《On Call 36小時》中的「一件頭」帶挈馬國明（馬明）大豐收，由馬來西亞拎獎拎到返香港，事業有成又單身，不獨圈中剩女搶住要，連無綫監製亦爭崩頭，拍完今年TVB重頭劇《衝上雲霄II》、《On Call 36小時II》，緊接年底接拍王晶回巢拍攝的金裝豪華劇！對於桃花運旺盛，馬明高呼：「吃不消！最怕激嬲人哋嘅fans！」更以唔會勾義嫂排除了跟唐詩詠的兄妹情；又話同香香公主唔熟無溝通，但朱晨麗呢？他就讚不絕口，更情不自禁為她護航：「佢係好努力嘅新人，啲人批評佢廣東話唔好，其實冇必要對一個新人咁嚴苛！」字字飽滿愛，看來接收「筍盤」的「幸運兒」暫時以11年港姐冠軍朱晨麗最有機！

採訪：方騫平　攝影：張詠森
場地提供：金信射箭訓練中心

射箭新手馬國明瞄準標靶紅心位置出發！射了十多次，好快就可射中紅心，連導師Rocky Yip都大讚他眼力兼定力夠，極有潛質。馬明強調：「但我唔係射情人箭，男仔要修身、齊家、治國平天下！今年目標係置業，希望可以一擊即中，最好喺我住緊嘅港島東區大型屋苑買到一個1300呎大單位，同父母共住，39歲人，心態同後生仔唔同，好鍾意同屋企人相處，兩老年紀大，盡量一齊生活，冇嘢重要得過屋企人，就算多多錢都冇意思。不過，家陣樓價真係好貴，如果大單位唔啱價，可能喺附近買個細細哋單位自住，都可以照顧到雙親嘅，呢個係第二方案。」

莫道你在選擇人

馬國明揀女仔，是否跟射箭一樣有定力同眼力？他即說：「你揀人，人揀你啫，同行個個都係靚女，靚女梗有男朋友啦，有男朋友嘅我唔會考慮，無謂走入個三角位搞得咁複雜，我一向都唔鍾意同人爭；行外人就會嫌棄你，我媽咪個麻雀腳試過話介紹個好女仔畀我識，點知個女仔聽到話係電視藝員馬國明即耍手擰頭話：『馬國明？部部戲都有唔同靚女女友，佢會有好大誘惑，咪搞了！』就係因為咁，連見面溝通機會都冇埋，所以呢方面順其自然啦，唔係話要就要。」

賺錢買樓最實際

只要正正經經有錢搵，馬明唔介意多緋聞，好似可以跟朱晨麗孖住上，最好情侶檔收貴啲。他哈哈笑說：「冇緋聞就冇talking point，我知㗎，但緋聞對象要單身，有伴侶就會影響到人，件事變得唔好睇！相士話，今年我會惹是非，唔係多桃花呀！所以今年要少說話，多做事。咁多單緋聞中，最好笑係話崔建邦為爭唐詩詠，爆粗鬧我！睇封面標題好似好勁，但睇內文就好好笑，冇可信性。呢期突然多咗咁多艷福，真係吃不消。」問到在Event中主動錫面的名模Mandy Lieu有否機會時，馬明即笑不停，「嗰次活動要送花畀佢，佢回禮啫，咁有靚女錫梗開心㗎。」問到多久沒試過貼近女生的嘴唇？叻唔切的馬明搶答，「拍劇成日都有啦。其實太鬼妹唔係幾好，因為文化差異問題，好難溝通，混血兒就好嘞，夠靚女。其實拍拖最緊要感覺，父母好開通，但感情事而家唔諗住嘞。」

對於被無綫點名力捧造就他登上今年「視帝」，他竟說：「其實拎乜獎我都唔介意，就算爭男配角都冇問題，最重要獎項可以帶挈我賺錢買樓，呢方面最現實。不過，我都好多謝公司同晶哥畀機會我，可以同前輩葉德嫻合作，從中偷師。」

並不是十八廿二，馬國明目標明確，搵錢買磚頭最穩陣。

談到一堆緋聞，馬明笑言唔介意。

緋聞女友逐個評

唐詩詠︰佢係好女仔，相識多年，做朋友OK，相處得好好，但做女朋友又係另一回事。我冇八過佢同崔建邦嘅戀情，只可以話我怕煩，唔會走入一個3角關係，我同邦邦都好熟。

岑麗香︰雖然香香公主好可愛，但我同佢唔熟，冇乜傾談，大家根本冇溝通，連佢手機號碼都冇，平日唔會有任何聯繫，拖埋佢落水唔好意思，對個女仔唔公平，搞到我好尷尬。

朱晨麗︰佢係好女仔，佢係好努力嘅新人，畢竟新人有新人嘅階段！但我哋冇乜聯絡，自從上次一齊出席event後就冇見過面。