鄭嘉穎同佘詩曼呢對舊情侶今日為咗搵真銀「復合」，喺銅鑼灣出席聖誕亮燈儀式。
儀式後兩人各自做訪問，突然有一位瘋狂粉絲突破圍欄衝向阿佘，不停大嗌﹕「佘詩曼我好鍾意你呀！」即時有四名保安員將該名佘粉撳落地，見到阿佘被嚇到退後幾步，佘粉唔好意思話﹕「對唔住，嚇親你，但我真係好鍾意你。」阿佘事後話喺內地經常遇到瘋狂粉絲，但咁驚險都係第一次，佢話﹕「呢次最驚，我個樣似好冷靜？吓，唔係可以點，對鞋太高又跑唔到。」
嘉穎同阿佘出場時各自拖住一位小朋友，但兩個人企到好開，嘉穎被指冇英雄救美，佢笑而不答。問情侶價係咪特別高？嘉穎話﹕「吓，咁幽默，個騷無綫接，我冇所謂。」明年嘉穎同阿佘都返無綫拍劇，公司似乎想佢哋復合搵銀？嘉穎話﹕「唔知，你哋(指記者)高層咩？都冇同我講。」
對於《步步驚心》的吳奇隆同劉詩詩公開戀情，嘉穎話拍拖公開好正常，仲恭喜埋另一對劉愷威同楊冪，但自己就唔急住結婚。被問有冇機會同阿佘復合？佢話﹕「唔諗呢啲，暫時朋友關係非常好。」會唔會考慮返內地搵另一半？佢話﹕「講咗明年返TVB搵食，我係無定向風發展，等上天安排啦！」
成幅全家幅咁喎！
阿佘條腿，無敵呀！
阿佘遇狂迷，嘉穎竟然冇英雄救美！
阿佘狂迷嚇親阿佘啦！
嘉穎好受歡迎呀！