在《史力加》中，怪物史力加與公主費安娜咀嘴後並沒變成英俊王子，反而令費安娜變成怪物公主！現實中，李亞男與王祖藍的「長短腳之戀」令人大跌眼鏡，但女方依舊索爆！誰說世界無童話？電燈柱掛老鼠箱一樣能快樂到永遠！
愛情：唔係貪靚仔
今年娛樂圈驚爆多對令人喜出望外的情侶，「藍男戀」肯定榜上有名，李亞男（Leanne）比祖藍高足六吋，「長短腳之戀」頓成一時佳話！Leanne直言早有心理準備被人談論高度差距：「有擔心過大家接受唔到，但其實除咗外形，我哋真係溝通得好好，最重要自己OK！」喜歡與人分享的她坦言，為「不能說的秘密」滿肚苦水：「好多朋友都唔講得，成日要扮冇拍拖，試過有朋友想介紹男仔畀我識，都唔知點推？」
2005年華裔小姐冠軍Leanne，畢業於加拿大大學，有姿色有學歷，追求者眾，惟保守的她入行前僅拍過一次拖，祖藍其實是她第二個男朋友，實在得來不易：「我好難追o架！你估一、兩個月就OK呀！我要求好高，唔係貪靚仔，亦唔鍾意玩玩吓！佢（祖藍）都係用時間感動我，由好朋友開始，等咗好多年先追到手！」
俗語有云：「矮仔多計」，祖藍由求戀期到熱戀期，經常花盡心思博紅顏一笑，除了在電視上自製錫錫場面外，又在演唱會獻唱冧歌《落入凡間的天使》，難怪Leanne每次想起都笑到收唔到聲：「哈哈哈！祖藍試過送花、蛋糕同彈結他，仲有唱情歌，再多驚喜我都受得住！（你係小天使？）喺佢心目中係啩！佢追我嘅時候喺西貢碼頭唱過呢首歌，只係其中一份禮物，仲畫埋一隻CD封面，畫功都OK！」原來能真正打動伊人的心，並非萬能金錢，而是一份簡單心意：「Feel到佢好用心，我唔需要不斷追求浪漫，好似小朋友送禮物畀父母一樣，唔需要講錢，簡單畫一張卡都好Sweet、好開心！」
家庭：溫室的花朵
Leanne雖然已跟祖藍拍拖年半，但男友仍未正式拜會其家長，她坦言擔心父母未能接受戀情：「真係有少少驚！我只係N年前講過畀屋企人知佢想追我，未知佢哋嘅反應！」從小在溫室中成長的她，與妹妹同被視為掌上明珠，採用公主式教導，談吐舉止必須溫文有禮：「我喺溫哥華長大，由於屋企人管教比較嚴，以前講嘢好斯文，食嘢大聲啲都唔得，坐低仲要翹腳，好似公主咁，時刻都要保持儀態。」
成為選美冠軍後，Leanne獨自向外闖，在香港生活了五年，適應了港人的急速生活；同時亦受祖藍感染，釋放潛在的搞笑細胞：「祖藍成日講笑話，但有時畀我估到晒，唔係成日都『笑爆嘴』！反而我啲笑話幾爛，佢聽完仲開心！（『笑爆嘴』都識？）依家識好多潮語，不過返到溫哥華有啲擔心，平時多數用上海話或普通話同Daddy、媽咪溝通，但試過唔覺意講咗啲粗俗說話，即刻扮傻，博佢哋聽唔明，但佢哋又識啲香港朋友，搞到我又驚驚哋，所以都要收斂吓！（你以前好悶？）Sorry！人係會變o架！哈哈！」
Leanne師姐廖碧兒最近盛傳撇甩拍拖六年的陳豪，轉投富二代林忠豪懷抱，令人再度想起選美是嫁入豪門的捷徑，但Leanne卻不以為然：「好彩未試過有億萬富豪追我，我都唔會揀嗰啲，好似入咗宮咁！如果連出街都有保鏢跟出跟入好奇怪，我都係鍾意隨意啲！」她亦慶幸家人並沒施壓：「父母供書教學，希望子女將來成材，唔好掛住拍拖，所以我都唔急結婚，希望努力工作，賺多啲錢，年紀大咗可以歎番吓！」
事業：恨飾演傻婆
Leanne當年以半冷姿態撼贏陳法拉，摘下華姐后冠，惟法拉近年已躍升當家花旦，早前更勇奪台慶頒獎禮的「最佳女配角」，成績較她優勝：「我都係大熱嚟o架！未選前已經係五強之一，贏咗當然開心！（擔心人哋將你同法拉比較？）預咗啦！即使唔係佢都會有第二個，好彩大家係好朋友，既然性格唔一樣，行嘅路亦唔同！（急起直追？）我永遠會抱住選美心態，喺台上面盡力做到最好，輸贏唔係最重要！」
外形出眾的Leanne，經常飾演貴氣十足的富家女，但她揚言最希望挑戰「傻婆」角色：「如果觀眾接受到，其實我可以試演傻婆角色，或者好似湯盈盈咁做醜八怪都得，可能效果會幾Cute！」為了事業更上一層樓，她早前專程到北京戲劇學院進修演技：「教我哋嘅老師來頭好勁，係一位七十幾歲嘅退休演員，曾經教過鞏俐同章子怡。雖然我只係返咗一個月學，但已經令我更加了解咩叫戲劇，希望將來有一部令自己滿意嘅代表作！」
後記：高妹最愛平底鞋
身高五呎九吋的李亞男，拍攝當日自備五吋高踭鞋，驚現「高過道門」的奇景，面對一班「小矮人」，她笑說：「香港人一般細粒啲，所以平時我多數着平底鞋！工作嗰陣先會着高踭鞋，要緊貼潮流，高啲型啲嘛！」
身高五呎九吋的李亞男，穿上五吋高踭鞋後「高過道門」，實在高不可攀。
「藍男」大方公開戀情，其實今時今日仲使乜搞地下情！（資料圖片）
李亞男（左）透露母親家教甚嚴。（資料圖片）
李亞男（中）半冷撼贏法拉（左）摘華姐后冠，兩者目前各有發展方向。（資料圖片）
李亞男在《烈火雄心3》飾演刁蠻女，明刀明槍追鄭嘉穎。（資料圖片）
自言個性保守的李亞男，選美時穿泳衣已是極限。（資料圖片）
李亞男揚言「唔貪靚仔」，祖藍收到啦！
當索爆費安娜遇上爆笑史力加，未知最終會否開花結果？（設計圖片）