麥浚龍（Juno）2004年推出的歌曲《耿耿於懷》，唱盡「毒男」心聲，今年初推出續集《念念不忘》，直到近日與謝安琪合唱終結篇的《羅生門》，這3首歌構成愛情故事三部曲，熱爆全城，好多網民在網上瘋狂洗版，更表示到眼濕濕。這三首歌都係由黃偉文（Wyman）填詞，Wyman今日接受電話訪問，講番點解會有呢個concept。
Wyman表示：「件事係因為11年前寫咗《耿耿於懷》，12年我嘅作品展撞番Juno，當時完全唔知道揀乜嘢歌畀佢唱，我哋合作嘅歌都幾多，《有人》、《沒有人》、《濛》呢幾首都覺得可以唱，但當時隔離左右嘅人，都話要揀《耿耿於懷》，因為好多人鍾意《耿耿於懷》，當時我係有啲驚奇，因為呢首歌喺11年前，打榜成績唔係太出眾，電台、媒體高層唔覺得呢首歌特別好，原來群眾心目中好受歡迎。」
當晚作品展Juno唱咗《耿耿於懷》，效果好好，歌迷反應都好熱烈，Wyman就話：「我有個狂想同Juno講，啱啱事隔十年，我哋好耐冇合作，不如搵埋伍樂城做番隻《耿耿於懷》續集，講番十年後呢個男仔點樣，你知Juno循例冇乜反應，之後過咗兩年，佢（Juno）同我講不如做，14年做呢首歌（《念念不忘》），擺咗一陣，到15年先派，佢可能覺得等重要時機派台，所以喺15年呢隻歌面世。」
Wyman續說：「之後Juno又畀電話我：不如呢首歌、呢個故仔、呢個男主角，我哋舖排成一張6隻歌嘅EP，將歌曲裏面每個人物都活化、立體化，佢第一樣諗到呢首歌裏面嘅『你』，o依家分開後重新拍拖嘅『她』，搵兩個女歌手飾演真人版，所以有《念念不忘》，好多人鍾意，我哋開始苦惱，故仔應該點舖排，其實仲有莫文蔚同Juno合唱《瑕疵》，莫文蔚飾演女朋友，之後到謝安琪呢首（《羅生門》），我提議不如反轉嚟寫，女仔眼中世界其實同男主角唔一樣。」
《耿耿於懷》《念念不忘》《羅生門》三部曲
（資料圖片）
Juno新專輯 分正傳外傳
Wyman表示構思呢幾部曲係見步行步：「唔係好有組織同計劃，因為做一首歌冇諗到有第二首，第二首時未知第三首係點，呢隻碟有6首歌，《耿耿於懷》（不在新碟內）、《念念不忘》、《羅生門》係正傳，其他幾首係外傳，包括莫文蔚合唱《瑕疵》、周國賢合唱《雷克雅未克》，Juno獨唱《睡前服》、《單魚座》，呢6首歌加埋其實係一部微電影，不過冇拍到出嚟，我覺得好嘥。」
講到周國賢合唱嘅《雷克雅未克》呢首歌，Wyman表示係另一個「羅生門」，佢話：「因為喺Juno眼中係呢個故仔其中一個人物，仲係壓軸出現㖭，但喺我眼中係另一個故仔人物，不過兩條線喺呢張唱片有交錯，正如《阿飛正傳》嘅梁朝偉。」
Wyman又謂《睡前服》係講安眠藥：「男仔喺呢十年同新女友生活，但每晚都掛住舊女友瞓唔着，《單魚座》講呢個男仔性格出自雙魚座嘅相反，所以念念不忘，Juno真係雙魚座。」
耿耿於懷MV片段
耿耿於懷MV截圖
《耿耿於懷》MV
歌詞「殘忍」 摧毀十年夢 Wyman：歡迎到現實世界
Wyman話：「好耐冇試過有廣東歌有現狀性，歌曲出街到o依家48小時都冇，好多人討論呢件事，個個話噚晚大家喺黃雨聽住首歌喊咗成晚，好似同個天鬥病，我都喊咗成晚，原來個個都關心廣東歌，呢樣最感動，Juno今朝send訊息畀我，佢話一夜之間iTunes廣東歌嘅銷售，頭四位係呢4首廣東歌，自己都毛管戙。」
而Juno同Kay合唱嘅《羅生門》，只係推出短短兩日，暫時喺YouTube點擊已破24萬，甚受歡迎，有網民指Wyman歌詞相當「殘忍」，看看呢幾句：「很感激 喜歡我十年仍不休 近日舊同學說我已 耿耿於你心六百週 很可惜 這一世未能長廝守 但事實如若告訴你或更內疚 我愛過哈囉吉蒂嗎似乎沒有」
Wyman亦話：「十萬個人問我點解咁殘忍，一手摧毀佢哋十年嚟嘅夢，我話，歡迎嚟到現實世界，o依家你鬧我狠，但三五七年後，你醒咗會多謝我。」
《瑕疵》MV截圖
《瑕疵》MV
繼《耿耿於懷》、《念念不忘》同《羅生門》三部曲之後，麥浚龍（Juno）將會推出外傳《雷克雅未克》，呢首歌係佢同周國賢（Endy）合唱，並由Endy作曲、黃偉文填詞，Endy今日接受電話訪問，佢話：「故事講兩個情侶分手十年，當年佢哋約定十年後去冰島浪漫一番，奈何段情冇咗，但男仔好堅持要自己去。」
問到佢喺首歌擔當邊個角色？Endy笑話：「我都有啲迷糊，我可能情敵，其實我只係唱最尾幾句，感覺似《阿飛正傳》嘅梁朝偉，最後出嚟梳個頭，Juno叫我寫呢首歌嘅時候，佢話唔要一首好standard嘅歌，叫我畀一首好癲嘅歌佢，佢話要好浪漫好多旋律，之後我send咗demo畀佢，但佢都嫌唔夠勁，佢話要再癲啲，我就大解放將畢生功力攞入歌裏面，出嚟超難唱，好似新浪漫古典音樂，好高音好長冇重複，好似歌劇嘅女高音，所以有冰島感覺。唔可以形容係流行曲，根本係藝術品，我寫咗兩、三個月，當時多倫多落緊雪，o依家寫唔番意境。」
Endy話收到歌詞後，自己忍唔住錄咗獨唱版本：「好在自己試驗咗先，真係好難唱，交番畀麥生唱，我哋成日鬥高音，我唔夠佢高音，嗌爆喉嚨都唔夠佢高音，其實佢係女高音。」之前佢試唱一次，覺得有啲危險，笑言要降key。Endy又謂首歌七分幾鐘，Juno唱十分之九，佢唱十分一，因為似《阿飛正傳》梁朝偉出場感覺。
咁有冇聽晒三部曲？佢話：「聽咗，好勁，佢鍾意打破傳統，唔守舊肯試新嘢，夠大膽，野心大。」
Endy話同Juno合作多次，兩人幾有默契：「我哋頻率幾似，都係唔多出聲嘅內斂仔，第一次認識佢喺頒獎禮記者會，個個湧晒前面影相，我哋就匿喺後面，呢條仔咁得意，所以同佢熟咗，開始音樂合作，今次第三次合作。」
《雷克雅未克》部份歌詞率先曝光
「請你兌現約定 飛到伴我看星
往昔福島名勝 破損中顯神聖
誰人能為 昨日情
過十年後 再度遠征
時間廢墟裡
尋那 不經污染 相戀的鐵証」
Juno同Wyman（資料圖片）
Juno同Wyman合力摧毀「十年男仔」一角
現年31歲的主唱Juno接受訪問時表示：「其實入行第十年，拍咗《殭屍》呢部電影，拍完電影後，咁啱我同阿Y（Wyman）諗到『念念不忘』呢個Term，個一刻我覺得個時間好似好吻合，如果冇一個至少十年，點稱得上念念不忘呢？」
Juno又謂：「呢樣嘢吸引我開始咗呢隻碟企劃，而佢好玩地方，今次好係角色扮演，其實工作同導演好相近，我哋去發展耿耿於懷嘅呢個男仔，當佢係一部電影咁，冇可能得一個角色，所以其實無論幕後班底，甚至乎幕前，包括Karen（莫文蔚）﹑Kay（謝安琪）或者周國賢，甚至乎我自己，其實都係喺耿耿於懷呢個世界，去探索佢身邊所有事情，我自己好開心及感激大家好喜歡呢個故事。」
至於同人妻Kay合唱《羅生門》，Juno就話係呢個故事一個里程碑，佢話：「我同阿Y覺得我哋好想將『十年嘅男仔』呢個角色，將佢完全摧毀，將我哋一手建立嘅，去完全摧毀佢，其實有呢個能力摧毀呢個角色，我相信世界上得兩個人，一個係我﹑一個係黃偉文，所以我哋由第一日去傾呢個故事，我好想寫一個『羅生門』咁樣嘅歌，我好想聽多啲呢個女仔睇法，我覺得Kay唱得好好，Karen喺《瑕疵》都係，佢哋演活咗我幻想呢個世界嘅一種角色，雖然製作過程唔算好長，冇拍電影咁長，但係艱辛，因為你諗到呢個故事，我同阿Y去傾，好似捉棋咁，將每一個幕前幕後團隊去做埋一齊，我係好多謝佢哋信任，當然佢哋每一個都係我心目中男女主角，因為佢哋擔當緊好重要角色。」
Juno表示：「我同阿Y（Wyman）創作過程，我哋好想好現實地講一段或幾段關係，而一個連貫性好強﹑故事性好強嘅方向，呢樣嘢好吸引到我，結果就出現《耿耿於懷》，直至十年後嘅《念念不忘》﹑到《瑕疵》﹑到今日《羅生門》，大家有種感情想追看角色發展，但我哋從來唔想去寫…即係呢個唔係童話故事，但當中存在咗好多人生小道理，亦都有佢嘅甜蜜時候，對我呢講呢件事幾浪漫，但一種遺憾美嘅浪漫，所以我其實最要多謝阿Y，我仲好記得有次通電話，我哋好似好雀躍嘅小朋友，對呢個故事發展好有興趣，好多謝大家鍾意呢個故事。」
Juno續說：「我諗去做呢隻碟，喺我心目中有個大前提，呢個大前提係其實有邊個未曾念念不忘過？咁呢個就係『人』囉，我覺得呢個係人可愛﹑有趣﹑但係又好複雜嘅地方。」
Juno又話做呢隻碟同去拍一部電影都好相近：「我哋由第一日開始已構思故事架構及裡面人物，佢哋對嗰段感情睇法，可能大家睇法都唔一樣，我覺得呢樣嘢好有趣，我去搵Karen（莫文蔚）飾演呢個現任女朋友角色，從中感受到Karen有一種淡然，呢個係我最主要，係我第一時間諗起佢嘅原因，而Kay（謝安琪）呢，我透過佢聲音，感受到嗰種不捨，我亦第一時間諗起佢，去飾演十年前伴侶角色，佢兩位都可演活呢個角色，係團隊上功勞，亦好多謝佢哋信任。」
Juno表示今張專輯跟以往做歌唔同，佢話：「我想喺『有嘅空間』唔係只聽到我一個人角度，而係聽到第二啲角色嘅角度，所以《羅生門》係一首合唱歌，但佢哋旋律上分配，唱嘅比率，同以往聽嘅合唱歌有一個分別，尤其係《羅生門》，我想聽多啲呢個女仔角度，我嘅睇法已透過《念念不忘》已知道。」
佢又話：「我諗喺《羅生門》裡面，其實當我哋製作呢首歌，佢有趣地方在於呢兩個角色，唔係因為佢哋唔愛大家而分開，佢哋分開係因為佢哋從來唔了解大家，呢樣嘢係比較複雜，唔係話大家冇咗感情…我哋分開咗，但係有好多嘢我哋冇解釋到，原來真相大家唔係唔愛大家，大家都愛，真相係大家從來唔了解大家。」
Juno表示雖然呢個係虛構故事，但當中每首歌嘅情感，係可以套用喺現實裡面：「相信無論男或女都好，總會有呢啲情況出現，所以變相可能會貼近到聽眾佢哋喜歡呢一系列的歌，其實每個人都經歷過及經歷緊呢啲情況。」
Juno所屬唱片公司Silly Thing發言人表示，《羅生門》的MV將會在下周於網上發布，至於第四部曲《雷克雅未克》亦會於不久將來面世。
iTunes香港十大排行榜 Juno佔九首歌
日前麥浚龍（Juno）同謝安琪（Kay）合唱嘅新歌《羅生門》喺YouTube首播，引起全城熱爆，YouTube點擊好似坐火箭咁飆升至53萬，相關討論喺facebook狂洗版，全城吹響一遍「羅生門」熱。
但最令人意想唔到嘅係，Juno三部曲除咗帶挈埋十一年前舊歌《耿耿於懷》再度翻叮外，連同Juno其餘舊歌都一併炒熱。最新嘅iTunes歌曲下載排行榜，頭十位歌曲居然有九首係Juno作品，分別係《羅生門》、《念念不忘》、《耿耿於懷》、《瑕疵》、《沒有人》、《有人》、《蒙》、《弱水三千》同埋另一version嘅《耿耿於懷》，而其實Eason新歌《無條件》已經好勁，可以抵抗到「Juno狂風」力保第七位。
Kay嘆《羅生門》：呢段感情令人好心酸
麥浚龍（Juno）嘅《耿耿於懷》、《念念不忘》同《羅生門》三部曲熱爆全城，佢同謝安琪（Kay）合唱嘅《羅生門》更被網民捧為神曲，截至今午兩點幾，《羅》喺YouTube點擊破66萬，相當厲害﹗
《羅生門》女主角謝安琪（Kay）接受電話訪問，原來佢同呢隻歌好有緣份：「好開心！呢隻歌一出好好成績，幾開心有人發現到一啲細微特點，例如狄更斯同我嘅關係，之前我有隻歌《最好的時刻》都係出自狄更斯，另外我有首歌《臨崖勒馬》係講福島地震，之前我又喺冰島影過封面《慢活》，初初做新人時，啲人就問我鍾唔鍾意Hello Kitty貓？我真係唔係特別鍾意，呢啲細微嘢咁橋同故事主人翁一樣，我都同Juno講番，好似冥冥中嘅緣份。」
Juno點解搵你合唱？Kay話：「佢話幾重視呢個角色，因為佢做莫文蔚嗰隻歌（瑕疵）先，佢想搵完全唔同感覺、唔同聲線、唔同味道、有自己特出個性嘅人，佢好快諗到我，我哋唔熟㗎，有日佢無端端同我講話合作囉，我話：『吓，真係㗎？』因為我睇咗佢導演兩部戲，我都好有興趣同佢合作，所以佢邀請我就好開心。」
呢首歌係咪好難唱？Kay話：「唱就唔難，最難係感情，大家猜度女主角究竟點諗，有啲覺得佢好絕情，有啲覺佢摧毀呢個男子，其實我覺得唔係，呢個女主角都鍾意男主角，不過真係講緊十年前大家係同學，畢竟好年青時喺埋一齊，分開咗各走各路，女仔好鍾意佢，不過放低咗好耐，估唔到十年後舊同學聚會，先知男仔仲係對佢耿耿於懷同念念不忘，真係唔知道自己對男仔影響咁大。」
Kay續說：「其實佢都好多謝呢個男仔，一直記得約定十年後某地方相聚，男仔印象中係去好夢幻好靚嘅冰島，女仔印象中大家係相約喺福島，十年前未有福島地震，福島都曾經係好靚地方，原來大家唔止睇法唔同、感受唔同，連當年相約嘅地方都係誤會，呢段感情都幾慘，我覺得幾冤㗎。」（歌詞：別瘋狂 下個一月 願如期團聚於 冰島某地方（讓前塵沉澱於 福島某地方））
Kay覺得女主角雖然表現冷靜，但都有將呢段感情擺喺心：「我特登唔唱得咁絕，好想開解番前度，同佢講曾經好動人時光，記得就得，唔使再緬懷令自己辛苦，勸佢睇開同放開，呢個女仔可能有自己另一半，有自己好好嘅生活，所以先咁成熟，對呢段感情開得放，呢個男仔其實都有另一半，但十年都冇接觸過嘅人，反而晚晚睇女仔facebook，攞手機睇佢有冇online，令人好心酸！」
「很感激 喜歡我十年仍不休 近日舊同學說我已 耿耿於你心六百週 很可惜 這一世未能長廝守 但事實如若告訴你或更內疚 我愛過哈囉吉蒂嗎似乎沒有」
呢首合唱歌講到個女仔摧毀咗男仔嘅十年情，不過現實生活中，Kay表示會揀呢個男仔：「其實我好鍾意呢個男仔，好鍾意咁長情嘅人，因為我都好長情，我都唔捨得，擺明揭穿底蘊令男仔徹底摧毀，以為佢鍾意睇漫畫鍾意Hello Kitty，其實根本唔係，呢個男仔唔係咁深入了解佢咁沉迷嘅初戀，唔怪得女仔會同佢分手，佢從來冇真正了解女仔，真係好唏噓，所以我唔捨得語氣唱得咁絕，我唱嘅時候都好留手，好錫住呢個前度咁唱。我又少唱情歌，入面流露嘅感情係我好少有嘅感情。」
Kay表示：「之前兩隻歌，十年前嘅佢好青澀，十年後《念念不忘》好感動到我，聽出佢明顯成熟咗，所以如果我係嗰個女仔，好想同佢一齊，咁長情嘅人呢個世代好少有，好多人分手後，將對方嘅衰放大，唔記得對方嘅好，佢就好鍾意呢個女仔，覺得女仔天上有地下無，呢個男仔幾難得呢，我都同Juno講，如果唔係你設計男女性格咁唔夾，我直頭會求佢寫番埋男女主角一齊，我個人好有愛，寧願寫好結局畀佢哋。」
呢首歌勾起好多人嘅耿耿於懷同念念不忘，Kay話：「好多人心裏面總有啲人放唔低，Juno角色係飾演咗一個絕－－好極端放唔低嘅絕，大部份人係隨時間慢慢放低，呢隻歌又幫佢哋勾番出嚟。」
Kay心底有冇一個放唔低嘅人？佢話：「我其實好長情，喺我心目中，以前拍過拖嘅人會深深記得，我同Juno講我都係咁嘅人，原來我哋都係雙魚座，唔怪得我哋氣質好似，佢有種雙魚座溫柔。」
一鏡到尾手法 拍攝MV Juno輕撫Kay的面
麥浚龍同謝安琪合唱嘅神曲《羅生門》已經拍咗MV，呢張EP裏面嘅系列MV，由Juno親自執導，全部MV都用一鏡到尾手法拍攝，特別係拍《羅生門》時非常複雜，由於Kay同Juno嘅走動特別多，燈光同攝影組為配合兩人嘅走位，綵排時間比較長，拍咗十幾個鐘。
Juno喺MV裏面深情款款咁望住Kay，並伸手輕撫佢塊面，完全切合佢喺歌曲嘅癡情角色。繼外傳《瑕疵》同莫文蔚（Karen）合唱後，今次第三部曲《羅生門》就鎖定Kay係女主角，Juno話：「要創作一個故事，唔可以只得一個角色，由十年前嘅《耿耿於懷》開始，聽眾從主人翁（男孩）去聽去睇佢嘅愛情故事。十年後，大家聽《念念不忘》了解佢成長後嘅感情狀況。《瑕疵》係男孩長大後同現任伴侶嘅感情，所以諗起Karen，因為佢存在一份淡然，能演活歌曲嘅角色。而《羅生門》係有關十年前嘅前任伴侶故事，想搵一個同Karen感覺、味道完全相反嘅女歌手演呢個角色，第一時間就諗起Kay，一直認為佢嘅聲線存在一種不捨。」
Kay就話收到Juno嘅邀請，感到十分意外：「往往就係意想不到嘅事，先會有驚喜有火花。我好欣賞Juno係一個有品味有自己思想、風格嘅人，呢樣係我想同佢合作嘅第一個原因。第二個原因係佢搵我做《羅生門》女主角，呢個係十年前嘅角色，一個人可留喺另一個人心中十年好難得。最後一點係我唱片主題好少純愛情故事，Juno呢個構思一直係我好想做嘅，我亦好鍾意首歌嘅出發點！」
