馬國明床戰江美儀不覺激 完事超尷尬問人「得唔得」

噚晚觀眾睇完《衝上雲霄II》,欣賞完馬國明同江美儀一場非常激烈「梅開二度」嘅床戲之後,是否仍覺回味?未夠喉?今晚仲有0架,不過係咀戲,唔係床戰。但通訊事務管理局今日就收到投訴,指啲床戲意識不良同教壞小朋友。

今日馬明BB聯同劇中風頭被搶嘅吳卓羲、何君誠一齊到尖沙嘴手錶活動,同場仲有大美人鍾楚紅。問馬明BB感覺如何?佢話:「我噚晚都有睇,唔係好激,點解你哋會覺得激呢?」原來係江美儀溫馨提示佢睇0架,馬明BB仲嗌人做「美儀」,好親切呢。

馬明話:「我成日都講,我同美儀條線係幾得意,幾搞笑,噚晚所謂床戲,都係幾得意。」但係你……你…你…你好猴擒喎!馬明BB聞言即尷尬儍笑……因為聽到大家係咁問佢:「點呀?得唔得?」唔明?噚晚馬明BB同江美儀床戰完畢,第一時間就問女方:「喂,得唔得?」江美儀當時答:「得!」馬明都回敬:「我都得!」即係互相俾對方滿分。

唔知馬明BB喺現實生活中,會唔會都係咁問:「喂,得唔得?」不過佢頭先就話:「都係跟對白講啫,嗰啲唔係我自己加嘅。」身旁嘅吳卓羲即插嘴謂:「咁冇理由係女仔主動講0架嘛,梗係男仔講0架啦。」馬明想補飛之際,記者即追問吳卓羲:「點呀?得唔得?」吳卓羲交足戲做咗個思考嘅表情,但馬明唔俾佢講,可惜馬明只係識係講:「同埋…同埋…」此時吳卓羲插嘴道:「可以再激啲嘅。」

馬明仲預告之後仲有床戲,唔止一場,咁會唔會再問女方:「喂,得唔得?」呢句呢?馬明尷尬笑道:「好似就冇喇。」激唔激過呢場?「第一場應該係最激0架喇。」咁你頭先又話唔激?

馬國明床戰江美儀不覺激

馬國明床戰江美儀不覺激