無論現實或拍劇,入行11年,馬國明只跟曾華倩及胡定欣傳過緋聞,基本上,他的新聞向來不多,為人低調踏實,跟他演出的角色不謀而合。
最近,馬國明在新劇《談情說案》卻一改多年建立的戇直形象,變成一名Playboy(玩家)型的花弗警察,對於今次轉型,馬國明不但沒有擔心,更非常有信心說:「我絕對玩得起!」撰文:霍淇
馬國明在劇中飾演的盧天恒,自命風流倜儻,不愛受拘束,嚮往不用負責任的戀愛,屬一名不折不扣的「玩家」。他先後與多位劇中的女演員廖碧兒、沈卓盈等有激咀及埋身肉博戲,艷福無邊。
女對手要好專業
對於激烈的床戲,馬國明笑言也曾擔心會被指搏懵。「其實拍呢啲戲男仔冇咩所謂,但女仔就會尷尬啲,如果個女仔尷尬嘅話,男仔就好難做,因為做得多有機會畀人話博懵,做得少導演又可能會話唔夠喉,好彩呢套劇嘅女對手都好專業,好快就可以完成啲鏡頭。」女對手專業,他又是否專業到可以沒半點尷尬?「冇,其實一路拍咁多戲都錫過唔少女仔,都有啲經驗,以我拍咁多年戲嘅經驗,只要女仔唔怕,我都OK嘅!」
很難想像一直給人感覺平實的馬國明,扮起「玩家」的模樣,心存懷疑地問他是否真的可以演得似模似樣?他份外有信心地大聲說:「梗係似啦!大家睇完呢套戲就會覺得我係!」
馬國明對自己絕對有信心,但仍有隱憂,因為他不知道這些「激烈」的場面能否播「出街」。「電視尺度比較嚴謹,好似有場戲要我由門口錫碧兒到上床咁,真係好激,而劇裏面亦有啲露背、出浴鏡頭,雖然都有諗過出唔出得街,但冇辦法,為咗劇情需要都要拍咗先!」看來馬國明的擔心也多餘,因為他跟碧兒這場肉搏戲,早於上星期已播出。
兒時夢想做警察
做警察,原來是馬國明的兒時夢想,所以就算在劇中他多有艷福,也不及他完了這個童年夢想來得難忘。「其實戲中最深刻嘅,應該係啲查案劇情。以前細個睇《新紮師兄》都有諗過做警察,喺呢套劇拍咗一啲飛車、點部署捉賊嘅劇情,我都覺得幾得意,如果真係做警察應該幾好玩。」
做完Playboy警察後,馬國明稍後將會與奧運體操金牌得主劉璇合作拍攝新劇《女拳》,即使不用他打得勁,卻因為他想每場戲都親身上陣,所以他已積極練武。馬國明更透露劇中會給他一個新挑戰,就是拍劇以來第一次做一個真真正正的奸角,問他是否「奸得起」?他鬼馬笑說:「奸得起!你睇我做Playboy都Play得起,你就知我奸得起啦!」
後記:希望分番個獎
在之前的《鐵馬尋橋》一劇中,馬國明飾演為人忠直、愛鋤強扶弱的武打師傅顧汝棠而大受好評,風頭壓倒第一男主角的鄭嘉穎;今次他演Playboy又似模似樣,問他對年底的頒獎禮是否充滿信心?他說:「希望分番個獎,最緊要係有得爭吓!」