田蕊妮 翻滾吧!巨輪

人生有多少個巨輪,沒有人能預計到。自小過着平凡生活的田蕊妮,沒想到入行後,竟有着大大小小的巨輪等候她。面對每個關卡,阿田遇上不少挫折,遭人白眼、聽過噓聲,沮喪得想過放棄演藝事業。不過,她跟《巨輪》的姚文英一樣,以堅強不屈的性格去扭轉命運,加上與老公杜汶澤互相影響,阿田終於悟出怎樣的心態令自己更開心。撰文:黃曉妍

田蕊妮
■田蕊妮在娛樂圈打滾多年,曾遭人白眼、被噓,憑堅毅不屈性格扭轉命運。攝影:陳順禎

田蕊妮在劇集《巨輪》中,與蕭正楠識於微時,漸生情愫。劇照
■田蕊妮在劇集《巨輪》中,與蕭正楠識於微時,漸生情愫。劇照

田蕊妮在健全的家庭成長,過着平淡生活,受媽媽嚴勵管教的她,未試過一個人出街,就連廣東道在哪裏也不知,田媽媽只怕女兒入世未深,阿田說:「同學打嚟我屋企,爭啲俾阿媽查三代,所以我入行前冇巨輪。」

熱愛唱歌的田蕊妮(中),當年勝出《未來偶像爭霸戰》歌唱比賽入行。資料圖片
■熱愛唱歌的田蕊妮(中),當年勝出《未來偶像爭霸戰》歌唱比賽入行。資料圖片

未獻聲已被噓

人生首個巨輪,就是參加《未來偶像爭霸戰》歌唱比賽,阿田說:「由細到大,我喺條村都出名唱歌好聽,因為父母唔畀我出街,我又鍾意唱歌,所以佢哋買卡拉OK畀我喺屋企唱,每日娛樂就係做完功課喺屋企唱K,粉絲就係隔籬鄰舍。到咗十幾歲,心諗點解屋企人成日要我唱歌畀人聽,我唔想再去娛賓,覺得好核突,阿爸仲叫我去試吓參加比賽,最初我唔肯去,但佢開咗條件,如果我贏佢就戒煙,最終我贏咗冠軍入行。」

縱使冠軍銜頭令阿田的明星夢發得更大,但原來並不代表一切,93年12月31日的五台聯播倒數活動,令阿田終於夢醒,她說:「好榮幸代表亞視去參與,當時覺得自己好勁,現場有五萬位觀眾聽自己唱歌,好有亞視一姐感覺;當司儀介紹我出台之際,聽到全場噓到爆,我全身發熱,想即刻返屋企,我望一望媽咪,佢兩隻眼紅晒,我心諗點算,好彩我性格堅強,同自己講練咗首歌咁耐,就算俾人噓都要唱,希望唱完會有少少掌聲,我記得當時係一路標汗一路震住唱,呢個係我好大巨輪,原來呢行唔係想像咁簡單,唔係你企喺台上就有掌聲,仲要睇觀眾畀唔畀你企,嗰次真係好大打擊。」

一齣《縱橫四海》令阿田為人認識,成功冷卻其出國留學夢想。劇照
■一齣《縱橫四海》令阿田為人認識,成功冷卻其出國留學夢想。劇照

處女劇嘗甜頭

當年只有15、6歲的阿田硬着頭皮過了關,誰知第二關已等着她,就是唱片公司高層在阿田面試時,徹底地打擊其信心:「佢叫我放棄,唔會幫我出唱片,我呆咗,佢話我講嘢有懶音、黐脷筋,又話我似30歲,我又兩眼通紅,點解呢個世界咁現實?點解呢個圈啲人講嘢咁難聽?點解要講畀我聽呢?」當時想過放棄,可惜她19歲才跟亞視約滿,於是她打算捱完合約期就出國留學。

世事如棋局局新,一天,亞視致電阿田,找她拍劇集《縱橫四海》:「監製鄭偉文帶我去見其他製作人,導演見到我就反問我邊忽似有錢女,我心諗唔係我話要拍㗎,見完覺得我唔啱咪閂埋門講囉,於是我打畀入行時已經認識嘅好朋友杜汶澤,阿澤同我講人哋咁話你,你就唔做,人哋會話你係咖喱啡,叫我點都做埋呢套劇先。」幸運地,《縱》劇成為阿田入行以來首個甜頭,觀眾叫得出她劇中的名字,那份成功感即時冷卻其出國留學夢想。

田蕊妮初入行簽約亞視,99年曾與老公杜汶澤合作《南海十三郎》。
■田蕊妮初入行簽約亞視,99年曾與老公杜汶澤合作《南海十三郎》。
劇照

唔慣使老公錢

老公阿澤的過去,阿田知得一清二楚,她曾向阿澤說:「你個人衰到咁,如果呢個世界冇晒男人,我都唔會揀你,你只係我個friend。」姻緣天注定,兩人於99年9月9日走在一起,阿田說:「我哋一齊好低能,除咗研究演戲外,我哋仲諗如果有100萬就唔使做,平平哋租間700呎村屋幾開心!」正如劇中「姚文英」一角,愛情看法跟阿田蠻相似:「當覺得可以一齊,就會包容佢所有嘢,阿媽話我喺感情上唔似女仔,例如唔慣使老公錢,就算我幾年冇做嘢,我都係使自己積蓄,佢有錢佢嘅事,每個月唔使畀家用我,雖然佢啲錢都放喺我度,但我冇用過佢一蚊,佢理財差先擺我度,我每個月會出糧畀佢,其實我就係銀行櫃枱職員之嘛!」

服裝:I.T

唇齒相依

田蕊妮
■面對別人的批評,田蕊妮會自我反省。


■田蕊妮與杜汶澤多年婚姻,全靠互相帶動巨輪前行。微博圖片

阿田與阿澤因為經歷和宗教,令生活及待人處事有巨大改變,阿田認為現時的滿足,不是有多少部座駕、多少隻手錶:「我同杜先生已經分唔開,大家一直都互相影響緊,佢嘅巨輪行緊嘅同時,亦都帶動住我去行,當然有好同壞影響。有啲人好直接同你講,其實可能係寶,係我貴人,唔係佢哋,都唔知自己有乜嘢問題;試過心情差到幾日都冇乜點郁,有少少抑鬱,但o依家諗番,其實咁樣就過咗,冇乜大不了。」

情迷工人褲

談到在《巨輪》最難忘的事,阿田表示是角色那條工人褲,她笑說:「我細個好鍾意張學友嘅《真情流露》唱片封套,好記得佢條工人褲泡泡哋、綁住件格仔衫、白色T恤,我終於有機會一嘗《真情流露》呢個造型,有次影相,我仲特登擺番《真情流露》嘅甫士。」

田蕊妮
■阿田最愛《巨輪》中的工人褲造型。劇照

學友《真情流露》唱片封套。
■學友《真情流露》唱片封套。