無綫新劇《怒火街頭》越谷越火，鄭嘉穎一幕「露股街頭」成為城中熱話，劇中花名「 Law霸」的他名副其實堅「籮霸」，連胡杏兒都大讚優質股。但論最火爆場面，還看嘉穎乒乓波枱肉搏杏兒一幕，更因動作過激而遭監製刪剪部份情慾場面。

無綫熱播新劇《怒火街頭》播出第一集，鄭嘉穎飾演的爛仔律師於街頭露股罅一幕，立即成為網上熱話，就連嘉穎亦笑指自己為籮霸，除了露股搶收視外，劇中他亦有不少不文動作，向來官仔骨骨的嘉穎十分喜歡劇中的爛撻撻造型，他說：「今次真係好好玩，而且好幸運可以等到一個可以發揮嘅角色，所以自己都好畀心機去演。」

鄭嘉穎和胡杏兒第三度交手，兩人在《怒火街頭》中，扮演一對歡喜寃家，鬥氣鬥出愛火。　攝影：林德雄

乒乓波枱肉搏

嘉穎除了露股罅玩不文之外，還要挑戰超激情慾戲，他說：「我同杏兒有場喺乒乓枱上嘅激情戲，拍咗之後監製覺得太激，都要剪好多，所以唔知出嚟嘅效果會係點，我都好想睇。」問杏兒拍親熱戲是否需要向男友黃宗澤備案時，她說：「冇呀！佢都拍唔少喇，我反而怕嘉穎 fans呷醋多啲囉。」

由於劇中兩人均飾演律師，故有不少法律上的專業對白，在劇集《律政新人王》已扮演過律師的杏兒說：「雖然我唔係第一次做律師，不過今次要做一個大律師，所以好多法庭上嘅戲，啲對白好難。之前係做律師仔，而今次係做一個大律師，係比之前成長咗，相對經歷嘅嘢亦都多咗。」

杏兒續說：「套劇講我喺深水埗長大，喺工作上好努力向上爬，想屋企環境好啲，高攀有錢人，唔係一個太正義感嘅律師，會有少少不擇手段去做嘢，其實都唔係乜嘢壞人，只係為上位會走吓法律罅，所以法律上係冇問題，而道德上就會有錯。」

既然杏兒如此不擇手段，會否為目的而出賣身體，她說：「咁又冇，只係會食吓飯，俾人摸吓手仔同大髀都會有嘅，唔會太過份囉。」

強記六頁對白

問到嘉穎拍打官司戲份可有經常 NG時，他說：「對白要 NG係好正常，冇邊個演員係冇 NG囉，係冇可能！不過今次大家都記性好好，呢套劇嘅對白已經比我喺《宮心計》嘅對白簡單好多。」

嘉穎認為作為一個演員一定需要心中有團火，他說：「作為一個演員冇火就死喇，自己都想試唔同角色，唔想俾人定形。」今次已是兩人第三次合作，杏兒更大讚嘉穎說：「大家合作一次比一次放得開，今次大家撞埋真係好有火花，而且佢記性真係好好，法庭上嘅對白成六頁紙，佢都可以記得晒。」

向來 cool爆的嘉穎直言除了拍劇有火之外，平時亦有發火的時候，他說：「都有噴火嘅時候，點解成日話我黑面喇，所以我家都盡量練多啲微笑，對住一啲不忠不實嘅報道亦都一笑置之，我都有好好研究過有乜嘢解決方法，盡量唔去做損人利己嘅雜誌訪問，唔想再做儍仔，佢哋要寫就由得佢哋去作新聞，呢方面我就真係控制唔到亦都幫唔到佢哋。」

服裝提供： Club monaco
場地提供：龍璽

籮霸鬥索腿

鄭嘉穎憑「露股街頭」人氣冲天攞頭威，接棒由陳敏之日日露肩晒索腿，還預告嘉穎杏兒肉搏連場，《怒火街頭》怕且要改名《慾火街頭》更貼切。

籮霸遊街

借醉激吻

天后受辱