自從90年代開始，周海媚（海味）走遍中港台三地拍劇，後來因為愛情，毅然將事業重心移至北京。雖然海味的感情生活穩定，但是她無意改變現狀，因為在演戲上，她早已經歷無數轟烈的愛情故事，她說：「喺一般觀眾心目中，做藝人真係好多姿多采喎，但係我嘅生活一啲都唔多姿多采，只係好平淡。」不過海味在事業上明顯進取得多，直言不可能原地踏步，要學到老、做到老。撰文：何慧斯

今次周海媚在無綫劇集《神鎗狙擊》飾演一個保險從業員，與張兆輝有不少對手戲，不過在接拍初期，海味坦言有點失望：「初初聽到呢套係警匪片，以為係搵我做警察，我幾想做madam，所以都有少少失望。其實我都有做過啲好硬朗嘅角色，我要cool起出嚟可以好cool，尤其係唔笑嗰陣。」

■周海媚慶幸自己是一個天性樂觀的人，今次失去了，相信總會有另一個機會。
攝影：陳俊強

事業野心大

事實上與海味進行訪問的前夕，筆者直覺海味性格沉默寡言兼柔弱，誰不知坐下來，不安的感覺一掃而空，而且外形保養甚佳，她笑說：「唔好咁講，有壓力，我唔知關唔關心態事，但係我成日都唔記得自己幾多歲，試過寫入境資料寫錯，好彩助手發現，即刻提醒我，我成日同啲朋友話唔好諗個老字，順其自然，做人冇話老唔老，應該有皺紋嗰陣咪有皺紋囉！」

言談間更發現海味不但性格剛強，還是一個不甘原地踏步的人，她說：「我都有少少自我，好似我今日揀呢套衫，只係會諗着得舒唔舒服，而唔會諗使唔使着得sexy啲？使唔使睇到條事業線？只係一心做番自己，就算喺螢幕上做咗好多唔同角色，但係喺訪問係做番我自己，盡量去話畀人聽，我係一個咁樣嘅人。」

■海味與張兆輝十幾年後再度合作拍劇，她最初以為找她做madam，她笑稱有點失望。
《神鎗狙擊》劇照

■當年海味飾演小芙蓉一角，其楚楚可憐的模樣，打動不少人心。
《大鬧廣昌隆》劇照

在感情生活上，海味亦有她的一套相處之道，雖然她在03年毅然為愛情到北京工作，不過她多次堅稱沒有結婚計劃：「唔覺唔覺拍咗十年，但係冇打算做任何嘢，我要講定先，你問我點解？我覺得冇必要，又唔係要生小朋友，o依家穩定咪得囉，冇必要做咁多嘢，加上我又忙，未諗到理由點解要結婚？順其自然喇！」問到她與其建築師男友劉先生是否有共識？她說：「初初想過，但係我一路拒絕佢，o依家冇再提。我覺得人生裏面有啲人有幾件事係好重要，一定要做，好似結婚生仔。但係喺我人生裏面，唔係要做呢啲嘢，我反而想追求夢想，有自己嘅事業。想繼續試多啲唔同嘅嘢，試吓做幕後搵啲好劇本，做吓策劃。」

婚紗夢粉碎

問到海味會否投資開戲？她坦言：「唔會，中國咁多人，實會有人願意投資，反而覺得古仔緊要啲，好故事難求。況且幕前我仲有興趣，我又未皺到冇人睇，我仲好鍾意做嘢。」

■海味坦言拍過太多結婚場面，粉碎了她的婚紗夢。
《學警狙擊》劇照

■海味笑稱可以勝任一些硬朗的角色，尤其不笑時可以好cool。
微博圖片

海味坦承她曾經對婚姻有過憧憬，可惜因為拍戲着得太多婚紗的關係，粉碎這念頭：「嗰陣我拍戲成日着婚紗，又或者係民初同古裝結婚，我冇統計過，不過保守估計都有十零廿次，所以已經冇咗呢個新鮮同喜悅，俾無綫破碎咗呢個婚紗夢！」

海味甚至因為拍得太多愛情故事，失去對愛情的憧憬：「會㗎，所以我鍾意平平淡淡，細水長流，邊有咁多轟烈愛情，做人只不過係做嘢、食飯同瞓覺，喺一般觀眾心目中，做藝人真係好多姿多采喎，但係我嘅生活一啲都唔多姿多采，只係好平淡。」

足迹走勻中港台各大小片場重地的海味，近年簽了一間內地的經理人公司，助她發展工作，問她會否計劃成立自己的工作室時，她說：「希望喇，我會朝住呢個方向發展，不過我仲有好多嘢要學。做人唔可以原地踏步，要做到老、學到老，我都要跟住呢個step去走同改變，要不斷工作去更新自己，人生先至好玩，冇理由因為呢二十幾年喺呢個演藝事業工作，就識晒所有嘢，時代係不斷進步，如果唔係成日都原地踏步，慢慢就會同周圍啲人融合唔到。」

迷惘如行屍

■在幕前工作了20多年的海味，希望嘗試做幕後的工作，作多方面嘗試。

即使海味懂得如何為自己打算，有自己的一套生存方式，亦難免有迷失的一刻，她說：「我記得第二次去台灣拍嘢嗰陣，當時我喺感情上唔係好開心，每一日開工都係行屍走肉，有一日同一個台灣前輩傾偈，我話覺得好似死咗一樣，完全冇生氣，點知個前輩答得好妙，佢話你做人大部份時間都係死㗎喇！」

海味續說：「我聽完更加迷惘，但係我都有慢慢細味呢句說話，有時喺人生裏面，冇可能無時無刻都搵到咁多刺激，惟有喺角色裏面，就可以搵到呢啲生命，因為我去演繹呢啲角色嘅時候，嗰啲遭遇唔會成日都遇到，所以做戲好玩就係呢個原因，可經歷唔同人生，嗰次之後冇再遇到呢個前輩，不過佢呢番說話真係幫到我。每個人都有唔同階段，點解啲人成日覺得好困難？因為佢畀自己好大壓力，有時諗到鑽咗牛角尖，但係我好隨緣，樂觀啲去睇，做唔到咪算，總會有另一個機會，我好識得安慰自己。」