側田禿頭凸腩拍《爽》MV 肌爆吳彥祖跳芭蕾舞

側田為拍新歌MV《爽》搏盡,不惜以「麻甩Look」犧牲色相,以九一分界禿頭兼大肚腩造型登場,除咗大打友情牌,邀請盧海鵬﹑胡楓﹑錢國偉﹑劉以達及型爸吳彥祖等客串MV外,就連韓籍女友亦被拉落水客串演「包租婆」一角。

今次造型最爆最驚喜嘅,要算係靚仔爸爸吳彥祖喇,一身結實肌肉嘅吳彥祖,以 「天鵝湖」造型拍攝,穿上吊帶背心配芭蕾舞小傘裙,嘗試以不同舞步出場,然後又鬧着玩扮MJ玩自摸,再嚟大鵬展翅喺舞台上跳來跳去,表現興奮,吳彥祖仲話已拍照留念,等囡囡Raven大個後,可以欣賞爸爸瘋狂造型。

至於扮嘢達人鵬哥上台「試咪」兼耍拳;胡楓就獻舞兼打鼓,佢哋身手靈活,一take過搞掂,果然寶刀未老﹗之後錢國偉以「港版PSY」大跳《江南style》招牌甫士,仲拉埋側田個唱鼓手Chris反串為重量級Sexy Lady齊跳辣身舞,令人捧腹。至於達哥繼續搞笑演出,佢以蝙蝠俠造型出場,原來佢出動私伙衫撐側田,仲即場演繹經典電影對白:「大夫﹗」

對於邀請多位圈中好友演出,側田坦言好感動,佢話:「最驚喜係Daniel表演芭蕾舞啦!因為我首歌裏面有一句歌詞提到佢個名Daniel Wu(吳彥祖),於是我就膽粗粗打電話邀請佢,最初我請佢嚟好似平時咁,有型靚仔咁出場,點知佢話要同我哋一齊扭seafood,玩盡啲,真係估佢唔到,好驚喜。」

吳彥祖則笑謂:「你好叻仔,喺首歌加咗我個名,叫我點可以唔嚟玩?其實我好多年冇拍人哋MV,而且入行17年未試過呢個造型,好開心,我都要打電話同屋企人分享。原來呢個look令我好舒服喎,估唔到拍MV搵到真我!」

側田禿頭凸腩拍《爽》MV  肌爆吳彥祖跳芭蕾舞
側田以麻甩造型拍MV,仲邀來吳彥祖及錢國偉等友情客串。
側田禿頭凸腩拍《爽》MV  肌爆吳彥祖跳芭蕾舞
吳彥祖擺心心甫士,真係不得了。(微博圖片)
側田禿頭凸腩拍《爽》MV  肌爆吳彥祖跳芭蕾舞
吳彥祖肌爆呀﹗(微博圖片)
側田禿頭凸腩拍《爽》MV  肌爆吳彥祖跳芭蕾舞
盧海鵬嚟到,梗係要試咪啦﹗
側田禿頭凸腩拍《爽》MV  肌爆吳彥祖跳芭蕾舞
側田膽粗粗邀請吳彥祖友情客串拍MV。
側田禿頭凸腩拍《爽》MV  肌爆吳彥祖跳芭蕾舞
側田以禿頭及凸腩造型示人。
側田禿頭凸腩拍《爽》MV  肌爆吳彥祖跳芭蕾舞
劉以達(左)出動私伙蝙蝠俠戰衣撐側田。
側田禿頭凸腩拍《爽》MV  肌爆吳彥祖跳芭蕾舞
合作愉快。

《爽》MV完整版