側田噚晚喺紅館舉行Part2「繼續命硬演唱會」,側田雙親﹑韓籍女友及妹妹等捧場,而蘇志威﹑C AllStar﹑李浩林等亦到場睇騷。
側田心情High爆,當佢唱完《情歌》、《傷追人》及《感動》後,側田感觸地話:「呢3年去咗北京生活,體會幸福唔係必然,無論事業、家庭和愛情都係要自己爭取,回想10年前嘅我,以為自己有少少才華就大晒,以為自己擁有一切。依家成長咗,我會努力學習謙虛啲,少說話多做事,唔好怕蝕底。」觀眾報以掌聲鼓勵,佢又話:「講講吓,自己都有啲眼濕濕!」
喺一輪感性場面後,安哥環節時側田大搞氣氛,除咗扭籮跳舞唱新歌《爽》外,佢仲當住女朋友面前,打拍穿迷你裙嘅女舞蹈員pat pat,觀眾興奮尖叫。唱到最後一曲《命硬》時,側田索性除帽露光頭,全場High爆,掀起高潮,側田自摸光頭,仲笑言:「你哋睇我光頭,仲興奮過聽我唱歌喎!」
事後側田話冇諗過觀眾反應咁熱烈,佢話:「我係咪好似會唱歌嘅麥嘉?下次不如舉行《側田光頭騷》呀!(以後光頭示人?)剛才只係太熱,戴帽真係好焗。其實台上表演還OK,但台下都係繼續戴帽較有安全感!」
另外,側田又話媽咪同女友聽佢唱出特別寫畀佢哋嘅《兩個女人》時,都感動到喊,側田話好開心可以打動到佢哋。
側田尾聲時自摸光頭,全場high爆﹗
側田笑稱:「你哋睇我光頭,仲興奮過聽我唱歌喎!」
同女舞蹈員大跳貼身舞
側田自彈自唱