麥浚龍黃偉文《羅生門》大結局 《雷克雅未克》完整版

前情提要:十年前,《耿耿於懷》,麥浚龍(Juno)認識到新女友,但是還掛念愛看少女漫畫的前度;十年後,《念念不忘》,Juno明明同新歡一齊,但就是每晚發夢還掛念前度。誰知,一首《羅生門》,前度謝安琪(Kay)叫他別發夢,自己已經沒看漫畫,亦沒鍾意過哈囉吉蒂,「那動人時光,不用常回看」。

萬眾期待的Juno三部曲大結局,《雷克雅未克》終於出街,在冰島首都一家團聚。除了Juno,原來還同之前唱外傳《瑕疵》,扮演Juno現任女友的莫文蔚(Karen)有關。

15年前,黃偉文為Karen寫了首《北極光》,她就是當年Juno「剛識到的她」囉,可惜Juno對阿Kay念念不忘,Karen又對Juno耿耿於懷;只是估不到Karen原來多年前已經去冰島等一個他;Juno又碰巧希望同第二個如期團聚於冰島某地方。最後周國賢出現在福島,交代Juno這種癡情漢全世界都有。

雷克雅未克

作詞人黃偉文接受訪問,提到這首歌說:「第一,Juno同謝安琪呢段關係,之前三首歌已經講咗,呢隻歌寫到結尾,如果唔擺莫文蔚上去,佢好似變咗配角,其實佢係正印,所以想擺番莫文蔚落去,故仔最後揀冰島首都雷克雅未克,可以包番莫文蔚入去,因為2000年我幫莫文蔚寫《北極光》,我可以通過呢首歌,安排Juno去雷克雅未克謝安琪時,其實莫文蔚都去咗,所以呢個係揀冰島原因,將千絲萬縷拉埋一齊,咁樣完滿啲。」

Wyman繼續解釋:「第二點,點解最後會有周國賢出場,其實想交代Juno呢種癡情漢全世界都有,唔係得Juno,可能轉咗人選、地點,但情懷一樣,所以先搵另一個人——周國賢,另一個地點——福島講呢個故事,所以佢喺另一個地點出場,有少少感覺好似《阿飛正傳》嘅梁朝偉,佢哋都明白我想講呢樣嘢,我發現一樣嘢好有趣,佢哋專登用一把好似嘅聲錄呢首歌,難分難解近乎一樣,佢哋理解歌詞後,聲音有設計,所以好得意,首歌第一次聽分唔到邊個Juno邊個Endy。」

「第三點,當《雷克雅未克》歌名出來之後,有歌手打畀我呷醋同詐型,個歌手叫王菀之,其實係我唔好,我同王菀之都好鍾意雷克雅未克呢個地方,我哋去過亦好鍾意,有次我哋傾偈,我話幫佢寫首歌叫《雷克雅未克》關於冰島,難得成個樂壇得我同你鍾意冰島呢個地方,當時都未知Juno都好鍾意呢個地方,當王菀之知道我用呢個歌名,佢就打電話嚟詐型:『喂!你又話留返畀我嘅,搞錯呀!』自己係講過留番畀佢,但呢個情況之下,好適合擺雷克雅未克喺呢隻歌嘅結尾,自己20幾年嚟唯一一次反悔,真係對佢好唔好意思,欠佢一首好歌,賠番三首歌畀佢,起釘同利叠利先令皇后息怒。」

之前周國賢接受訪問,說自己只是唱最尾幾句,感覺似《阿飛正傳》的梁朝偉,最後出來梳個頭:「Juno叫我寫呢首歌嘅時候,佢話唔要一首好 standard嘅歌,叫我畀一首好癲嘅歌佢,佢話要好浪漫好多旋律,之後我send咗demo畀佢,但佢都嫌唔夠勁,佢話要再癲啲,我就大解放將畢生功力攞入歌裏面,出嚟超難唱,好似新浪漫古典音樂,好高音好長冇重複,好似歌劇嘅女高音,所以有冰島感覺。唔可以形容係流行曲,根本係藝術品,我寫咗兩、三個月,當時多倫多落緊雪,o依家寫唔番意境。」

《雷克雅未克》歌詞

主唱:麥浚龍 Feat. 周國賢
作曲:周國賢
填詞:黃偉文
編曲:王雙駿
監製:麥浚龍 / 王雙駿

還請你兌現約定 飛到為我破冰
置身冰島名勝 殺不死依存症
前塵埋沒那段情 約誓殘念卻沒有清
而你有講過 來年再續舊場景

冒雪獨自踏故城 北歐式配樂 靈動而冷靜
潛入我隨身聽 藍鯨在旋律間低唱遺孤的心聲
相比這市面 緩慢而潔凈
徬徨路人像我 攜同不必的感性

北極裡有一束光 你話留來伴我望
我若覺得絕望 想到亦會全釋放
這綠裡透紫的光 從未天際怒放
好比原來一起能到達的遠方 而未同往
冰川未訪 火山未闖

還是我自困空想之中 未熄的熱情用十年來放送
彷彿一眼熱泉湧進 寒冷冰窖中
炎涼大戰中 誰夠耐性便勝利冰封舊情再解凍
或者失約 一早已在你 預備中
堅守冰島只是我 未望通
根本不是天下情人都求重逢 重溫美夢
情人都求重逢 重修破洞
如情人都能重逢 情歌少很多精彩內容
來踏步空 早些心死早上進
念念的 失約以後 我便我便放鬆
讓掛念葬在最深白雪中

北極裡有一束光 你話留來伴我望
我若覺得絕望 想到亦會全釋放
這綠裡透紫的光 從未天際怒放
好比原來一起能到達的遠方 而未同往
冰川未訪 火山未闖

或我自負又氣盛 冰島的約會純屬場錯認
從沒有留心聽 情人話重返的都市無端改了姓
終不可碰面 無謂來怨命
從來並無洞察 旁人心底的本領

請你兌現約定 飛到伴我看星
往昔福島名勝 破損中顯神聖
誰人能為昨日情 過十年後再度遠征
時間廢墟裡 尋那不經污染相戀的鐵証