杏兒 嘉穎 名花鬥筍盤

鄭嘉穎和胡杏兒在新劇中經常鬥氣，但戲外杏兒大讚嘉穎是城中筍盤王，嘉穎亦欣賞對方演戲投入，可惜杏兒名花有主，嘉穎惟有自嘆是孤獨王老五。

鄭嘉穎和胡杏兒在新劇《怒火街頭》再次合作，由鬥氣冤家到擦出愛火花。劇集收視理想，嘉穎承認是為他打了一支強心針：「拍劇唔係為攞獎，口碑勝過一切！」杏兒亦不敢居功：「其實觀眾口味好難估，但拍嘅過程大家都好開心，可能觀眾鍾意我哋鬥吓嘴，同劇集節奏明快啲！」

嘉穎和杏兒過去曾多次合作，但今次特別有火花，杏兒解釋：「之前合作過《舞動奇跡2 》同《烈火雄心3》，可能《烈》劇角色比較內斂，撞出嚟冇咁嘭嘭聲！嘉穎今次嘅角色玩嘢啲，突破咗以前官仔骨骨嘅形象，不拘小節又爛撻撻，其實都係做番佢自己！」杏兒大讚嘉穎是城中筍盤王：「其實無綫唔止陳豪一個，嘉穎都好筍！我都希望同佢傳吓緋聞！」嘉穎聞言亦「回敬」說：「我只係普通王老五，到依家仲未搵到女友。雖然杏兒係好女仔，演戲有天分，可惜心有所屬Unavailable呢！哈哈！」

親熱戲一Take過

他倆於劇中有不少親熱戲，杏兒坦言有點尷尬，幸好大家早有溝通，一、兩Take便成功，反而嘉穎覺得沒有所謂：「記得其中一場都幾激，但拍之前對好晒位，埋位時唔可以有加多減少，唔係會令個女仔好驚！」嘉穎在劇中有不少大膽演出，露完股罅又只用毛巾圍着下身通屋走，十分「香艷」，他笑說：「劇本原本只係露孖煙囱，不過我條孖煙囱太乾淨，唔啱Law霸不修邊幅嘅個性，後尾導演要求我將條褲拉低啲，都覺得OK！」

杏兒大讚嘉穎是城中筍盤王。

嘉穎飾演不拘小節的角色反而更出位。

名花有主的杏兒拍親熱戲時感尷尬。

陳敏之計劃奉子成婚

去年底陳敏之患上淋巴炎，她表示要感激拍拖六年的男友耐心照顧，雖然已承認彼此已認定為終身伴侶，但強調不會閃電結婚，還笑言「有餡」先結！

最近陳敏之在劇集《怒火街頭》中飾演妓女，憑一雙43吋長腿被封為「索腿天后」，獲不少人讚賞。索女背後，原來一直有一位猛男細心照顧！去年底，敏之患上淋巴炎導致面部浮腫，要停工休息，多得男友William悉心照顧，她說：「病嘅時候有個人喺身邊，感覺特別深。」

跌斷骨有價值

一向不會將感情事公開的敏之，突然爽快承認，令人有點意外，她解釋：「我哋拍咗拖六年，大家感情穩定，但男友唔係圈中人，所以一直將感情事低調，依家大家再問我，我會輕輕鬆鬆咁回答。」問到婚期？敏之耍手擰頭說：「承認拍拖唔代表要結婚，依家結同唔結都冇分別，依家仲係事業衝刺期，如果真係有咗BB先會考慮！」

《怒》劇口碑甚佳，敏之在拍攝期間曾跌斷左邊鎖骨，她認為十分值得：「依家好番晒！啲骨埋晒口，仲硬淨過以前。」談到劇中狂騷43吋長腿被封「索腿天后」，她笑言當之無愧：「讀書時有42吋長腿，原來一直報細咗，最近再度發現有43吋！我承認呢部劇有好多大膽鏡頭，露腿、露背又露肚，但身為演員只想演好角色，其他冇所謂。」她透露為了解性工作者的內心世界，開工前導演找來一位任職夜總會的「媽媽生」與她傾談，她說：「原來好多性工作者背後都有個故事，有啲為咗賺學費，日頭返學，夜晚變身夜總會小姐，咁當然有啲真係貪錢想賺一筆！」

陳敏之擁有43吋長腿，被封「索腿天后」當之無愧！

演出備受讚賞，陳敏之坦言辛苦都是值得！

不急於結婚的陳敏之，不介意奉子成婚。