50歲嘅藍潔瑛（Yammie），今日突然傳出失蹤，內地報道就更加嚇人一跳，寫到話藍潔瑛家中「暴斃」。記者去到佢位於赤柱馬坑邨良馬樓寓所等佢，但未見佢蹤影，有位大廈嘅男住客話大約一星期前見過佢：「應該係一個教會朋友陪佢返嚟，佢情況好咗好多，以前會大叫，騷擾到小朋友，依頭髮白晒。」

記者再去到附近佢幫襯開嘅大排檔，有小朋友話有兩、三個月冇見佢嚟過，只係喺暑假見過。不過身在日本嘅好友楊曼莉就指藍潔瑛冇事，佢話：「冇嘢喎，早兩日仲通過電話。」記者昨多番致電及傳短訊聯絡Yammie，電話約晚上7時終於接通，Yammie說：「你搵我咩事？（好多朋友搵唔到你，你冇事嘛？）我冇乜嘢，（身體點？）OK啦，唔講住。（可唔可以一陣再打畀你？）唔可以。」Yammie強調不想再跟娛圈扯上關係，不想再被追訪，更謂：「好多好紅嘅（明星）同記者都冇聯絡啦。」說畢即收線。

曾經靚絕五台山嘅藍潔瑛，99年精神出現問題後，多年來精神狀態反覆，經濟亦陷入困境，除入住筲箕灣公屋愛東邨外，每月僅能靠數千元綜援過活，或靠友人接濟度日，06年透過律師呈請要求頒令破產。

2010年，藍潔瑛曾因為精神不穩及拒絕定時服藥，再度被送往東區醫院治療。身為藍潔瑛好友嘅楊曼莉，當時表示之前探望藍潔瑛時對方表現清醒，仲話要幫佢設計唱片封面。