為演戲，萬梓良曾經去到好盡。為拍一場醉酒戲，萬子可以在鏡頭前一口氣狂隊八罐啤酒再嘔清光；為爭取拍劇廠期，可以寫血衣示威抗議，豪情壯舉幾乎前無古人後無來者，好戲到連周星馳也甘拜下風向萬子偷師。有人認為萬子太躁狂太認真，萬子卻反駁：「你出糧㗎，你估請你嚟玩呀？」戲裏戲外，56歲的萬子依然好有火。

移居廣州多年的萬梓良，下月將重踏香港舞台，為恩師鍾景輝有份執導的舞台劇《茶館》演出。久違了的萬子，這天以路姆西紅色格仔恤衫襯牛仔褲接受本報專訪，看起來倍感親切。

七情上面青筋暴現，涕淚縱橫嗌破喉嚨，是從演37年的萬梓良獨門秘技，也標籤成萬子的個人風格。雖然有人嫌萬子演技浮誇，但他本人卻相當受落：「咁都好，好過冇人記得，喺呢度要講句好實在嘅說話，多謝咁多年嚟鍾意捧我場嘅觀眾，無論電影、電視劇、舞台劇，好多謝觀眾將我栽培出嚟。」

曾幾何時，周星馳也要向萬子偷師。說的是萬子在《他來自江湖》扯住張鳳妮頭髮入廁所開花灑兜頭淋，星爺試過瞞住萬子跟吳孟達劇中「案件重演」；甚至在電影《喜劇之王》滴住鼻涕跟莫文蔚排戲，也是以《流氓大亨》萬子口水鼻涕向昏迷鄭裕玲傾訴一幕作藍本。

講起當年星爺偷師，萬子不住的咭咭笑：「佢見我演咗嗰場戲之後，兩個（星爺與吳孟達）夾計學我重演一次，我唔介意。自己睇到都覺得好好笑。《喜劇之王》學我？我真係唔知，佢好聰明、好有潛質，唔係馬後炮，拍《生命之旅》佢啱啱喺兒童節目出嚟，我話拍劇唔同做兒童節目，叫佢多啲睇吓其他演員前輩做戲。佢有天份，好快吸收到。」

■有人認為萬子太認真太茶煲，萬子卻不以為然，認為認真是演員基本責任。

與星爺冇誤會

萬子跟星爺，曾經份屬老友，92年萬子與恬妞結婚，星爺還擔任首席伴郎。直至星爺開拍《喜劇之王》，原本萬子角色突然換上吳孟達，二人不和消息便不脛而走。萬子說：「冇冇冇，我係時間唔啱，佢哋拍ending嗰幾場戲佈景未得，但我個期只得嗰幾日，度唔到時間，我就拿拿聲叫佢哋諗辦法，叫達哥返嚟。邊度有誤會？大家咁好友情！」

■萬子在《他來自江湖》中扯住張鳳妮頭髮開花灑兜頭淋的一幕，星爺跟吳孟達在劇中「案件重演」。

若要數萬子經典事迹，數足三日三夜也數不完，最為人津津樂道，當然是91年血衣事件。當年為向無綫爭取拍攝廠期，萬子寫血衣討公義，儼如電視界「長毛」，筆者有幸當年直擊這個歷史性時刻。萬子說：「唔係公唔公義，當時公司畀個廠期太緊，演員日拍夜拍冇得休息，未拍完又冇得補番畀你，呢個喺當時嚟講好大問題。」當年血衣所指的「雞毛司令」，其實是當時負責廠期的李添勝？萬子謂：「我冇指任何人，我唔知道。」

好戲的萬子，更好「火」，只要他大喝一聲，個個嚇到腳仔軟。有人認為萬子太燥狂太認真，萬子卻反駁：「認真係你基本責任，你出糧㗎，你老闆請你，你要做好自己本份，你估請你嚟玩呀？以前聽我說話認真做戲嗰啲，鎮宇、青雲，o依家係咪全部做晒影帝？唔係講笑！一定要認真對待你工作，因為你得到呢份工作已經好幸運，你咁幸運得到呢份工作你都唔認真做？唔認真做邊度有前途？」

為健康而減產

對演戲，萬子仍有一團火，但礙於健康問題，不得不減產。他說：「舊年開始我糖尿病，血糖高，個人比平時容易攰，所以減少工作。本來有部電影搵我4月開，但我要做舞台劇，演完要返內地，度期兩頭走會好勞累，有錢又點話，健康最緊要。」偶爾萬子會返港拍電影，但說到港劇，萬子不是沒興趣，只是「冇人搵」，他說：「香港呢邊冇人搵我。喺國內拍，每日一組，唔似香港咁拍完廠又開外景，o依家我哋呢啲年紀，就嚟60（其實只得56歲），冇乜嘢吸引角色、條件，我都少啲返嚟做。有人話：『你萬子好巴閉咩？又要咁又要咁！』係㗎啦！你要請我就要咁，否則唔好請我！結果就係咁冇人請。」

感激鍾景輝提攜

■日前萬子與鍾景輝（中）和梁天（左）為《茶館》綵排，萬子不止一次多謝鍾景輝當年提攜。

《大內群英》的雍正、《太極張三豐》的張三豐、《流氓大亨》的方謹昌、《陸小鳳之鳳舞九天》的陸小鳳及《成吉思汗》的鐵木真，都是萬子喜愛的電視角色。由77年入行時一張白紙，變成80年代電視呼風喚雨的大哥大，萬子全憑「多睇多做」。

萬子說：「樣樣事情都係工多藝熟，當年恩師（鍾景輝）畀機會，訓練班一出嚟就做主角，好多機會同前輩演出，好似十四叔（張瑛）、鮑漢琳，嗰啲全部非常極品，成日睇啲老演員演戲，喺佢哋身上有得益。」萬子愛睇電影，瘋狂程度可以同一部戲一日連睇三次。

90年代萬子忽然跑到內地做生意，以自己英文名Alexman創立服裝品牌，賺過大錢，也蝕到入肉，由高峯期60多個服裝銷售點減到3個，蝕了1,600萬元身家；直至去年，萬子終決定放手：「我由舊年開始全部唔做，因為好艱難，啲零售俾網購打擊，冇錢賺，惟有唔做結束。」搵夠？萬子說：「唔係搵夠，o依家最緊要係一家人齊齊整整，平平安安。」

萬大事

■移居廣州的萬子下月將重踏香港舞台。

縱橫演藝圈37年的萬梓良，嚐盡人生中的甜酸苦辣，高低起跌。

《大內群英》

亞視一哥

77年加入麗的電視（現亞洲電視）藝員訓練班，一出道便擔正做男主角，拍攝多部經典電視劇，如《大內群英》及《太極張三豐》，其中他在《大內群英》飾演雍正，叫好叫座，奠定亞視一哥地位。

過檔竄紅

80年轉投無綫，在多部重頭劇擔任第一男主角，包括《成吉思汗》、《他來自江湖》、《大家族》、《巨人》等。

肉搏紅姑

83年在邵氏電影《男與女》中飾演拳擊手，戀上偷渡來港的少女（鍾楚紅飾），戲中有多場肉搏戲。

戀鄧萃雯

85年拍攝劇集《薛仁貴征東》時，與女主角鄧萃雯互生情愫，但戀情只維持年半。

經典鼻涕

86年拍攝劇集《流氓大亨》，對着昏迷的鄭裕玲流着口水鼻涕地演足七分鐘戲，又仰天大叫「So What」，成為經典場面。

周星馳（右）

鼓勵星爺

87年周星馳與萬子拍《生命之旅》時，萬子鼓勵還未大紅的星爺要有自信，並送了個公事包給他，星爺視如珍寶，其後萬子結婚時，星爺還擔任首席伴郎。

恬妞（左）

金馬封帝

88年憑電影《大頭仔》獲得台灣金馬獎影帝。

血衣抗議

萬子不滿無綫不安排足夠廠期拍《大家族》，91年穿上血衣在電視城抗議，又對住關帝念文天祥的《正氣歌》。

邵逸夫（右）

迎娶恬妞

拍攝劇集《他來自江湖》與恬妞交往，92年結婚，婚禮由無綫直播，並由邵逸夫證婚；二人卻因性格不合而在96年離婚。

轉行賣衫

95年在無綫完成劇集《萬里長情》後，開始減少幕前演出，轉到內地經營時裝生意，品牌命名為Alexman。

再婚添子

02年與任職空姐的郭明黎結婚，同年誕下一子萬大千。