余文樂與吳雨霏（Kary)戀情半年貨仔眨吓眼玩完，Kary表面上扮堅強，其實有苦自己知！飽受情傷的她，始終硬頸放唔低，情緒低落搞到抑鬱！深知被外間狠批「唔夠靚」才是分手致命傷的Kary，把心一橫再玩變臉，升級至3.0版，竟倒模成JM (Janice Man、文詠珊）樣！

「JM樣」初現，為免過早曝光，連日來Kary大玩「隱術」，撞見記者時更狼狽掩面，更甚的是在車廂中開遮，莫非怕鎂光燈閃親其「新鮮」五官？

今年初被踢爆和余文樂拍拖的吳雨霏，雖是樂仔近年唯一首肯認定的女友，但「樂霏戀」一直不被看好，直至6月中，雙方以性格不合為由宣布分手。戀情半年貨仔玩完，據知是樂仔嫌Kary逼得太緊太黐身。

「樂嫂」個位未坐暖就慘被狠撇，Kary心情直插谷底，知情人士指她被飛後一直收埋自己，情緒低落致患上抑鬱，連朋友也不願見，情願玩自閉，深知「唔夠靚」是分手死因之一，自知輸在起跑線、曾有變臉前科的Kary，在這段玩自閉療情傷期間，把心一橫決意再變臉，並Upgrade成3.0版，成個倒模Janice Man咁嘅樣！

放大頭照驚變JM

記者在Kary近日的Instagram及微博發現，其面貌跟年初與樂仔拍拖時簡直判若兩人！上月30日，Kary於微博發放大頭照，「馳名」的豬膽鼻再三拉直，準頭變尖，膶腸嘴變薄，不經意梨窩淺笑，驟眼看與JM無異。最弔詭的是「成功進化」前，Kary一直冇膽將大頭照放上網，大多只有半邊面或大Wide Shot。

「JM樣」初成豈容閃失！上月25日下午3時，Kary乘白色七人車從跑馬地寓所往灣仔，只見為保五官「新鮮感」的Kary架上眼鏡、牛記笠記，在車廂中亦頭耷耷刻意低調。當司機發現記者後，其座駕突然改變行車路線，帶記者遊花園試圖撇甩追蹤。

車廂抓狂四招遮面

座駕漫無目的地左兜右轉，由於擺脱不了追訪，Kary惟有打道回府。當記者上前拍照時，昔日連拍拖亦大方任影的Kary竟如驚弓之鳥，非常驚青，立即耷低頭慌張地左操右操進入抓狂狀態，Kary情急之下隨手以外套遮五官， 明明一件衫絕對遮得晒有餘，但她又突然以雙手掩面，似乎怕鎂光燈閃親「JM樣」雛形，後來她更索性拉埋窗簾「禁拍」，當記者走到車前繼續拍攝時，Kary見前座有把長直傘，即勒令司機開遮擋鏡頭，長傘一撐何其壯觀！身形瘦削的Kary連人帶樣瑟缩於大傘之下，紋風不動，令記者未能完全拍得其「JM Style」。而司機亦趁此時踩油直駛入停車場，之後Kary整天不敢再出門，連日來亦未見其影蹤。

抑鬱扮堅強 怕瘀唔接Job

因為拍拖初期太黐身已經被樂仔飛過一次的Kary，幾經辛苦掹得番，但未夠半年又被飛多鑊，抑鬱到變臉的她，為免惹無謂揣測，極力於人前表現堅強，每日還抽時間在網上發功死頂。

而前年Kary簽約環球唱片，公司有意把她打造成新一姐，但於年初開個唱後，她便專心投入「樂霏戀」，直至被飛又患抑鬱，始終難以投入工作，知情人士説：「Kary覺得畀人飛勁瘀，極之唔想見人，叫公司暫時唔好畀Job佢做，希望等件事淡化先再出關，咁就唔使畀傳媒追問佢甩拖件事，趁機療情傷！」

約Cool魔風騷吔潮麵
樂仔聞舊愛「靚」咗陰陰笑

男神余文樂與吳雨霏極速分手，樂仔難得回復鑽石寡佬身份，心情靚到痹，當聞得舊愛又「變靚」後，即好友郭富城上身陰陰嘴笑不停。

上周五晚上11時，樂仔相約一班朋友到銅鑼灣潮人拉麵店風騷食麵，離開時被問有否與Kary聯絡，他未有回應，但聽到記者提起Kary「靚咗」時，即忍不住陰陰嘴笑，似乎「心中有數」。巧合的是，他的陰陰嘴笑表情，與老友城城今年5月聞得熊黛林主動分手時的表情如出一轍，風騷程度簡直一模一樣！

出席麵局的還有歌手洪卓立、湯怡及關楚耀等，席間樂仔談笑風生全程笑騎騎，又與友人到店外煲煙，期間發現記者，為保健康型男形象，他即轉身背向鏡頭，將香煙丢到煙灰缸後返入店內。

約晚上11時15分，近期紅爆的「Cool魔」張智霖（Chilam) 乘保母車到達，隨即入內會合樂仔。樂仔心情明顯大靚，除了在Instagram上載「潮拉麵」照，並留言「Try it」賣廣吿外，又上載與「Cool魔」親密搭膊照，令魔迷及樂粉羨慕不已。

張智霖友善Say Bye

飽餐一頓後，眾人各自散，約11時半洪卓立與緋聞女友湯怡先行離開，10分鐘後關楚耀亦步出店門，問到「潮拉麵」味道如何？他「直豎拇指」表示美味。約凌晨12時，「Cool魔」等相繼離開，並對記者友善揮手。