徐子珊擦身視后 看盡嘴臉 潛行抑鬱 自虐哭崩

徐子珊直言自己有潛在的抑鬱症,多年來靠拍攝喊戲宣洩內心抑鬱,雖然自覺此法也充滿自虐味道,但她卻很沉溺。出道時是四料港姐冠軍,橫掃歌影視新人獎,去年以《雷霆掃毒》陳家碧一角成為視后大熱,但最終與寶座無緣,讓這位「我最喜愛的電視女角色」得主,嘗盡圈中跟紅頂白的人情冷暖。

子珊從訪問一開始,就不斷用飲管戳杯中的青檸片,為她自爆有潛在抑鬱症,做了氣氛相襯的一闕前奏,她説:「我唔否認我有潛在抑鬱,我外表好似好精其實唔係,由參選港姐開始,已經好Naive!嗰時經理人話我冇經驗,可以試多啲唔同嘅嘢,我連參選嗰張合約都唔係好知係乜嘢一回事。我份人把口快過個腦,有乜都講咗先,但原來好多時率直係錯嘅。言者無心聽者有意,有啲佳麗會表現得好好,其實係有敵意,嗰時我攞修身美態獎,但唔講冧巴啦,有佳麗一齊影泳衣相時好Nice,但影完就走埋一邊放大張相,指住我問其他佳麗:『好Fit咩?』原來待人夠真喺呢行係錯,真都分好多Level,用錯地方,Timing錯,都好大問題!」

子珊的陰影延續到加入無綫成為藝員,甚至曾想過「劈炮」退出,她説:「入行頭幾年真係Enjoy唔到,如果唔係喺新人獎方面幾夠運,攞咗幾個歌影視嘅新人獎(香港電影金像獎「最佳新演員」、無綫萬千星輝頒獎典禮「飛躍進步女藝員」、2009年度十大勁歌金曲頒獎典禮「最受歡迎新人獎(金獎)」、第32屆十大中文金曲「最有前途新人獎(金獎)」等),我都走咗,因為真係非常辛苦!」

徐子珊擦身視后 看盡嘴臉 潛行抑鬱 自虐哭崩

被「朋友」不斷出賣

「我朋友已經貴精不貴多,仲試過畀同一個人出賣幾次!我自問冇害過佢,可能佢覺得咁做會喺某方面有得益,但亦有可能只係純粹損人不利己,我覺得自己好戆居,好Hurt!我嘅經歷可以話喊都無謂,係我太戆居、太冇主見,人哋叫我去撞板,我都照做,因為我以為佢係朋友,又點會害我先得o架,好彩我好早經歷咗呢啲嘢,但到依家我嘅Close Friend都唔多,我交朋友嘅觀察期特別長,好Close嘅朋友至少都識咗8、9年。」

邊個撐我?清楚晒!

一個深交摯友要用上差不多十年來「醸造」,試問人生有幾多個十年呢?現實不開心,子珊發現了戲劇「自療」之法:「我拍第一套劇《千謊百計》時,同時期喺出面拍緊《跟蹤》,經常唔夠瞓,又要拍好多場喊戲,可能太攰,我真係喊唔到,但點搽白花油都冇反應,乸到對眼又紅又腫,仲以為淚腺閉塞!但拍到後期我已經喊得好熟練,後尾至發現,喊唔淨止眼淚分泌,仲有情緒。後來有段時間唔開心,我記住唔開心時嘅每一寸皮膚、每個細胞係點反應?到遇到啲Heavy嘅角色,我就容許自己沉溺,盡情咁喊,將唔開心嘅情緒喺場戲度爆發,慢慢變成我嘅抒發渠道,呢種係演員嘅自虐,但我幾Enjoy咁樣嘅『自療』方式,試過好幾次我喊到停唔到,要慢慢學識Fine Tune。」

勇往直前鬥長命

因為這樣,子珊愛上了演戲,去年《雷霆掃毒》中的「陳家碧」給了她爆喊的機會,更讓她進身視后大熱,穿起綵帶、執起大聲公奮力拉票的她,上了寶貴一課:「過程中我感受最深嘅係人性,體會周圍啲人嘅嘴臉,突然間,好多唔喜歡你嘅人突然會喜歡你,頒獎禮愈近愈嚴重,到我冇獎(視后),佢哋又會冷淡番晒,我唔知點調節對佢哋嘅態度,當然都有本來唔鍾意你,見你輸咗反而鍾意你嘅,究竟係獎項關係定咩呢?但只可順其自然去適應,我唔慣走到某個位,即所謂嘅一線,因為無論咩位我都係咁做嘢!我入行八年唔算好長,呢行係鬥長命,一日唔走個Game都未完,話唔定我條命係『永久新人』呢!獎係死物,最重要係過程得到嘅感覺,要我比喻,我會講係好似衝緊百一米欄,周圍好多啦啦隊,我望到終點,但贏輸冇人知,總之猛咁催谷自己。」

失落視后,但子珊覺得「我最喜愛的電視女角色」更具意義:「我攞『我最喜愛的電視女角色』感受特別深,可能有人話『又唔係大獎』,但呢個獎係TVB同事投票選出,同觀眾投票性質好唔同,同事接觸過徐子珊真人,呢一票比唔真正認識你而投你嘅更有意義,我從來唔覺公司有咁多人撐徐子珊!」

同事「最喜愛」的我

「當年喺金像獎攞完『最佳新演員』,返到電視台我聽到好多説話,有導演話我:『攞獎喇!嚣啦!仲有心機做o架咩!』我忍唔住問:『係咪我做錯咗啲咩?不如話畀我聽,點解要咁講我?』我唔係咁嘅人就唔想被誤會,唔知我係咪過分坦白,但大家喺呢行撞口撞面都識,我唔想有太多猜忌,嗰次講完係好咗少少,但心入面都有芥蒂,呢段畀人誤會嘅日子,係我最唔開心嘅時間,我唔知過咗咁多年,大家對我接受程度多咗,定都知我份人係咁直,所以照投我票。」

自「遊」行重拾自由

子珊的此番體會,或許與她喜歡單獨旅行有關:「我之前放假一個人去咗里昂、阿姆斯特丹同倫敦旅行,周圍啲人唔識你,唔使顧忌,嗰一刻我做番自己,鍾意坐喺度望住啲古蹟就望,完全按自己步伐,不過今次同我入行第二、三年嘅嗰次單獨旅行好唔同,我望住個天,發覺天空已經好似冇當年咁大,我深呼吸完,以前會覺得豁然開朗,依家就好似有好多嘢喺裏面,重咗,冇咁輕鬆!」單獨旅行最重要的發現往往不是一塊陌生地的新奇事物,而是對自己體內那道看似熟悉的靈魂作最深究的開拓。

追求真愛?佢呃人!

事業上守得雲開,至於感情,子珊説:「前幾年屋企都有催,依家已經冇,我都想要一個Companion,有埋小朋友,家庭就圆滿,我希望第時小朋友去第二度生活,唔想成日畀人影、打格仔。但我再拍拖都唔會搵圈中人,因為唔想老公同人咀或者床上戲。不過依家好難交個真心出嚟,我入行冇耐有個男仔追我,我諗住做朋友先,都有應約食飯,點知畀人影咗,佢即刻閃,仲話:『我信你。』咁講即係佢身邊啲人覺得係我放料,我好Hurt,之後減少聯络,後來我發現佢追我時已經有女朋友!我真係好Naive,依家學精,有乜唔妥即走,但有好多人都唔坦誠,呃咗你先算,咩世界?同一錯誤我唔會再犯,但冇理由約會兩、三次就問人有冇女友,如果人哋有都答你冇,你又可以點?好多人對自己都唔坦白,喺屋企人面前乖仔又有錢,但私下唔係,呃呃吓連自己都呃埋,但完全唔覺有問題,我做人就『True to Myself』,對自己坦白。」

徐子珊

後記:愈挫愈強

徐子珊是典型的雙子座性格,可以一個女子搬着重甸甸的行李遊走歐洲,卻無法擺脱感情的羈絆:「我係個好想倚靠人嘅人,如果搵到一個可以畀我倚靠嘅人,我會毫不猶豫,成個人瞓晒身去倚靠佢,雖然我試過畀人出賣,感情受過挫折,但我仍然有咁嘅信念,我係鍾意聽身邊人講,多過自己出主意。」受過傷方知道要堅強,但子珊這種受過傷但依然堅持勇往直前的心態,更強!