除了揀老婆有A餐和B餐外，吳雨霏（Kary）都有一個plan B，事關近年歌手越來越難撈，唱片更加少人買，現在出碟等於倒錢落大海，入行12年的Kary都感到氣餒，是時候好好計劃plan B，她說：「唔覺得自己喺呢行會做到3、40年，我有諗過做生意，但創業容易守業難，要諗清楚先。」

■吳雨霏大呻唱片越來越難做，自己都有氣餒時候，故已計劃plan B打算轉行。

攝影：葉君海
髮型：Heibie Mok@Hair Culture
化妝：Hubei Har@Atelier d’Arris
服裝：NM Paris

■Cookies出身的吳雨霏入行12年，九餅女只剩她仍在樂壇生存。資料圖片

吳雨霏（Kary）剛推出新碟《Across》，主題是過馬路的意思，每人都有想去的目的地，無論朋友、工作、愛情，過程比結果更重要，Kary說：「以前自己太在意結果，好似有一樣嘢好想要，一定要得到為止，但慢慢人大咗，點過呢條馬路，學到乜嘢反而最緊要。大家都知呢行好多嘢難預料，以前我好心急，o依家學到凡事睇開啲，尤其唱片市道咁低迷，有得出碟已經好好，所以睇開咗唔好令自己咁辛苦。」

■吳雨霏認為自己以前性格太急躁，現在明白過程重要過結果。

香港流行曲難做

組合Cookies出身的Kary，九女當中獨剩她在樂壇生存，問會否覺得自己好彩？她說：「向好方面諗可以咁講，雖然其他姐妹都喺唔同範疇做嘢，但咁多年我喺音樂上用咗好多時間，其實我出碟好密，今年會出兩張，公司知道唱片業冇錢賺仲幫我出碟，的確係好幸運。」有否想過拍戲賺多份錢？她說：「我有諗過做時裝生意，或者幫屋企手，睇吓自己喺呢行可以堅持幾耐，都要諗定plan B，我唔係放棄，覺得自己唔會喺呢行做到3、40年，但想睇啱時機先，創業容易守業難。」

Kary坦言很喜歡唱歌，但現在太少人買碟，令她都有氣餒時候：「我都好感激公司，講衰啲明知倒錢落海，但大家仲有個抱負夢想，為呢個行業出一分力，自己都想睇吓可以做得幾耐，如果香港仲有人聽流行曲，都希望可以繼續唱落去。入行12年，今年覺得真係好難做，唱乜嘢歌好呢？如繼續唱情歌好難有突破，但唔唱K歌又搵唔到錢，o依家多咗好多競爭，香港人鍾意聽韓國、日本、台灣歌手。」

想要情人知己

事業上Kary想好plan B，但愛情上卻沒A、B餐給她選擇，經歷了「網球王子」洪立熙和余文樂兩段失敗感情，Kary說：「我o依家單身，主要好少出街，放工就返屋企，都有男性朋友傾吓偈，但冇進一步發展。」對於被指是黐身女友，才令她與余文樂的感情告終，Kary沒好氣說：「俾人咁話好無奈，之前為報道唔開心，我都係需要空間嘅人。」問有否機會跟樂仔復合？她說：「呢刻唔會，將來唔知，大家仲係好朋友。」問是否揀靚仔做男友？她大叫：「點解個個都咁講？我覺得唔係囉，雖然第一眼好緊要，但樣貌唔會永遠，性格吸引緊要啲，最緊要有共同嗜好，靚仔唔係主要條件，人大咗睇嘢唔同，想要情人知己。」