王宝宝（春卷）同張苡澂等今日以評判身份，喺深水埗出席水著模特兒大賽。

春卷經常被影到同男李思捷出雙入對，拍拖已經係公開秘密，甚至被拍到出入酒店；上月初李思捷出席《熟男有惑》飯局時，思捷被媽媽催婚，李媽媽仲話思捷緋聞女友個個都好，不過對兒子結婚一事，就話順其自然。

然而思捷從未正式承認春卷呢個女友身份，加上男方緋聞多多，除咗同0靚模Naomi搭上外，又同陳雅倫傳緋聞，日前又被流出同疑似新歡Sammy Hon錫面照，表現親熱。

男友緋聞多多，咁身為女友嘅春卷有冇不滿呢？春卷竟然話：「佢一向多緋聞，我o依家冇拍拖。」吓？冇..拍..拖？

唔通佢哋分咗手？春卷就話：「我同佢事嘅唔想講太多，我哋一向都唔係好講，最近都有見面食飯，we （are）still very good friend。」噢，降呢為好朋友了﹗

咁佢同李思捷出現乜嘢問題？春卷只係話：「每一段關係都有自己問題。」

不過李思捷未曾講過分手，（其實佢都冇認過拍拖，又真係好難會認分手﹗）o依家係咪單方面宣佈分手呢？春卷只話：「唔多講，佢想做咩佢決定，我哋一直都係very good friend。」春卷再三強調現時係單身。

春卷今日出席活動，強調自己現時單身，仲話自己冇拍拖。

挺胸收腹的春卷。

春卷話同李思捷係好朋友。

李思捷緋聞多多，曾同陳雅倫傳緋聞。

早前流出同疑似新歡錫面照。

Naomi曾經喺一個場合同春卷見面，兩人握手握得好勉強。

雖然多次同影到拍拖，但李思捷從未確定女友身份。

又被影到啦！

王宝宝早前着晒三點式出席活動。

春卷宣佈單身 李思捷：佢咁講呀？

「玩嘢王」李思捷女友王宝宝（春卷）今日喺深水埗出席活動時，就自爆0依家冇拍拖，自己係單身，意味住佢同思捷戀情玩完，佢仲話同思捷係好朋友。

好喇，春卷單方面爆完響口喇，咁男方又點回應呢？真係咁啱得咁橋，思捷今日有活動見傳媒，佢聯同莊思敏及陳庭欣，現身銅鑼灣行人專用區，為魔術師甄澤權街頭演出打氣。

思捷同春卷雖然拍拖咁耐，但就從未確認女友身份，就算被多次影到出雙入對，甚至出入酒店，都冇認過春卷係女友，期間佢先後同其他0靚模或女星傳緋聞，被指係花心蘿蔔。

對於春卷表明單身，事前似乎唔知情嘅思捷，只強調一向唔講感情事，佢仲好風騷話：「我日日都有拖拍，一陣同媽咪拍拖。」並以「Special very Special」嚟形容春卷關係，提到方中信話佢係喼汁哥點春卷，仲哈哈大笑話自己屋企點都有兩支喼汁。

不過當記者講到春卷喺另一活動上，親證自己係單身，思捷就認真咁反問：「佢咁講呀？我咁講，我同佢關係非常好，佢絕對永遠係我Close嘅人，我哋關係好好冇變過，我唔會衰格話唔熟。」

既然唔會話唔熟，咁佢同春卷究意關係係點呢？思捷就話：「感情上冇變，佢絕對係200分好女仔。」佢又指自己尊重對方言論自由，仲讚春卷係靠自己拼勁工作嘅勤力女仔。

不過女方已經認單身喎，咁思捷所講的感情上冇變，又即係點呢？？

問到係咪花心導致分手？思捷堅定話：「我唔覺得花心。」但又傳出咁多緋聞……

再問係咪冇畀承諾對方而導致分手？思捷又突然話堅持唔講感情事；既然春卷宣佈係單身，咁會唔會祝福佢搵到好男人？思捷就話：「搵到咪祝福。」

春卷王宝宝認單身，李思捷事前似乎唔知情。

李思捷撐魔術師甄澤權活動。