十年港姐曹敏莉 湊夠「好」字封肚

2003年港姐冠軍曹敏莉(Mandy),今年剛好當選10周年。Mandy沒有如其他港姐拍戲拍出燦爛星途,但有得必有失,當紅港姐感情沒着落,Mandy卻有一個美滿家庭。2010年,她下嫁金融才俊張家傑,翌年7月誕下女兒張逸晴(Dora、乳名多多), 今年再懷男嬰Marco,預產期9月尾,年僅31歲的Mandy已湊夠一個「好」字,揚言兩個夠晒數。外間覺得Mandy婚後做少奶奶,其實她從沒停工,一直是港姐慈善組織「慧妍雅集」的核心成員,7月更連任慧妍會長,繼續忙搞活動、籌辦晚宴,生B前還幫手義賣月餅,「有咗上年經驗,就算多咗個小朋友,我都處理到會務。」

2003年港姐冠軍曹敏莉女兒張逸晴

港姐生仔送禮券

慧妍雅集有一大班港姐會員,大部分已生兒育女,今年慧妍繼續喜事重重,先有袁彩雲上月誕女,曹敏莉和陳茵媺亦先後懷孕。每次有港姐誕B,慧妍都會送禮,Mandy指慧妍已送上禮券祝賀袁彩雲,「每位會員都有交會費,我哋會抽少少會費出嚟買禮券,代表一班會員嘅心意。」慧妍雅集於1982年創立,部分資深會員已抱孫,創辦人兼永遠名譽會長朱玲玲的新抱郭晶晶剛剛產子,有甚麼賀禮?「慧妍冇規定要送禮俾抱孫會員,但close啲嘅會員,我哋會私底下買禮物,不過未商量送乜。」慧妍每年七月換屆,大肚Mandy仍得到一眾會員投下信任票,再度連任會長,「早幾年開始做副會長,上年開始接替趙雅芝做會長,已經有一定經驗,可以邊湊小朋友邊做嘢,好彩呢幾個月比較得閒,有時間生BB,生完之後就開始搞籌款晚宴,今年以小朋友為主題,會捐款俾幫助單親、病童嘅機構,12月仲會去主題公園,俾一班基層小朋友去玩,可以帶埋多多去……」一說起慧妍,會長便滔滔不絕,「慧妍嘅工作係好有意義。」

大肚茵媺好少嘔

Mandy多港姐朋友,與新任媽咪陳茵媺(Aimee)和朱凱婷(Heidi)最老友,「好開心大家嘅小朋友年紀差唔多,我大女同Heidi囡囡都係兩歲,我細仔同Aimee個BB又差唔多時間,遲啲可以搞個媽咪gathering。」Aimee初懷孕,正陀第二胎的Mandy當然有傳授心得,「我哋都有傾吓,聽聞佢冇乜嘔,不過佢嘅事都係問番佢啦!」果然夠口密!

Aimee與陳豪6月在法國秘婚,只邀請了幾位圈中密友出席,好姊妹Mandy是其中一位,當時她已懷孕近6個月,仍決定飛去法國祝賀老友,最後卻因自己大懵缺席,「我臨去機場前幾個鐘先發現護照過期,之前去旅行已經發現護照差唔多到期,但冇幾耐就大肚,湊女、慧妍工作又好忙,唔記得咗去換。」

第二胎一擊即中

生第二個小孩,是Mandy和丈夫計劃之內,一試就中獎,「最主要係想多多有個伴,兩個小朋友年紀相差細啲,會相處得好啲,佢哋一齊玩就唔使父母陪,我可以做自己嘢,哈哈!」Mandy笑言這是美化想法,生多個其實增加了三倍工作量,「一個喊緊,另一個又話唔舒服,又要湊佢返學!」她凡事親力親為,連陪月都覺得自己沒用,「生完多多我唔覺得,好多嘢自己做番,陪月話『你都唔使我啦!』所以今次唔請喇,媽媽會幫我手。」懷孕4個多月時,已經照到腹中塊肉是男嬰,極速改名Marco,「懷第一胎已經改定,諗住生女叫Dora,生仔叫Marco,今次咪順理成章用番!冇乜特別意思㗎,純粹覺得好聽。」Mandy負責改英文名,中文名仍未決定,但由丈夫負責。

雖然生仔生女沒所謂,但女人都是購物狂,Mandy為囝囝掃貨卻有失落感,「女仔衫褲好cute,男仔嘢就唔cute喇,好難買!」以前為囡囡買下大批衫褲鞋襪,因為太cute未能傳給細仔,忍痛割愛,「今胎生仔嘅唯一唔好處,就係嘥晒多多啲衫,全部送晒俾人喇。」以後多買中性衫或tee恤,就可以兩份穿囉。

2003年港姐冠軍曹敏莉女兒張逸晴

嘔足四個月

今次陀Marco,Mandy重了40磅,估計他出生後幾有分量,「個肚大得好快,兩個月已經見肚,好多人估到我有咗!」上次她懷孕頭五個月勁嘔,今次好少少,嘔了四個月,「開飯前聞到陣味都想嘔。」她的口味沒太大轉變,唯獨不能食魚,BB吸收不到Omega-3,身為代言人的她,進食雪肌蘭DHA丸補充番。

一直崇尚健康的Mandy,一家人主要吃有機食物,並打算在港進修營養學,但因再次「中獎」要推遲計劃。「好多小朋友唔鍾意食菜,多多就相反,佢最鍾意食綠葉沙律、番茄和生菜等。反而零食佢唔鍾意,俾粒糖佢都唔擺入口。」Mandy堅持遵守食物金字塔,炮製多款多菜少肉午晚餐,例如魚肉菜飯、雜菜肉碎意粉等,多多食得津津有味。

首次返學即打風

為免多多將來呷醋,Mandy早已教導多多要錫弟弟,「我好早已經同佢講,You are gonna have a brother(你將會有一個弟弟),指住個肚同佢講Marco’s here,依家我問佢Where is Marco?佢識答in mommy’s tummy。 佢依家好鍾意拎住個蘋果扮同細佬餵奶,又同細佬講goodnight。」Mandy曾在美國留學,中文程度一般,主要以英語和多多溝通,「依家要開始講多啲中文,佢學校好着重兩文三語。」兩歲的多多就讀紅磡區一間熱門幼兒園,幼稚園部在九龍塘,可以直升至K3。多多當日面試一擊即中, Mandy覺得致勝之道是夠乖,「佢表現中規中矩啦,問佢顏色、生果佢都答到,最重要係冇喊。」多多第一次返學便出師不利,因為颱風尤特吹襲,一開學就放假。正式返學頭幾日,Mandy可以陪上堂,「我見佢聽故仔同唱歌, 都幾乖,不過成日擰個頭望住我。」現在沒媽媽在身邊, 老師看得出多多很掛念家人,告訴Mandy她上堂扭計, 「接放學我問佢Are you happy? Do you like school? 佢又話yes喎。」姊弟年紀相差兩年其中一個好處,是方便弟弟入學, Mandy希望弟弟能入讀同一間學校,但學業事宜由丈夫決定。「佢好叻做資料搜集,不過暫時未決定讀咩小學, 會喺幼稚園階段睇佢性格發展,如果佢坐得定,會俾佢入傳統學校;如果佢愛探索,會送佢入國際學校,最終會送佢去外國讀大學。」父母分工多數是母親掌管學業,父親負責玩,Mandy與丈夫則相反,「我負責扮靚同飲食,睇佢大便正唔正常,哈哈!」她大讚丈夫好肯湊B,令她有信心生多個,但他們不打算生第三胎,「湊兩個已經唔容易,我係好小心嘅人,盡量唔會俾意外發生。」

2003年港姐冠軍曹敏莉女兒張逸晴

撰文:Ling
攝影:King’s(部分相片由受訪者提供)
設計:Gary
鳴謝:雪肌蘭