綫節目《為食一條街》而廣為人認識，該節目平均收視 24點，約 153萬觀眾捧場，由於成績和口碑不俗，無綫遂計劃添食。
不過，林澄光近日負面新聞不絕，包括被指扮有錢佬，經常在飯局中吹噓自己有數十部古董名車兼家住半山，令不少一心想釣金龜的無知姐仔信以為真，以為他是億萬身家的富豪第二代而落叠。

少年食神林澄光憑與高海寧主持無綫節目《為食一條街》而廣為觀眾認識，近日卻因傳出速食姐仔而無緣在無綫再覓食。資料圖片

識飲識食的少年食神曾教楊愛謹品嚐靚蠔。資料圖片

林澄光以靚車載着姚子羚同遊泰國尋美食。資料圖片

自認富二代速食姐仔

甚有異性緣的林澄光，與吳文忻在《超級遊戲獎門人》節目中玩到癲。《壹週刊》圖片

有消息指林澄光除速食《為食》拍檔高海寧外，陸詩韻、朱慧敏、呂慧儀和梁敏儀亦先後中招。另外，又有消息指林澄光呃老友森美及 EO2經理人文狄錢，由於負面新聞一宗接一宗，形象插水，無綫為怕惹來師奶觀眾反感，遂即時打退堂鼓，將開拍第二輯計劃無限期擱置。
記者昨日致電無綫高層何麗全了解，問無綫是否開拍《為食一條街》第二輯時，他說：「有諗過，但暫時未有計劃，啱啱先播完，最快都過咗農曆年先傾。」少年食神緋聞多會否影響拍第二輯的計劃？何麗全說：「唔關事，人紅就有是非 o架啦。」
記者致電林澄光，他表示無綫暫未聯絡他添食：「隨緣啦，如果公司畀機會就全力以赴做到最好。我唔係娛樂圈中人，都係一個為食嘅肥仔啫。」會否擔心新聞多而被 TVB飛？他說：「冇諗過，多咗少少人認識我就有呢啲新聞，係我完全估唔到嘅。我相信工作同花邊新聞應該唔會有乜嘢影響，失實嘅報道希望快啲過去。」

楊天命教路忍到過年

森美曾邀林澄光開咪講飲講食而成為好友，有傳森美被林澄光呃錢因而反目。《忽然 1周》圖片

少年食神承認初時因緋聞是非影響心情，幸獲朋友如黃柏高（ Paco）和堪輿學家楊天命等鼓勵，他說：「佢哋識我都知我唔係咁嘅人，我作為一個食家，又搞餐飲事業，一見啲朋友相約食飯係好理所當然。」未知楊天命對他有何贈言？少年食神說：「佢叫我從容不迫，但過咗年先講啦，整體上 OK嘅。」
身為亞視飲食節目主持的黃麗梅，原來也有留意少年食神，問對他主持的《為食》有何評價時，黃麗梅不留情面說：「我有睇，我覺得做飲食節目係群體，佢一輪嘴講嘢，其他女仔又冇乜反應，同其他拍檔冇擦出火花。」可有留意林澄光近日的負面新聞？黃麗梅說：「佢有啲不利新聞啦，呢啲我盡量避啦，我唔會有呢啲新聞。入屋形象一定要健康、要檢點。出邊做生意又好、錢銀轇轕同男女感情又好，一定要處理好囉。最緊要飲食節目睇你嗰啲係家庭觀眾、師奶，師奶覺得你好浮誇呀，或者唔係好踏實用心呀，觀眾係知 o架。」

人物誌
開咪寫書食出名堂

自認為食肥仔的林澄光，愛玩車嚐美食認真識嘆。

憑與咪神高海寧主持無綫飲食節目《為食一條街》而人氣急升的少年食神 Michael（林澄光），現年 36歲，於陳瑞祺喇沙中學畢業後，接手打理父親的建築工程公司。 00年， Michael轉行做光岡日本汽車的香港代理，但後來結業。另一方面，識飲識食的他 01年開始在雜誌寫飲食專欄， 07年更獲森美邀請，於商台 903節目《公子會》開咪講飲講食，少年食神之名由此而來。 Michael亦推出過飲食書，包括《少年食神曼煮泰菜》及《秘．台灣隱世美食遊》等。

麗梅姐出山不利

黃麗梅出山主持《上海好味道》，邀請羅霖和趙碩之助陣搶觀眾，惜依然只有三點收視。

亞視近日找黃麗梅出山主持《上海好味道》，與蘇玉華為無綫主持的《和味蘇》對撼，希望能挽救插水的收視，可惜，大前日首集播出，平均收視僅得 3點，只有 19萬觀眾捧場，至於《和味蘇》平均收視 21點，觀眾人數約 134萬。

劃定底線跳槽

蘇玉華打正美女廚神旗號主持《和味蘇》，深受師奶觀眾歡迎。

對於出師不利，黃麗梅昨日坦言失望說：「睇番成個亞視其他節目收視都唔好，星期日除咗新聞之外，我個節目已經係收視最高。我真係有啲失望，可能聖誕假期，自己又耐冇做節目，欠缺宣傳，啲人唔知啦。希望努力，做番多啲宣傳，希望台勢好番啲，大家畀啲支持我！如果做到第七集收視都係唔好嘅話，我都唔做啦，考慮過檔！」是否無綫有斟她過檔？黃麗梅說：「有其他人搵過我， TVB私下有問我，其他亦有問我有冇興趣，但暫時冇話要搵大台做，自己又唔係等錢使，我做飲食節目都係為興趣啫。」